Hyderabad Water Tanker Strike Called Off | సిటీ బోర్లలో నీళ్లు ఎందుకు ఇంకిపోతున్నాయి? హైడ్రా కమిషనర్ రంగనాథ్‌ ఏమన్నారంటే?

• హైదరాబాద్ వాసులకు భారీ ఊరట
• నీటి ట్యాంకర్ల సమ్మె విరమణ
• హైడ్రా కమిషనర్‌తో చర్చలు సఫలం

Hyderabad Water Tanker Strike Called Off | త్రినేత్ర న్యూస్ : గత రెండు రోజులుగా నీటి కొరతతో తీవ్ర ఇబ్బందులు పడుతున్న హైదరాబాద్ నగర ప్రజలకు, వాణిజ్య సముదాయాలకు పెద్ద ఊరట లభించింది. ప్రైవేట్ నీటి ట్యాంకర్ల యజమానులు తమ సమ్మెను తక్షణమే విరమిస్తున్నట్లు ప్రకటించారు. బుధవారం మధ్యాహ్నం హైడ్రా (HYDRAA) కార్యాలయంలో కమిషనర్ ఏవీ రంగనాథ్‌తో వాటర్ ట్యాంకర్ల అసోసియేషన్ ప్రతినిధులు జరిపిన కీలక చర్చలు ఫలించడంతో నగరంలో నీటి సరఫరాను వెనువెంటనే పునరుద్ధరించాలని నిర్ణయించారు.

హైదరాబాద్ జిల్లా ఇన్‌చార్జ్ మంత్రి పొన్నం ప్రభాకర్ సూచనల మేరకు అసోసియేషన్ అధ్యక్షుడు చంద్రశేఖర్ నేతృత్వంలోని బృందం హైడ్రా కమిషనర్‌ను కలిసి తమ సమస్యలను నివేదించింది. కమిషనర్ చేసిన నిర్మాణాత్మక సూచనలకు వారు సానుకూలంగా స్పందించారు.

ఇకపై ఓఆర్‌ఆర్ (ORR) అవతలి నుంచే నీటి సేకరణ

నగరంలోని భూగర్భ జలాలు ప్రమాదకర స్థాయికి పడిపోతున్న నేపథ్యంలో ట్యాంకర్ల నిర్వహణపై ఒక శాశ్వత పరిష్కారానికి ఒప్పందం కుదిరింది. సంబంధిత శాఖల నుంచి అధికారిక పర్మిషన్లు తీసుకుని, ఔటర్ రింగ్ రోడ్డు ఆవల ఉన్న పెరి-అర్బన్ రీజియన్ (PURE) పరిధిలోని బోర్ల నుంచే నీటిని సేకరించి నగరానికి సరఫరా చేస్తామని యజమానులు హామీ ఇచ్చారు. భవిష్యత్ వాణిజ్య కార్యకలాపాలన్నీ ఈ ప్రాంతాల నుంచే సాగుతాయని స్పష్టం చేశారు.

లోకల్ బోర్ల నుంచే నీటిని తోడేస్తున్నారు

నగరంలో ఎల్‌నినో ప్రభావం, వర్షపాతం తగ్గడం వల్ల భూగర్భ జలమట్టాలు పడిపోయాయని కమిషనర్ రంగనాథ్ వివరించారు. మాదాపూర్, గచ్చిబౌలి, కూకట్‌పల్లి, అమీర్‌పేట, అశోక్‌నగర్ వంటి ప్రాంతాల్లో వాణిజ్య డిమాండ్ ఎక్కువగా ఉండటంతో.. రవాణా ఖర్చులు తగ్గించుకునేందుకు నిర్వాహకులు లోకల్ బోర్ల నుంచే నీటిని తోడేస్తున్నారు.

సాధారణ ఇళ్ల కోసం వేసే బోర్లు 100 నుండి 300 అడుగుల లోతు ఉంటే, కమర్షియల్ అవసరాల కోసం కొందరు ఏకంగా 1,000 నుండి 1,500 అడుగుల లోతుకు డ్రిల్లింగ్ చేసి భారీ మోటార్లు బిగిస్తున్నారు.

దీనివల్ల స్థానికుల ఇళ్లలోని బోర్లు పూర్తిగా ఎండిపోయి తీవ్ర నీటి ఎద్దడి తలెత్తుతోంది.

