Hyderabad Cyber Crime Police | 9 రాష్ట్రాల్లో హైదరాబాద్ పోలీసుల మెరుపు దాడులు: 35 మంది సైబర్ నేరగాళ్ల అరెస్ట్.. రూ.88 లక్షలు రికవర్

Hyderabad Cyber Crime Police | త్రినేత్ర న్యూస్ : సైబర్ నేరగాళ్ల ఆటకట్టించేందుకు హైదరాబాద్ సిటీ సైబర్ క్రైమ్ పోలీసులు దేశవ్యాప్తంగా భారీ ఆపరేషన్ నిర్వహించారు. సెప్టెంబర్ 2026 నెలలో నేషనల్ సైబర్ క్రైమ్ రిపోర్టింగ్ పోర్టల్ (NCRP) ఫిర్యాదులపై మెరుపు వేగంతో స్పందించి, మొత్తం 83 ఎఫ్‌ఐఆర్‌లు నమోదు చేశారు. దేశంలోని 9 విభిన్న రాష్ట్రాల్లో విస్తృత దాడులు చేపట్టి 23 కీలక కేసుల్లో 35 మంది సైబర్ కేటుగాళ్లను కటకటాల్లోకి నెట్టారు. అంతేకాకుండా నేరగాళ్ల ఖాతాల్లో ఫ్రీజ్ చేసిన రూ.88,48,134 నగదును బాధితులకు తిరిగి ఇప్పించి రికార్డు విజయం సాధించారు.

9 రాష్ట్రాల్లో దాడులు.. షెల్ కంపెనీల గుట్టురట్టు

అరెస్టయిన 35 మందిలో సోషల్ మీడియా నేరాలకు సంబంధించి 9 మంది, ఇన్వెస్ట్‌మెంట్ ఫ్రాడ్‌లో 7, డిజిటల్ అరెస్ట్ కేసుల్లో 6, ట్రేడింగ్ ఫ్రాడ్‌లో 5 మందితో పాటు జాబ్, అడ్వర్టైజ్‌మెంట్ మోసాలకు పాల్పడిన వారు ఉన్నారు. తెలంగాణ (10), ఆంధ్రప్రదేశ్ (9), మహారాష్ట్ర (6), కేరళ (3), యూపీ (3), బీహార్ (1), హర్యానా (1), రాజస్థాన్ (1), పంజాబ్ (1) రాష్ట్రాల నుంచి వీరిని అదుపులోకి తీసుకున్నారు. వీరి నుంచి 10 మొబైల్స్, 7 చెక్ బుక్కులు, నిధులు మళ్లించేందుకు వాడే షెల్ కంపెనీ సీల్ స్టాంప్‌ను స్వాధీనం చేసుకున్నారు.

బాధితులకు రూ.88 లక్షల నగదు వాపసు

వివిధ పద్ధతుల్లో బాధితులు నష్టపోయిన మొత్తాలను రికవర్ చేయడంలో పోలీసులు ప్రత్యేక చొరవ చూపారు.

ట్రేడింగ్ ఫ్రాడ్: 11 కేసుల్లో రూ.8.43 కోట్లకు పైగా మోసపోగా, రూ.40.24 లక్షలు రికవర్ చేశారు.

ఇన్వెస్ట్‌మెంట్ ఫ్రాడ్: 17 కేసుల్లో రూ.7.68 కోట్ల నష్టానికి గాను రూ.9.20 లక్షలు రిఫండ్ అయ్యాయి.

ఓటీపీ మోసాలు: 5 కేసుల్లో పోయిన రూ.23.71 లక్షలకు ఏకంగా రూ.24.68 లక్షల మొత్తాన్ని ఫ్రీజ్ చేసి ఇప్పించారు.

ఏపీకే ఫైల్, ప్రకటనలు, యూపీఐ ఫ్రాడ్స్: మిగిలిన కేసుల్లోనూ వేగంగా స్పందించి నగదును రికవర్ చేశారు.

మొత్తంగా రూ.17.34 కోట్ల నష్టానికి గాను ప్రాథమిక దశలోనే రూ.88.48 లక్షలను బాధితులకు జమ చేయించారు. జోనల్ సైబర్ సెల్స్ పరిధిలో మరో రూ.67.54 లక్షలను రికవర్ చేశారు.

