GHMC Commissioner RV Karnan | ‘ప్రతి ఇంటి నుంచి చెత్త సేకరించాల్సిందే’.. అధికారులకు జీహెచ్ఎంసీ కమిషనర్ ఆదేశాలు

GHMC Commissioner RV Karnan | త్రినేత్ర.న్యూస్ : గ్రేటర్ హైదరాబాద్ నగరంలో పారిశుద్ధ్య నిర్వహణను మరింత కట్టుదిట్టం చేసేందుకు జీహెచ్ఎంసీ కమిషనర్ ఆర్.వి.కర్ణన్ బుధవారం స్వయంగా రంగంలోకి దిగారు. జోనల్ కమిషనర్ రవి కిరణ్‌తో కలిసి నగరంలోని పలు ప్రాంతాల్లో పారిశుద్ధ్య తనిఖీలు చేపట్టారు. ఈసందర్భంగా కమిషనర్ ఆర్.వి.కర్ణన్ తన పర్యటనను ఇందిరా పార్క్ (గాంధీ నగర్) నుంచి ప్రారంభించి సికింద్రాబాద్ రైల్వే స్టేషన్ వరకు కొనసాగించారు. ఈ క్రమంలో సురభి పార్క్, పీ అండ్ టీ కాలనీ, గాంధీ నగర్ డివిజన్, కవాడిగూడ తదితర ప్రాంతాల్లో పారిశుద్ధ్య పనులను ఆయన నిశితంగా పరిశీలించారు. ప్రధానంగా రోడ్లు, జంక్షన్లు, పబ్లిక్ పార్కులలో పరిశుభ్రత ఏ విధంగా ఉందనే అంశాన్ని క్షేత్రస్థాయిలో చెక్ చేశారు.

స్వచ్ఛ ఆటోల హాజరుపై ఆరా

నగరంలో డోర్-టు-డోర్ (ఇంటింటికీ) చెత్త సేకరణ సక్రమంగా జరుగుతుందా లేదా అన్నదానిపై కమిషనర్ దృష్టి పెట్టారు. క్షేత్రస్థాయిలో స్వచ్ఛ ఆటోల హాజరును, కార్మికుల పనితీరును ఆయన పరిశీలించారు. గ్రేటర్ హైదరాబాద్‌ను పరిశుభ్ర నగరంగా ఉంచేందుకు పారిశుద్ధ్య కార్మికులు నిరంతరం అప్రమత్తంగా ఉండాలని ఆయన సూచించారు.

అధికారులకు కఠిన ఆదేశాలు

పారిశుద్ధ్య పర్యవేక్షణలో ఏమాత్రం అలక్ష్యాన్ని సహించేది లేదని కమిషనర్ ఆర్.వి.కర్ణన్ హెచ్చరించారు. అధికారులకు ఆయన జారీ చేసిన కీలక ఆదేశాలు ఇవే.

డోర్-టు-డోర్ సేకరణ: ప్రతి రోజూ ప్రతి ఇంటి నుండి తప్పనిసరిగా చెత్తను సేకరించాలి. దీనిని డిప్యూటీ కమిషనర్లు, సాలిడ్ వేస్ట్ మేనేజ్మెంట్ అధికారులు నిరంతరం పర్యవేక్షించాలి.

పరిశుభ్రతపై ఫోకస్: ప్రజలు ఎక్కువగా తిరిగే జంక్షన్లు, రహదారులు, పార్కులు ఎప్పుడూ శుభ్రంగా ఉండేలా చూడాలి.

నిరంతర పర్యవేక్షణ: పారిశుద్ధ్య నిర్వహణలో ఎక్కడా లోపాలు తలెత్తకుండా డీఈఈ, ఏఈ స్థాయి అధికారులు క్షేత్రస్థాయిలో పర్యవేక్షించాలి.

"గ్రేటర్ హైదరాబాద్ నగరాన్ని పరిశుభ్రంగా తీర్చిదిద్దడం మనందరి బాధ్యత. పారిశుద్ధ్య పనులలో ఎటువంటి నిర్లక్ష్యం వహించినా కఠిన చర్యలు తప్పవు" అని కమిషనర్ ఈ సందర్భంగా స్పష్టం చేశారు.