Teenmar Mallanna | ‘తొక్కి నారా తీయండి.. A1గా నేనే ఉంటా’: కార్పొరేట్ విద్యాదోపిడీపై మల్లన్న సమరశంఖం

Teenmar Mallanna | త్రినేత్ర.న్యూస్ : తెలంగాణ రాష్ట్రంలో విద్యా వ్యవస్థ వ్యాపారంగా మారిపోయిందని, ప్రైవేట్, కార్పొరేట్ సంస్థల అడ్డగోలు దోపిడీని ఇకపై సహించేది లేదని తెలంగాణ రాజ్యాధికార పార్టీ (TRP) అధినేత తీన్మార్ మల్లన్న స్పష్టం చేశారు. కార్పొరేట్ విద్యాసంస్థల ఫీజుల దోపిడీకి వ్యతిరేకంగా ఆదివారం ఇందిరా పార్క్ వద్ద టీఆర్‌పీ ఆధ్వర్యంలో నిర్వహించిన “మహాధర్నా” సక్సెస్ అయింది. మండుటెండను సైతం లెక్కచేయకుండా రాష్ట్ర నలుమూలల నుంచి వేలాదిగా తల్లిదండ్రులు, విద్యార్థులు, యువత ఈ ధర్నాకు తరలివచ్చారు. ప్రభుత్వ తీరుకు, కార్పొరేట్ యాజమాన్యాలకు వ్యతిరేకంగా ధర్నా ప్రాంగణం నినాదాలతో హోరెత్తింది.

పేదవాడి చదువుతో చెలగాటమాడితే ఉరికిచ్చి కొడతాం

ధర్నాను ఉద్దేశించి తీన్మార్ మల్లన్న అత్యంత ఘాటుగా ప్రసంగించారు. కార్పొరేట్ కాలేజీల యాజమాన్యాలకు గట్టి వార్నింగ్ ఇచ్చారు. "తొక్కి నారా తీయండి.. ఎవరైనా కేసులు పెడితే ఏ1 (A1) నిందితుడిగా నేనే ఉంటా.. పేదవాడి చదువుతో చెలగాటమాడితే ఉరికిచ్చి కొడతాం" అని హెచ్చరించారు.

రాష్ట్రంలో విద్యా వ్యవస్థ పూర్తిగా వ్యాపార ధోరణిలో నడుస్తోందని మండిపడ్డారు. "పిల్లల భవిష్యత్తును బంధకం పెట్టి తల్లిదండ్రుల కష్టార్జితాన్ని కార్పొరేట్ రాబందులు దోచుకుంటున్నాయి. వారు చదువును కాదు.. భయాన్ని అమ్ముతున్నారు. విద్య పేరుతో పేదవాడి కలలను నెమ్మదిగా చంపేస్తున్నారు" అని ఆవేదన వ్యక్తం చేశారు.

నారాయణ, చైతన్యల గుట్టు.. మీడియా మేనేజ్‌మెంట్

అడ్మిషన్లు, స్పెషల్ ఫీజులు, డొనేషన్లు, బస్ ఫీజులు, మెటీరియల్ ఛార్జీలు.. ఇలా రకరకాల పేర్లతో ప్రైవేట్ విద్యాసంస్థలు లక్షల రూపాయలు వసూలు చేస్తున్నాయని మల్లన్న దుయ్యబట్టారు. ఒక సగటు మధ్యతరగతి కుటుంబం ఆదాయం కంటే పిల్లల చదువు ఖర్చే ఎక్కువగా మారిపోయిందన్నారు. "ఒక రైతు ఏడాది పొద్దస్తమానం కష్టపడి సంపాదించిన సొమ్ము మొత్తం పిల్లాడి ఒక్క సంవత్సరపు ఫీజుకే సరిపోతే.. దీన్ని విద్యా వ్యవస్థ అనరు, బహిరంగ దోపిడీ అంటారు" అని ఆగ్రహం వ్యక్తం చేశారు.

ఇంత జరుగుతున్నా ప్రధాన మీడియా సంస్థలు ఈ నిరసన కార్యక్రమాలకు రాకపోవడం, ప్రజల సమస్యలను చూపించకపోవడం వెనుక కార్పొరేట్ శక్తుల హస్తం ఉందని ఆరోపించారు. కార్పొరేట్ విద్యాసంస్థలు యాడ్స్ (ప్రకటనల) రూపంలో కోట్లు ఖర్చు చేసి మీడియా నోరు నొక్కుతున్నాయని మల్లన్న విమర్శించారు.

రేవంత్ రెడ్డి.. చేతకాకపోతే గద్దె దిగు!

ఇతర రాష్ట్రాల్లో ఫీజుల నియంత్రణ వ్యవస్థలు కఠినంగా అమలవుతుంటే, తెలంగాణలో మాత్రం ఆ పరిస్థితి ఎందుకు లేదని ప్రభుత్వాన్ని మల్లన్న నిలదీశారు. తెలంగాణలో పేద పిల్లలకు విద్యా హక్కు (Right to Education - RTE) చట్టాన్ని అమలు చేయడంలో కాంగ్రెస్ ప్రభుత్వం పూర్తిగా విఫలమైందన్నారు. "తెలంగాణలో RTE అమలు చేయలేరా? రేవంత్ రెడ్డి నీకు చేతకాకపోతే గద్దె దిగు!" అని తీవ్ర స్థాయిలో ధ్వజమెత్తారు.

ఒకవైపు 1200 ప్రభుత్వ పాఠశాలలు మూతపడే స్థితికి చేరుకుంటే, కొత్తగా 2500 ప్రైవేట్ విద్యాసంస్థలకు ప్రభుత్వం ఎలా అనుమతులు ఇస్తుందని ప్రశ్నించారు. ఇది ప్రభుత్వ బడులను నిర్వీర్యం చేసి, కార్పొరేట్ విద్యాసంస్థలకు ఎర్రతివాచీ పరచడమేనని విమర్శించారు.

ప్రభుత్వం ముందు మల్లన్న ఉంచిన ప్రధాన డిమాండ్లు

• ప్రైవేట్, కార్పొరేట్ విద్యాసంస్థల ఫీజులపై తక్షణమే కఠిన నియంత్రణ విధించాలి.
• అన్ని విద్యాసంస్థల ఆర్థిక లావాదేవీలను పారదర్శకంగా ఉంచి, ప్రజలకు అందుబాటులోకి తీసుకురావాలి.
• పేద, మధ్యతరగతి విద్యార్థులకు న్యాయం జరిగేలా 'విద్యా హక్కు చట్టాన్ని' (RTE) రాష్ట్రంలో 100% అమలు చేయాలి.
• కార్పొరేట్ సంస్థల అనుమతులు రద్దు చేసి, ప్రభుత్వ విద్యను బలోపేతం చేయాలి.

ప్రైవేట్ విద్యా దోపిడీని అరికట్టే వరకు తమ పోరాటం ఆగదని, అవసరమైతే రాష్ట్రవ్యాప్తంగా మరింత ఉధృతంగా ఉద్యమాన్ని ముందుకు తీసుకెళ్తామని మల్లన్న స్పష్టం చేశారు. ఈ భారీ ధర్నా కార్యక్రమంలో టీఆర్‌పీ రాష్ట్ర, జిల్లా కమిటీ నాయకులతో పాటు, ఎంఎంబీటీ (MBT) నాయకులు, వివిధ విద్యార్థి సంఘాల ప్రతినిధులు, బాధిత తల్లిదండ్రులు, ప్రజాసంఘాల నాయకులు భారీ సంఖ్యలో పాల్గొన్నారు.