ప్రజల ఫిర్యాదులపై హైడ్రా మెరుపు చర్యలు

వాణిజ్య అవసరాల కోసం తమ ప్రాంతాల్లో నీటిని తోడటాన్ని వ్యతిరేకిస్తూ తెల్లాపూర్ వాసులు రోడ్డెక్కి నిరసన తెలపగా.. సూరారం, జీడిమెట్ల కాలనీల సంఘాలు హైడ్రాను ఆశ్రయించాయి. దీంతో రెవెన్యూ, పోలీస్, మున్సిపల్, వాటర్ బోర్డు శాఖలతో సమన్వయం చేసుకున్న హైడ్రా.. చెరువులు, నివాస ప్రాంతాల్లో అక్రమంగా ఏర్పాటు చేసిన వాణిజ్య బోర్లను తొలగించడం ప్రారంభించింది.

ఓవైపు నగర ప్రజల నిత్యావసర తాగునీటి హక్కును కాపాడుతూనే.. మరోవైపు వాణిజ్య సంస్థలకు ఇబ్బంది కలగకుండా ఓఆర్‌ఆర్ వెలుపలి నుంచి నీటిని తెచ్చుకునే వెసులుబాటును కల్పించడంతో ఈ ప్రతిష్టంభనకు తెరపడింది.

-నీటి ట్యాంకర్ల సమ్మె విరమణ
-ORR బయట నుంచి నీటి తరలింపునకు అంగీకారం
-హైడ్రా కమిషనర్ తోసమవేశం అనంతరం నీటి ట్యాంకర్ల యజమానుల అంగీకారం
-తక్షణమే సరఫరాల పునరుద్ధరణకు నిర్ణయం

🔶నీటి ట్యాంకర్ల యజమానులు సమ్మెను విరమించారు. తక్షణమే నీటి సరఫరా పునరుద్ధరణకు అంగీకరించారు. బుధవారం హైడ్రా కార్యాలయంలో హైడ్రా కమిషనర్ శ్రీ ఏవీ రంగనాథ్ గారితో వాటర్ ట్యాంకర్ల యజమానులు సమావేశమయ్యారు. వాటర్ ట్యాంకర్ల యజమానులు ఎదుర్కొంటున్న సమస్యలు చర్చించారు. కమిషనర్ గారి సూచనల మేరకు సమ్మె విరమణ చేయాలని నిర్ణయించారు. ఔటర్ రింగు రోడ్డు అవతల నుంచి నీటిని తోడి ట్యాంకర్ల ద్వారా సరఫరా చేసేందుకు యజమానులు అంగీకరించారు. దీంతో గత రెండు రోజులుగా సాగుతున్న సమ్మె ముగిసింది. తక్షణమే నీటి ట్యాంకర్ల సరఫరాలను పునరుద్ధరించాలని నిర్ణయించింది. హైదరాబాద్‌ జిల్లా ఇన్‌చార్జి మంత్రి శ్రీ పొన్నం ప్రభాకర్‌ గారి సూచన మేరకు సంఘం అధ్యక్షుడు శ్రీ చంద్రశేఖర్‌ గారి నేతృత్వంలో ప్రతినిధులు బుధవారం మధ్యాహ్నం హైడ్రా కార్యాలయంలో కమిషనర్‌ శ్రీ ఏవీ రంగనాథ్‌ గారిని కలిసి చర్చించారు.

