Nagole Missing Boys | నాగోల్‌లో ఇద్దరు చిన్నారుల మిస్సింగ్ కేసు.. 9 రోజులైనా దొరకని ఆచూకీ, రూ.20 వేల రివార్డ్!

Nagole Missing Boys | త్రినేత్ర న్యూస్ : హైదరాబాద్ ఎల్బీనగర్ పరిధిలోని నాగోల్‌లో ఇద్దరు చిన్నారుల మిస్సింగ్ కేసు తీవ్ర కలకలం రేపుతోంది. నాగోల్ సాయిరాం నగర్‌కు చెందిన వరుణ్ తేజ్ (8), మహేష్ (6) అనే ఇద్దరు అన్నదమ్ములు అక్టోబర్ 31వ తేదీ ఉదయం 8:30 గంటలకు ఇంటి నుంచి బయటకు వెళ్లి తిరిగి రాలేదు.

చిన్నారులు కనిపించకుండా పోయి తొమ్మిది రోజులు గడుస్తున్నా ఇప్పటివరకు వారి ఆచూకీ తెలియకపోవడంతో తల్లిదండ్రులు తీవ్ర ఆందోళనలో మునిగిపోయారు. కుటుంబ సభ్యుల ఫిర్యాదుతో మిస్సింగ్ కేసు నమోదు చేసిన నాగోల్ పోలీసులు దర్యాప్తును మరింత ముమ్మరం చేశారు.

పిల్లల జాడ కనిపెట్టేందుకు పోలీసులు 5 స్పెషల్ టీమ్స్‌ను ఏర్పాటు చేసి వివిధ ప్రాంతాల్లో విస్తృతంగా తనిఖీలు నిర్వహిస్తున్నారు. సాయిరాం నగర్‌తో పాటు చుట్టుపక్కల ప్రాంతాల్లోని సీసీటీవీ కెమెరాల ఫుటేజీని క్షుణ్ణంగా పరిశీలిస్తూ చిన్నారుల కదలికలపై ఆరా తీస్తున్నారు.

రూ.20 వేల క్యాష్ రివార్డ్ ప్రకటన

ఐదు ప్రత్యేక బృందాలు గాలిస్తున్నప్పటికీ ఇప్పటివరకు ఎలాంటి క్లూ లభించకపోవడంతో పోలీసులు కీలక ప్రకటన చేశారు. వరుణ్ తేజ్, మహేష్ ఆచూకీ తెలిపిన వారికి రూ.20 వేల క్యాష్ రివార్డ్ అందిస్తామని వెల్లడించారు.

సమాచారం ఇవ్వాల్సిన ఫోన్ నంబర్లు

ఈ ఇద్దరు చిన్నారులు ఎవరికైనా కనిపించినా లేదా వారి గురించి ఎలాంటి సమాచారం తెలిసినా వెంటనే కింది ఫోన్ నంబర్లకు కాల్ చేయాలని పోలీసులు కోరారు.

8790968873

8712662723

7569078160

8185886495

9550497857

చిన్నారుల ఫొటోలను సోషల్ మీడియా గ్రూపుల్లో వీలైనంత ఎక్కువ మందికి షేర్ చేసి, వారు క్షేమంగా తల్లిదండ్రుల చెంతకు చేరేలా ప్రతి ఒక్కరూ సహకరించాలని పోలీసులు విజ్ఞప్తి చేస్తున్నారు.