డిజిటల్ అరెస్ట్ వేధింపులతో మహిళ మృతి.. పూణే నిందితుడి అరెస్ట్

ఈ ఆపరేషన్‌లో ఒక హృదయవిదారక కేసును పోలీసులు ఛేదించారు. హైదరాబాద్ మధురానగర్‌కు చెందిన ఓ యువకుడి తల్లి విదేశాల్లో ఉద్యోగం చేసేవారు. గుర్తుతెలియని వ్యక్తులు సీబీఐ, పోలీసుల పేరిట ఆమెకు వీడియో కాల్ చేసి 'డిజిటల్ అరెస్ట్' అంటూ బెదిరించారు. నకిలీ పత్రాలు చూపి రూ.6,60,543 కాజేశారు. ఈ మానసిక ఒత్తిడి తట్టుకోలేక ఆమె సెప్టెంబర్ 8న గుండెపోటుతో కన్నుమూశారు. ఆమె ఫోన్ పరిశీలించిన కుమారుడి ఫిర్యాదుతో రంగంలోకి దిగిన పోలీసులు, పూణేకు చెందిన శుభమ్ మోహన్ లొండే (27)ను గుర్తించి అరెస్ట్ చేశారు.

సోషల్ మీడియా పెట్రోలింగ్.. 140 అకౌంట్ల తొలగింపు

మైనర్లను అసభ్యకరంగా చూపిస్తూ వ్యూస్, లైకులు, మానిటైజేషన్ కోసం నడుపుతున్న 140 ప్రొఫైల్స్, 30 పెయిడ్ ప్రకటనలను గుర్తించి వాటిని సోషల్ మీడియా ప్లాట్‌ఫామ్‌ల నుంచి తొలగించారు (Take down). పాత నాణాలు, రూ.5 నోట్లు, రూ.786 నోట్ల మోసాలు, గ్యారెంటీ బెట్టింగ్ ప్రొఫైళ్లను బ్యాన్ చేయించారు. అక్రమ బెట్టింగ్, గేమింగ్ ప్రచారం చేస్తున్న 1,457 ప్రొఫైళ్లు, 2,603 యాడ్స్‌ను నిలిపివేసి 9 ఎఫ్‌ఐఆర్‌లు నమోదు చేశారు.

పోలీసుల అత్యవసర మార్గదర్శకాలు: వీటిని గుర్తుంచుకోండి

అదనపు పోలీస్ కమిషనర్ (క్రైమ్స్ & SIT) ఎమ్. శ్రీనివాసులు, ఐపీఎస్ ప్రజలకు కీలక సూచనలు చేశారు.

డిజిటల్ అరెస్ట్ అనేది అబద్ధం: భారతదేశ చట్టాల్లో 'డిజిటల్ అరెస్ట్' లేదా ఆన్‌లైన్ విచారణ అనే ప్రక్రియే లేదు. ఏ ప్రభుత్వ సంస్థా, పోలీసులూ ఆన్‌లైన్‌లో డబ్బులు డిమాండ్ చేయరు.

అధికారుల డీపీలు నమ్మొద్దు: ఐఏఎస్, ఐపీఎస్ అధికారుల ఫోటోలు పెట్టుకుని సహాయం అడిగితే మోసపోకండి.

టెలిగ్రామ్/వాట్సప్ టిప్స్ వద్దు: సెబీ (SEBI) గుర్తింపు లేని గ్రూపులు చెప్పే స్టాక్ ట్రేడింగ్, ఇన్వెస్ట్‌మెంట్లు 100% మోసం.

ఏపీకే ఫైల్స్ క్లిక్ చేయొద్దు: బ్యాంకులు ఎప్పుడూ వాట్సప్‌లో APK ఫైళ్లు పంపవు.

ఆన్‌లైన్ మోసానికి గురైన వెంటనే ఏమాత్రం ఆలస్యం చేయకుండా 1930 టోల్ ఫ్రీ నంబర్‌కు కాల్ చేయాలని లేదా cybercrime.gov.in లో వెంటనే ఫిర్యాదు చేస్తే గోల్డెన్ అవర్‌లో సొమ్మును సులభంగా రికవర్ చేయవచ్చని పోలీసులు తెలిపారు.

Also Read | పాలపిట్టలు పంజరాల్లో.. సింథ‌టిక్ మాంజాలు షాపుల్లో ఉండొద్దు