ప్యూర్ ప్రాంతం నుంచి సరఫరా..
🔶సంబంధిత శాఖల నుంచి అవసరమైన అనుమతులు పొందిన అనంతరం PURE (Peri Urban Region) ప్రాంతం నుంచే బోరు నీటిని సేకరించి ట్యాంకర్ల ద్వారా సరఫరా చేసేందుకు సంఘం సభ్యులు అంగీకరించారు. ఇకపై తమ ట్యాంకర్‌ వ్యాపార కార్యకలాపాలన్నీ PURE ప్రాంతం నుంచే నిర్వహిస్తామని వాటర్ ట్యాంకర్ల యజమానులు తెలిపారు. హైదరాబాద్‌ నగరం అత్యంత జనసాంద్రత కలిగిన ప్రాంతం కావడంతో పాటు ఎల్‌నినో ప్రభావం, తగినంత వర్షపాతం లేకపోవడం వంటి కారణాలతో భూగర్భ జలమట్టాలు గణనీయంగా పడిపోయాయి. ఈ పరిస్థితుల్లో నగరంలోని జనసాంద్రత ఎక్కువగా ఉన్న ప్రాంతాల్లో వాణిజ్య అవసరాల కోసం పెద్ద ఎత్తున భూగర్భ జలాలను తోడటం వల్ల స్థానిక నివాసితుల గృహ అవసరాలకు వినియోగించే బోర్లు ఎండిపోయే పరిస్థితి ఏర్పడుతోంది. మాదాపూర్‌, గచ్చిబౌలి, కూకట్‌పల్లి, అమీర్‌పేట, అశోక్‌నగర్‌ వంటి ప్రాంతాల్లో నీటికి డిమాండ్‌ ఎక్కువగా ఉండటంతో ట్యాంకర్ల నిర్వాహకులు రవాణా దూరం, ఇంధన ఖర్చులను తగ్గించుకునేందుకు ఆయా ప్రాంతాలకు సమీపంలోని బోర్ల నుంచి నీటిని సేకరిస్తున్నారు. దీంతో ఆయా ప్రాంతాల్లో భూగర్భ జలాలపై తీవ్ర ఒత్తిడి ఏర్పడుతోంది. సాధారణంగా గృహ అవసరాల కోసం వేసే బోర్లు 100 నుంచి 300 అడుగుల లోతు వరకు ఉంటుండగా, వాణిజ్య అవసరాల కోసం కొందరు 1,000 నుంచి 1,500 అడుగులు లేదా అంతకంటే ఎక్కువ లోతులో బోర్లు వేసి, అధిక సామర్థ్యం కలిగిన మోటార్లతో నీటిని తోడుతున్నారు. దీనివల్ల భూగర్భ జలాలపై మరింత ప్రభావం పడుతోందనీ హైడ్రా కమిషనర్ శ్రీ ఏవీ రంగనాథ్ గారు వాళ్ళకు వివరించారు.

-స్థానికుల నిరసనలు, ఫిర్యాదుల నేపథ్యంలో...
🔶ఈ సమస్యపై పలు కాలనీల సంక్షేమ సంఘాలు, స్థానిక ప్రజల నుంచి హైడ్రాకు ఫిర్యాదులు అందాయి. తెల్లాపూర్‌ ప్రాంతంలో వాణిజ్య అవసరాల కోసం నీటిని తోడటాన్ని నిలిపివేయాలని స్థానికులు రోడ్డెక్కి నిరసన తెలిపారు. సూరారం, జీడిమెట్ల ప్రాంతాల ప్రజలు తమ ఇళ్లలోని బోర్లలో నీరు అడుగంటిపోతోందని హైడ్రా కార్యాలయానికి వచ్చి ఫిర్యాదు చేశారు. ప్రజల ఫిర్యాదులపై స్పందించిన హైడ్రా రెవెన్యూ, పోలీసు, మున్సిపల్‌, భూగర్భ జలాల శాఖల సమన్వయంతో చర్యలు చేపట్టింది. చెరువుల నుంచి వాణిజ్య అవసరాల కోసం నీటిని తోడుతున్న బోర్లను గుర్తించి తొలగించే చర్యలు కూడా చేపట్టింది. నగరంలోని జనసాంద్రత అధికంగా ఉన్న, నీటి డిమాండ్‌ ఎక్కువగా ఉండే ప్రాంతాల్లో భూగర్భ జలాలను పెద్ద ఎత్తున వాణిజ్య అవసరాలకు వినియోగించకుండా నియంత్రించేందుకు వాటర్‌ బోర్డు, రెవెన్యూ, పోలీసు తదితర శాఖలతో కలిసి హైడ్రా సమన్వయంతో పనిచేసిందని హైడ్రా కమిషనర్ చెప్పారు. అదే సమయంలో వాణిజ్య సంస్థలకు నీటి సరఫరాలో ఎలాంటి అంతరాయం కలగకుండా అవసరమైన చర్యలు తీసుకుంటూ, ప్రజల గృహ అవసరాలకు నీటి లభ్యతను కాపాడేందుకు కృషి చేయనుందన్నారు.

#HYDRAA #WaterTankersStrike #WaterSupply #WaterTankers #PURERegion #GroundwaterConservation

— HYDRAA (@Comm_HYDRAA) November 4, 2026