US-Israel-Iran War | హార్ముజ్ దాటి భారత్‌కు మరో రెండు ఎల్‌పీజీ ట్యాంకర్లు.. సంక్షోభంపై కేంద్ర మంత్రుల ఎమర్జెన్సీ మీటింగ్

• అబుదాబిలో క్షిపణి శకలాలు పడి ఐదుగురు భారతీయులకు గాయాలు

US-Israel-Iran War | త్రినేత్ర.న్యూస్ : పశ్చిమాసియాలో యుద్ధ మేఘాలు కమ్ముకున్నాయి. అమెరికా, ఇజ్రాయెల్ దళాలు ఇరాన్‌పై దాడులు కొనసాగిస్తుండగా, ఇరాన్ కూడా తీవ్ర స్థాయిలో ప్రతిదాడులకు దిగుతోంది. ఈ క్రమంలో యూఏఈలోని అబుదాబిలో క్షిపణి శకలాలు పడి ఐదుగురు భారతీయులు గాయపడ్డారు. శనివారం అబుదాబిలోని అతిపెద్ద పారిశ్రామిక ప్రాంతమైన ఖలీఫా ఎకనామిక్ జోన్ సమీపంలో ఒక బాలిస్టిక్ క్షిపణిని యూఏఈ దళాలు గాల్లోనే అడ్డుకున్నాయి. అయితే, ఆ క్షిపణి శకలాలు కింద పడటంతో మూడు చోట్ల భారీగా మంటలు చెలరేగాయి. ఈ ఘటనలో ఐదుగురు భారతీయులు సహా మొత్తం ఆరుగురు తీవ్రంగా గాయపడ్డారు. మంటలను అదుపులోకి తెచ్చామని, కూలింగ్ ప్రక్రియ కొనసాగుతోందని అబుదాబి వెల్లడించింది.

భారత్‌కు ఊరటనిచ్చిన ఇరాన్ నిర్ణయం

చమురు దిగుమతులపైనే (90 శాతం) ఆధారపడిన భారత్‌కు ఈ యుద్ధం సమయంలో ఒక చిన్న ఊరట లభించింది. కీలకమైన హార్ముజ్ జలసంధి గుండా ప్రయాణించేందుకు భారత్ సహా ఐదు 'మిత్ర దేశాల' నౌకలకు ఇరాన్ అనుమతి ఇచ్చింది. దీంతో శనివారం రెండు ఎల్‌పీజీ ట్యాంకర్లు (BW ELM, BW TYR) ఈ హై-రిస్క్ కారిడార్‌ను విజయవంతంగా దాటి గల్ఫ్ ఆఫ్ ఒమన్ వైపు దూసుకెళ్తున్నట్లు షిప్పింగ్ డేటా వెల్లడించింది.

ఢిల్లీలో రాజ్‌నాథ్ సింగ్ నేతృత్వంలో మంత్రుల భేటీ

పశ్చిమాసియాలో నెలకొన్న తాజా సంక్షోభం, భారత్‌పై పడే ఆర్థిక, భద్రతా ప్రభావాలపై చర్చించేందుకు రక్షణ మంత్రి రాజ్‌నాథ్ సింగ్ నేతృత్వంలోని మంత్రుల బృందం ఢిల్లీలో అత్యవసరంగా సమావేశమైంది. ఇంధన భద్రత, గల్ఫ్ దేశాల్లోని భారతీయుల రక్షణపై ప్రధానంగా చర్చించినట్లు తెలుస్తోంది.

అమెరికా, ఇజ్రాయెల్ దాడులు.. ఇరాన్ ప్రతీకారం

టెహ్రాన్ (ఇరాన్)లోని కీలక మౌలిక సదుపాయాలు, అణు కేంద్రాలు, స్టీల్ ప్లాంట్లపై ఇజ్రాయెల్ వాయుసేన దాడులు పూర్తి చేసిందని ఐడీఎఫ్ ప్రకటించింది. దుబాయ్‌లో 500 మందికి పైగా అమెరికా సైనికులు తలదాచుకున్న రెండు స్థావరాలపై క్షిపణులు, డ్రోన్లతో దాడి చేసినట్లు ఇరాన్ ప్రకటించింది.

భూతల దళాలు అవసరం లేదు: అమెరికా

ఇరాన్‌లో తమ లక్ష్యాలను సాధించడానికి గ్రౌండ్ ట్రూప్స్ (పదాతిదళం) అవసరం లేదని అమెరికా విదేశాంగ మంత్రి మార్కో రూబియో స్పష్టం చేశారు. మధ్యప్రాచ్యానికి 3000 మంది సైనికులను పంపే యోచనలో అమెరికా ఉందన్న వార్తల నేపథ్యంలో ఆయన ఈ వ్యాఖ్యలు చేశారు. మరోవైపు, ఏప్రిల్ 6 వరకు ఇరాన్ ఇంధన కేంద్రాలపై దాడులను నిలిపివేస్తున్నట్లు అమెరికా అధ్యక్షుడు డొనాల్డ్ ట్రంప్ ప్రకటించారు.

శాంతి చర్చలకు ముమ్మర యత్నాలు

ఈ యుద్ధాన్ని ఆపేందుకు పాకిస్థాన్ మధ్యవర్తిత్వంతో అమెరికా 15 అంశాలతో కూడిన శాంతి ప్రణాళికను ప్రతిపాదించింది. అయితే దీన్ని "ఏకపక్షమైనది, అన్యాయమైనది" అంటూ ఇరాన్ తిరస్కరించింది. ఈ ఉద్రిక్తతలను తగ్గించడానికి ఆదివారం నుంచి ఇస్లామాబాద్ (పాకిస్థాన్) వేదికగా పాకిస్థాన్, సౌదీ అరేబియా, టర్కీ, ఈజిప్ట్ విదేశాంగ మంత్రులు కీలక చర్చలు జరపనున్నారు.

ఈ దాడులు, ప్రతిదాడుల వల్ల ఇంధన, వాణిజ్య మార్గాలకు తీవ్ర అంతరాయం కలుగుతుండటంతో ప్రపంచ దేశాలు ఆందోళన వ్యక్తం చేస్తున్నాయి.