Hyderabad Police | అర్ధ‌రాత్రి వేళ‌ మానవత్వాన్ని చాటుకున్న కామాఠిపుర పోలీసులు

Hyderabad Police | త్రినేత్ర‌.న్యూస్‌: హైదరాబాద్ కామాఠిపుర పోలీసులు (Hyderabad Police) మాన‌వ‌త్వాన్ని చాటుకున్నారు. అర్ధ‌రాత్రి వేళ వివ‌స్త్ర‌గా తిరుగుతున్న మ‌హిళ‌ల‌కు దుస్తులు అందించ‌డ‌మే కాకుండా ఆశ్ర‌యం క‌ల్పించారు. ఈ ఘ‌ట‌న బహదూర్‌పురా ఎక్స్ రోడ్డు (బక్రీద్ చెక్ పోస్ట్) వద్ద చోటుచేసుకున్న‌ది. బుధ‌వారం అర్ధరాత్రి సమయంలో బహదూర్‌పురా ఎక్స్ రోడ్డు వద్ద ఒక మహిళ దుస్తులు లేకుండా తిరుగుతుండ‌టాన్ని కామాఠిపుర చెక్‌పోస్టు పోలీసులు గుర్తించారు. దుకాణాలు తెరిచి లేక‌పోవ‌డంతో కామాఠిపుర ఇన్‌స్పెక్ట‌ర్ ప్రసాద్ రావు తక్షణమే స్పందించారు. ఆమె గౌరవాన్ని కాపాడేందుకు తన పోలీస్ యూనిఫామ్ షర్టును, పంచను ధరింపజేశారు. ఎలాంటి అవాంఛనీయ సంఘటన జరుగ‌కుండా చెక్ పోస్ట్ వద్దే ఆశ్రయం కల్పించి అండగా నిలిచారు.

ఈ ఆపరేషన్‌లో రాజేంద్రనగర్ ఏసీపీ (NZO) కిషోర్ గారి పర్యవేక్షణలో కామాఠిపుర ఎస్‌హెచ్‌వో బీ ప్రసాద్ రావు, ఏఎస్ఐ అన్వర్ హుస్సేన్, కానిస్టేబుల్ సుమన్ పాల్గొని మానవత్వాన్ని చాటుకున్నారు. అర్ధరాత్రి వేళ సమయస్ఫూర్తితో స్పందించి, మహిళా రక్షణకు కట్టుబడి ఉన్న కామాఠిపుర పోలీసుల చొరవను,సేవా గుణాన్ని ఆ మార్గంలో వెళ్తున్న వాహనదారులు, స్థానిక ప్రజలు అభినందించారు. శాంతిభద్రతల పరిరక్షణతో పాటు సామాజిక బాధ్యతను, మానవ విలువలను కాపాడటంలో కామాఠిపుర పోలీసులు ఎల్లప్పుడూ ముందుంటారని ప్ర‌సాద్ రావు తెలిపారు.