Hyderabad Cloud Kitchens Raid | ఛీ.. యాక్ : ఆన్‌లైన్‌లో ఫుడ్ ఆర్డర్ చేస్తున్నారా? ముందు ఇది చదవండి

• హైదరాబాద్ క్లౌడ్ కిచెన్లలో బొద్దింకలు, పురుగులు పట్టిన రవ్వ
• 25 బృందాలతో 'టీజీ సేఫ్' మెరుపు దాడులు

Hyderabad Cloud Kitchens Raid | త్రినేత్ర న్యూస్ : ఆన్‌లైన్‌లో ఫుడ్ ఆర్డర్ చేసేవారిని ఉలిక్కిపడేలా చేసే నిజాలు వెలుగులోకి వచ్చాయి. హైదరాబాద్‌లోని కోర్ అర్బన్ రీజియన్ (CURE) పరిధిలో ఉన్న పలు క్లౌడ్ కిచెన్లపై టీజీ సేఫ్ (TG SAFE) ఫుడ్ వింగ్ అధికారులు మంగళవారం మెరుపు దాడులు నిర్వహించారు. ఏకంగా 25 ప్రత్యేక ఎన్‌ఫోర్స్‌మెంట్ బృందాలు రంగంలోకి దిగి ఏకకాలంలో జరిపిన ఈ తనిఖీల్లో తీవ్రమైన ఆహార భద్రతా ఉల్లంఘనలు బయటపడ్డాయి.

ఒకే కిచెన్‌లో 15 బాక్సుల ఫుడ్ కలర్స్.. గడువు ముగిసిన సరుకులు

అధికారులు జరిపిన తనిఖీల్లో వంటశాలలు అత్యంత అపరిశుభ్రంగా ఉన్నట్లు తేలింది. ఆహార పదార్థాలు తయారు చేసే ప్రదేశాల్లో బొద్దింకలు, ఇతర పురుగులు విచ్చలవిడిగా తిరుగుతుండటాన్ని తనిఖీ బృందాలు గుర్తించాయి. ఒక క్లౌడ్ కిచెన్‌లో అయితే నిబంధనలకు విరుద్ధంగా నిల్వ ఉంచిన 15 బాక్సుల ఫుడ్ కలర్స్ పట్టుబడ్డాయి.

పురుగులు పట్టిన బొంబాయి రవ్వ.. ప్లాస్టిక్ బోర్డుల వాడకం

మరికొన్ని కిచెన్లలో ఎక్స్‌పైరీ డేట్ (గడువు) ముగిసిపోయిన సగ్గుబియ్యం (Sabudana) ప్యాకెట్లు, పురుగులు పట్టిన బొంబాయి రవ్వను వంటల కోసం ఉపయోగిస్తున్నట్లు అధికారులు గుర్తించారు. అలాగే కూరగాయలు కట్ చేసేందుకు ఆరోగ్యానికి హాని కలిగించే ప్లాస్టిక్ చాపింగ్ బోర్డులను వాడుతున్నట్లు తనిఖీల్లో బయటపడింది.

తనిఖీల్లో బయటపడిన ప్రధాన ఉల్లంఘనలు ఇవే

• ఒకే కిచెన్‌లో 15 బాక్సుల కృత్రిమ ఫుడ్ కలర్స్ గుర్తింపు
• గడువు ముగిసిన (Expired) సగ్గుబియ్యం నిల్వలు
• వంటగదుల్లో బొద్దింకలు, ఇతర కీటకాలు తిరుగుతున్న దుస్థితి
• బొంబాయి రవ్వలో పురుగులు చేరిన వైనం
• కూరగాయలు కోసేందుకు ప్లాస్టిక్ చాపింగ్ బోర్డుల వినియోగం

క్లౌడ్ కిచెన్ల మూసివేతకు చర్యలు

కస్టమర్ల ఆరోగ్యంతో చెలగాటమాడుతున్న ఈ క్లౌడ్ కిచెన్లపై అధికారులు కఠిన చర్యలకు ఉపక్రమించారు. తీవ్రమైన ఉల్లంఘనలు బయటపడిన కొన్ని కిచెన్లను మూసివేసే (Closure proceedings) ప్రక్రియను ప్రారంభించారు. ఇతర లోపాలు ఉన్న నిర్వాహకులకు షోకాజ్ నోటీసులతో పాటు తీరు మార్చుకోవాలని ఇంప్రూవ్‌మెంట్ నోటీసులు జారీ చేస్తున్నట్లు అధికారులు వెల్లడించారు.