Med Plus | మెడ్‌ప్ల‌స్‌లో బంగారు న‌గ‌లు మాయం..

Med Plus | త్రినేత్ర న్యూస్ : ఏఎస్ రావు న‌గ‌ర్‌లోని మెడ్‌ప్ల‌స్ డ‌యాగ్నోస్టిక్ సెంట‌ర్‌లో ఓ మ‌హిళా రోగి బంగారు న‌గ‌లు మాయం అయ్యాయి. దీంతో బాధిత మ‌హిళ కుషాయిగూడ పోలీసుల‌కు ఫిర్యాదు చేసింది. కేసు న‌మోదు చేసుకున్న పోలీసులు ద‌ర్యాప్తు చేప‌ట్టారు.

అస‌లేం జ‌రిగిందంటే..?

కుషాయిగూడ పీఎస్ ప‌రిధిలోని ఓ మ‌హిళ వైద్య ప‌రీక్ష‌ల నిమిత్తం ఏఎస్ రావు న‌గ‌ర్‌లోని మెడ్‌ప్ల‌స్ డ‌యాగ్నోస్టిక్ సెంట‌ర్‌కు గురువారం ఉద‌యం వెళ్లింది. ఇక టెస్టులు చేసే క్ర‌మంలో ఒంటి మీద ఉన్న బంగారు న‌గలు తీయాల‌ని అక్క‌డున్న సిబ్బంది ఆమెకు సూచించారు. దీంతో ఆమె బంగారం తీసి.. త‌న బ్యాగులో పెట్టేసింది. వైద్య ప‌రీక్ష‌ల అనంత‌రం ఆమె త‌న బ్యాగును తీసుకుని ఇంటికి వ‌చ్చింది.

సీన్ క‌ట్ చేస్తే.. బ్యాగులో ఉన్న 40 గ్రాముల‌ బంగారు న‌గ‌లు మాయమ‌య్యాయి. దీంతో బాధితురాలు ల‌బోదిబోమ‌నుకుంటూ.. కుషాయిగూడ పోలీసుల‌కు ఫిర్యాదు చేసింది. కేసు న‌మోదు చేసుకున్న పోలీసులు ద‌ర్యాప్తు చేప‌ట్టారు. మెడ్‌ప్ల‌స్ డ‌యాగ్నోస్టిక్ సెంట‌ర్‌లో ఉన్న సీసీటీవీ కెమెరాల‌ను పోలీసులు ప‌రిశీలిస్తున్నారు.