Trump Dinner Shooting Chaos | ఎవరి గోల వారిది: కాల్పుల భయంలోనూ మద్యం సీసాలపైనే కన్ను

Trump Dinner Shooting Chaos | త్రినేత్ర.న్యూస్ : రోడ్డు మీద కోడిగుడ్ల లారీ లేదా మద్యం లారీ బోల్తా పడితే జనాలు ఎగబడి తీసుకెళ్లడం మనం తరచుగా చూస్తూనే ఉంటాం. కానీ, ప్రపంచానికే పెద్దన్న అనిపించుకునే అమెరికాలో కూడా ఇలాంటి పరిస్థితే కనిపించింది. అదీ ఏ గల్లీలోనో కాదు.. ఏకంగా అమెరికా అధ్యక్షుడు డొనాల్డ్ ట్రంప్ హాజరైన ప్రతిష్టాత్మక 'వైట్ హౌస్ కరస్పాండెంట్స్ డిన్నర్' కార్యక్రమంలో ఈ విచిత్రమైన ఘటన చోటుచేసుకుంది.

ప్రాణభయంతో కొందరు.. సెల్ఫీలు, మద్యంతో మరికొందరు

వాషింగ్టన్ హిల్టన్ హోటల్‌లో శనివారం రాత్రి జరిగిన ఈ డిన్నర్ పార్టీలో ఒక్కసారిగా కాల్పుల మోత మోగింది. ట్రంప్‌తో సహా ప్రముఖులందరినీ భద్రతా సిబ్బంది హుటాహుటిన సురక్షిత ప్రాంతాలకు తరలించారు. బాల్‌రూమ్‌లో ఉన్న దాదాపు 2,500 మంది అతిథులు ప్రాణభయంతో టేబుళ్ల కింద దాక్కున్నారు. ఇంకొందరు బయటకు పరుగులు తీశారు. సెక్యూరిటీ సిబ్బంది ప్రాంగణాన్ని జల్లెడ పడుతున్నారు. ఇంతటి ఉద్రిక్త పరిస్థితుల మధ్య.. కొందరు మీడియా ప్రతినిధులు మాత్రం అత్యంత నిర్లక్ష్యంగా వ్యవహరించారు.

వైరల్‌గా మారిన దృశ్యాలు

అక్కడ పార్టీ కోసం ఏర్పాటు చేసిన ఖరీదైన మద్యం బాటిళ్లను వదిలి వెళ్లడానికి కొందరికి మనసు రాలేదు. దీంతో చేతికి దొరికిన వైన్ బాటిళ్లను చంకనబెట్టుకుని తాపీగా అక్కడి నుంచి జారుకున్నారు. కొందరు ఏకంగా గ్లాసుల్లో మిగిలి ఉన్న మద్యాన్ని గబగబా తాగేసి వెళ్లే ప్రయత్నం చేశారు. ఒక నల్లటి డ్రెస్ వేసుకున్న మహిళ అయితే ఏకంగా రెండు మద్యం బాటిళ్లను తీసుకుని వెళ్లడం కెమెరాలకు చిక్కింది.

అంతేకాదు, అక్కడ ఏమీ జరగనట్లుగా ఇంకొందరు ఉల్లాసంగా నవ్వుతూ సెల్ఫీలు దిగుతూ కనిపించారు. ఈ ఘటనకు సంబంధించిన దృశ్యాలు ప్రస్తుతం సోషల్ మీడియాలో విపరీతంగా వైరల్ అవుతున్నాయి. ఓ పక్క భద్రతా సిబ్బంది నిందితుడిని పట్టుకునే పనిలో ఉంటే, బాధ్యతాయుతంగా ఉండాల్సిన కొందరు జర్నలిస్టులు ఇలా వ్యవహరించడం పట్ల నెటిజన్లు తీవ్ర స్థాయిలో విమర్శలు గుప్పిస్తున్నారు.

సందట్లో సడేమియా...

వైట్ హౌస్ కాల్పుల సందర్భంగా...

విలువైన మద్యం పట్టుకెళ్లిన జర్నలిస్టులు! pic.twitter.com/Ov6oL2huwB

— UttarandhraNow (@UttarandhraNow) April 26, 2026