Amberpet Constable Suicide | అర్ధరాత్రి ఆ యువతికి వీడియో కాల్ చేసి కానిస్టేబుల్ ఆత్మహత్య.. అసలేం జరిగింది?

Amberpet Constable Suicide | త్రినేత్ర.న్యూస్ : హైదరాబాద్ నగరంలో విషాద ఘటన చోటుచేసుకుంది. అర్ధరాత్రి వేళ ఓ యువతికి వీడియో కాల్ మాట్లాడిన కాసేపటికే పోలీస్ కానిస్టేబుల్ ఉరివేసుకుని ప్రాణాలు తీసుకున్న ఘటన తీవ్ర కలకలం రేపింది. ఈ ఘటన మూసారాంబాగ్ పరిధిలోని శాలివాహన నగర్‌లో వెలుగుచూసింది.

మృతుడిని ముత్తె చంద్రశేఖర్ (35)గా పోలీసులు గుర్తించారు. ఆయన అంబర్‌పేట్ పోలీస్ హెడ్‌క్వార్టర్స్‌లో కానిస్టేబుల్ రైటర్‌గా విధులు నిర్వహిస్తున్నారు. మూసారాంబాగ్ శాలివాహన నగర్‌లోని తన నివాసంలో చంద్రశేఖర్ ఈ దారుణానికి ఒడిగట్టారు.

అర్ధరాత్రి వీడియో కాల్.. క్షణాల్లో అలెర్ట్ అయినా

వివరాల్లోకి వెళ్తే.. అర్ధరాత్రి సమయంలో చంద్రశేఖర్ ఓ యువతికి వాట్సాప్ వీడియో కాల్ చేశారు. ఆ కాల్‌లో మాట్లాడుతూ, తాను ఉరివేసుకుని బలవన్మరణానికి పాల్పడుతున్నట్లు ఆమెకు చెప్పారు. దీంతో తీవ్ర భయాందోళనకు గురైన ఆ యువతి ఏమాత్రం ఆలస్యం చేయకుండా వెంటనే చైతన్యపురి పోలీసులకు సమాచారం అందించారు.

సమాచారం అందుకున్న చైతన్యపురి పోలీసులు వెంటనే అధికార పరిధి గల మలక్‌పేట్ పోలీసులను అప్రమత్తం చేశారు. మలక్‌పేట్ పోలీస్ పెట్రోలింగ్ టీమ్ క్షణాల్లో చంద్రశేఖర్ ఇంటికి చేరుకుంది. అయితే పోలీసులు తలుపులు తెరిచి లోపలికి వెళ్లి చూసేసరికే ఆయన విగతజీవిగా వేలాడుతూ కనిపించారు.

కేసు నమోదు.. కారణాలపై పోలీసుల ఆరా

పోలీసులు చంద్రశేఖర్ మృతదేహాన్ని స్వాధీనం చేసుకుని పోస్టుమార్టం నిమిత్తం ఉస్మానియా ఆస్పత్రికి తరలించారు. ఈ ఘటనపై అనుమానాస్పద మృతిగా కేసు నమోదు చేసి దర్యాప్తు ప్రారంభించారు.

ఆ కానిస్టేబుల్ ఆత్మహత్యకు పాల్పడటానికి వ్యక్తిగత కారణాలు ఉన్నాయా లేక ప్రేమ వ్యవహారమా? కాల్ చేసిన యువతితో ఆయనకు ఉన్న సంబంధం ఏంటి? అనే కోణాల్లో పోలీసులు ఫోన్ కాల్ డేటా, చాటింగ్‌లను పరిశీలిస్తున్నారు. పూర్తి వివరాలు విచారణ అనంతరం తెలిసే అవకాశం ఉంది.