Wings India 2026 | మామునూరుకు మోక్షం.. తెలంగాణ విమానయాన రంగంలో కొత్త శకం

• ఇది చరిత్రలో నిలిచిపోయే రోజు: డిప్యూటీ సీఎం భట్టి విక్రమార్క
• ఆదిలాబాద్, కొత్తగూడెం ఎయిర్పోర్ట్ పనులూ వేగవంతం చేయాలని విజ్ఞప్తి
• 'వింగ్స్ ఇండియా 2026'లో తెలంగాణ విజన్‌ను ఆవిష్కరించిన ఉపముఖ్యమంత్రి

Wings India 2026 | త్రినేత్ర.న్యూస్: తెలంగాణ విమానయాన రంగ చరిత్రలో గురువారం ఒక కీలక ఘట్టం ఆవిష్కృతమైంది. వరంగల్ జిల్లాలోని మామునూరు ఎయిర్పోర్ట్ పునరుద్ధరణ కోసం ఎంతో కాలంగా ఎదురుచూస్తున్న 300 ఎకరాల భూమిని రాష్ట్ర ప్రభుత్వం అధికారికంగా కేంద్ర విమానయాన శాఖకు అప్పగించింది. బేగంపేట విమానాశ్రయంలో జరిగిన ఈ కార్యక్రమంలో డిప్యూటీ సీఎం భట్టి విక్రమార్క మల్లు పాల్గొన్నారు.

మామునూరు ఎయిర్‌పోర్ట్: ఒక చారిత్రక ముందడుగు

ఈ సందర్భంగా భట్టి విక్రమార్క మాట్లాడుతూ, ప్రజా ప్రభుత్వం అధికారంలోకి రాగానే మామునూరు ఎయిర్‌పోర్ట్ ప్రాముఖ్యతను గుర్తించి, భూసేకరణ కోసం రూ. 300 కోట్లు విడుదల చేశామని తెలిపారు. "ఈరోజు కేంద్ర వైమానిక శాఖ మంత్రి రామ్మోహన్ నాయుడుకు 300 ఎకరాల భూమిని అప్పగించడం చరిత్రలో నిలిచిపోయే రోజు," అని భట్టి వ్యాఖ్యానించారు.

నిజాం కాలంలోనే (1930) ప్రారంభమైన మామునూరు ఎయిర్ పోర్ట్, ఒకప్పుడు దక్షిణ భారతదేశంలోనే అతిపెద్ద ఎయిర్‌పోర్ట్‌గా వెలుగొందిందని గుర్తుచేశారు. గత పదేళ్ల పాలనలో నిర్లక్ష్యం వల్లే 2007లో ఒప్పందం జరిగినప్పటికీ పనులు ముందుకు సాగలేదని విమర్శించారు.

కొత్తగూడెం, ఆదిలాబాద్‌లకు విమాన సేవలు

హైదరాబాద్‌కు పరిమితం కాకుండా, రాష్ట్రంలోని టైర్-2 నగరాలైన కొత్తగూడెం, ఆదిలాబాద్‌లలో కూడా విమానాశ్రయాల నిర్మాణాన్ని వేగవంతం చేయాలని కేంద్ర మంత్రిని కోరినట్లు భట్టి తెలిపారు. తెలుగు వ్యక్తి కేంద్ర వైమానిక శాఖ మంత్రిగా ఉండటం గర్వకారణమని, రాష్ట్ర అభివృద్ధికి వారు సహకరించాలని కోరారు.

వింగ్స్ ఇండియా 2026: గ్లోబల్ హబ్‌గా తెలంగాణ

అనంతరం 'వింగ్స్ ఇండియా 2026' ఎయిర్ షో సదస్సులో పాల్గొన్న డిప్యూటీ సీఎం, విమానయాన రంగంలో తెలంగాణ భవిష్యత్తు ప్రణాళికలను వివరించారు.

లోకల్ టు గ్లోబల్: భారతదేశం ఇప్పుడు కేవలం విమానాలను కొనుగోలు చేసే దేశం మాత్రమే కాదని, తయారీదారులుగా, నిర్వహణ నిపుణులుగా ఎదుగుతోందని అన్నారు. ఈ మార్పులో తెలంగాణ కీలక పాత్ర పోషిస్తోందన్నారు.

 

కాంగ్రెస్ దూరదృష్టి - వైఎస్సార్ మార్క్: 1990ల ఆర్థిక సంస్కరణలు, 2004-2014 మధ్య కాంగ్రెస్ ప్రభుత్వాల చొరవతోనే విమానయాన రంగం ఈ స్థాయికి చేరిందని భట్టి గుర్తుచేశారు. దివంగత సీఎం వైఎస్ రాజశేఖర రెడ్డి హయాంలోనే శంషాబాద్ అంతర్జాతీయ విమానాశ్రయానికి బీజం పడిందని, అదే నేడు హైదరాబాద్‌ను గ్లోబల్ హబ్‌గా నిలబెట్టిందని తెలిపారు. మౌలిక సదుపాయాలు అనేవి ఒక ప్రభుత్వ కాలానికి కాకుండా, తరతరాల కోసం నిర్మించబడతాయని వ్యాఖ్యానించారు.

2047 లక్ష్యం - తెలంగాణ విజన్: తెలంగాణను ఏరో-ఇంజిన్ మరియు MRO హబ్‌గా తీర్చిదిద్దడమే తమ ప్రభుత్వ లక్ష్యమని భట్టి స్పష్టం చేశారు.

నైపుణ్యం: ప్రపంచవ్యాప్తంగా ఎగిరే విమానాల్లో హైదరాబాద్ ఇంజినీర్లు తయారు చేసిన భాగాలు ఉండటం గర్వకారణం.

స్థిరత్వం: హైదరాబాద్ ఎయిర్పోర్ట్ ఇప్పటికే 100% పునరుత్పాదక శక్తితో నడుస్తోందని, భవిష్యత్తులో గ్రీన్ ఏవియేషన్‌కు తెలంగాణ నాయకత్వం వహిస్తుందని తెలిపారు.

గ్రామీణ అనుసంధానం: మంచి రోడ్లు గ్రామాలను పట్టణాలతో కలిపితే, మంచి విమానాశ్రయాలు కలలను గమ్యస్థానాలతో కలుపుతాయని భట్టి చమత్కరించారు.

చివరగా, పెట్టుబడిదారులకు తెలంగాణలో స్థిరమైన, పారదర్శకమైన పాలన అందుతుందని హామీ ఇస్తూ, గ్లోబల్ ఏవియేషన్ రంగంలో భాగస్వాములుగా కలిసి రావాలని పిలుపునిచ్చారు.