VC Sajjanar Cyber Crime Warning | డిజిటల్ అరెస్ట్ పేరుతో రోజుకు కోటి రూపాయలు కొల్లగొడుతున్నారు

VC Sajjanar Cyber Crime Warning | త్రినేత్ర.న్యూస్ : సాంకేతికత ఎంత వేగంగా పెరుగుతుందో.. దాన్ని ఆసరాగా చేసుకుని అమాయక ప్రజల కష్టార్జితాన్ని దోచుకునే సైబర్ నేరగాళ్ల సంఖ్య కూడా అంతే స్థాయిలో పెరుగుతోందని హైదరాబాద్ నగర పోలీస్ కమిషనర్ వీసీ సజ్జనార్ హెచ్చరించారు. ముఖ్యంగా విశ్రాంత ఉద్యోగులు, సీనియర్ సిటిజన్లు టార్గెట్‌గా జరుగుతున్న ఆన్‌లైన్ మోసాల పట్ల అత్యంత అప్రమత్తంగా ఉండాలని పిలుపునిచ్చారు.

'సైబర్ జాగరూకత దివాస్' సందర్భంగా సిటీ సైబర్ క్రైమ్ విభాగం ఆధ్వర్యంలో ఖైరతాబాద్‌లోని విశ్వేశ్వరయ్య భవన్‌లో సీనియర్ సిటిజన్ల కోసం ప్రత్యేక అవగాహన సదస్సు నిర్వహించారు. ఈ కార్యక్రమంలో మాజీ డీజీపీలు రతన్, మాలకొండయ్య తదితరులతో కలిసి సజ్జనార్ 'సురక్ష కా తిరంగా' పోస్టర్‌ను ఆవిష్కరించారు.

షాకింగ్ గణాంకాలు: రోజుకు రూ.కోటికి పైగా మాయం

సదస్సులో సీపీ సజ్జనార్ మాట్లాడుతూ నగరంలో నమోదవుతున్న సైబర్ నేరాల తీవ్రతను వివరించారు.

సంప్రదాయ నేరాలు vs సైబర్ నేరాలు

"నగరంలో ఏడాది కాలంలో జరిగే దొంగతనాలు, దోపిడీల వల్ల రూ.30 కోట్ల నష్టం వాటిల్లితే.. ఒక్క సైబర్ నేరాల రూపంలోనే బాధితులు ఏకంగా రూ.400 కోట్లకు పైగా పోగొట్టుకున్నారు. అంటే సగటున రోజుకు రూ.కోటికి పైగా ప్రజల సొమ్ము కేటుగాళ్ల ఖాతాల్లోకి మళ్లుతోంది." అని వీసీ సజ్జనార్ వివరించారు.

'డిజిటల్ అరెస్ట్' అనేదే లేదు

ఇటీవల బాగా ఎక్కువైన 'డిజిటల్ అరెస్ట్' మోసాలపై సీపీ ఘాటుగా స్పందించారు. సీబీఐ (CBI), ఈడీ (ED), ఆర్‌బీఐ లేదా పోలీస్ అధికారులమని చెప్పి ఆన్‌లైన్‌లో బెదిరిస్తే భయపడాల్సిన అవసరం లేదని తేల్చి చెప్పారు. మన దేశ చట్టాల్లో కానీ, పోలీస్ వ్యవస్థలో కానీ 'డిజిటల్ అరెస్ట్' అనే పద్ధతే లేదని వివరించారు. ఇలాంటి ఫోన్ కాల్స్ రాగానే భయపడకుండా వెంటనే కట్ చేయాలని సూచించారు.

వాట్సప్, టెలిగ్రామ్ గ్రూపుల్లో వచ్చే నకిలీ ఇన్వెస్ట్‌మెంట్ ప్రకటనలు, షేర్ ట్రేడింగ్ లింక్‌లను నమ్మి డబ్బులు పెట్టి మోసపోవద్దని హెచ్చరించారు. ఇంట్లో పిల్లలకు ఫోన్లు ఇచ్చే సమయంలోనూ జాగ్రత్తగా ఉండాలని, ఆన్‌లైన్ గేమింగ్ లేదా బెట్టింగ్ యాప్‌ల వల్ల పెద్దల రిటైర్మెంట్ సొమ్ము ఖాళీ అవుతున్న ఘటనలు వెలుగులోకి వచ్చాయని గుర్తుచేశారు.

సైబర్ మోసం జరిగితే ఏం చేయాలి?

ఒకవేళ అజాగ్రత్త వల్ల సైబర్ నేరగాళ్ల బారిన పడితే కంగారు పడకుండా తక్షణమే స్పందించాలని పోలీసులు తెలిపారు.

గోల్డెన్ అవర్ ప్రాముఖ్యత: మోసం జరిగిన వెంటనే ఎంత త్వరగా స్పందిస్తే డబ్బులు రికవరీ అయ్యే అవకాశాలు అంత ఎక్కువగా ఉంటాయి.

టోల్ ఫ్రీ నంబర్: వెంటనే 1930 టోల్ ఫ్రీ హెల్ప్‌లైన్ నంబర్‌కు ఫోన్ చేసి ఫిర్యాదు చేయాలి.

ఆన్‌లైన్ పోర్టల్: లేదా ఎన్‌సీఆర్పీ (NCRP) నేషనల్ సైబర్ క్రైమ్ రిపోర్టింగ్ పోర్టల్‌లో ఆన్‌లైన్ ద్వారా ఫిర్యాదు నమోదు చేయవచ్చు.

సదస్సులో పాల్గొన్న మాజీ డీజీపీ మాలకొండయ్య మాట్లాడుతూ.. రోజువారీ డిజిటల్ లావాదేవీల కోసం మెయిన్ సేవింగ్స్ ఒకే ఖాతాలో ఉంచకుండా, తక్కువ మొత్తం ఉండేలా మరొక ప్రత్యేక బ్యాంక్ ఖాతాను తెరిచి దాన్ని మాత్రమే ఉపయోగించాలని సీనియర్ సిటిజన్లకు సలహా ఇచ్చారు. ఈ కార్యక్రమంలో అదనపు సీపీ ఎం. శ్రీనివాస్, డీసీపీలు శిల్పవల్లి, రమణారెడ్డి, రాజేశ్, సైబర్ క్రైమ్ ఏసీపీ శివమారుతి తదితర అధికారులు పాల్గొన్నారు.