Hyderabad City Police Hosts Grand Dawat-e-Iftar | చౌమొహల్లా ప్యాలెస్‌లో పోలీసుల ‘దావత్-ఎ-ఇఫ్తార్’ విందు.. హాజరైన మంత్రులు

Hyderabad City Police Hosts Grand Dawat-e-Iftar | త్రినేత్ర.న్యూస్ : పవిత్ర రంజాన్ మాసాన్ని పురస్కరించుకుని హైదరాబాద్ సిటీ పోలీసుల ఆధ్వర్యంలో గురువారం సాయంత్రం చారిత్రక చౌమొహల్లా ప్యాలెస్‌లో 'దావత్-ఎ-ఇఫ్తార్' విందును అత్యంత వైభవంగా నిర్వహించారు. నగరంలోని మత సామరస్యాన్ని, సోదరభావాన్ని చాటిచెప్పేలా సాగిన ఈ వేడుకకు పలువురు రాజకీయ ప్రముఖులు, ఉన్నత అధికారులు, మత పెద్దలు హాజరయ్యారు.

ముఖ్య అతిథులుగా మంత్రులు

ఈ కార్యక్రమంలో రాష్ట్ర మంత్రులు పొన్నం ప్రభాకర్, మహమ్మద్ అజారుద్దీన్ ముఖ్య అతిథులుగా పాల్గొన్నారు. వారితో పాటు ఎంపీ అసదుద్దీన్ ఒవైసీ, డీజీపీ శివధర్ రెడ్డి, హైదరాబాద్ పోలీస్ కమిషనర్ వీసీ సజ్జనర్, నేషనల్ పోలీస్ అకాడమీ డైరెక్టర్ అమిత్ గార్గ్, పీస్ కమిటీ ప్రతినిధులు ఈ విందులో భాగస్వాములయ్యారు.

మత సామరస్యమే నగర ప్రత్యేకత

మంత్రి పొన్నం ప్రభాకర్ మాట్లాడుతూ.. హైదరాబాద్ నగరానికి ముస్లిం సంస్కృతి ఒక ప్రత్యేక గుర్తింపునిచ్చిందని, ఇక్కడి మత సామరస్యం యావత్ దేశానికి ఆదర్శమని కొనియాడారు. రంజాన్ మాసం సమాజంలో సోదరభావాన్ని మరింత పెంపొందిస్తుందని, శాంతిభద్రతల పరిరక్షణే ప్రభుత్వ ప్రథమ ప్రాధాన్యతని స్పష్టం చేశారు.

మంత్రి మహమ్మద్ అజారుద్దీన్ మాట్లాడుతూ.. భిన్న సంస్కృతుల కలయికకు హైదరాబాద్ నిలయమని పేర్కొన్నారు. రంజాన్ మాసంలో ముస్లిం సోదరులు ప్రశాంతంగా ప్రార్థనలు చేసుకునేలా పోలీస్ యంత్రాంగం అందిస్తున్న సహకారం అభినందనీయమని కొనియాడారు.

ప్రజల హృదయాల్లో పోలీస్ వ్యవస్థ

డీజీపీ బి. శివధర్ రెడ్డి మాట్లాడుతూ.. ప్రతి ఏటా పోలీస్ విభాగం నిర్వహించే ఈ ఇఫ్తార్ విందు నగర విశిష్ట సంప్రదాయాలను చాటిచెబుతుందన్నారు. నగర అభివృద్ధిలో భాగంగా చారిత్రక వైభవాన్ని ప్రతిబింబించేలా పోలీస్ డివిజన్ల పేర్లను మార్చడం జరిగిందని ఆయన వెల్లడించారు.

పోలీసులకు, సమాజానికి మధ్య నమ్మకం

నగర పోలీస్ కమిషనర్ వీసీ సజ్జనర్ మాట్లాడుతూ.. రంజాన్ మాసం ఓర్పు, క్రమశిక్షణ, మానవీయ విలువలను నేర్పుతుందన్నారు. ప్రజలతో మమేకమై పనిచేయడమే లక్ష్యమని, ఇటువంటి కార్యక్రమాలు పోలీసులకు మరియు సమాజానికి మధ్య నమ్మకాన్ని, సహకారాన్ని మరింత బలోపేతం చేస్తాయని ఆకాంక్షించారు.

ఈ వేడుకలో ముస్లిం సోదరులు ప్రత్యేక ప్రార్థనలు నిర్వహించి, అందరూ కలిసి ఇఫ్తార్ విందును ఆస్వాదించారు. ప్యాలెస్ ప్రాంగణం అంతా రంజాన్ వెలుగులతో, సోదరభావంతో విరాజిల్లింది.