Congress MLA Anirudh Reddy | “నాలుక జాగ్రత్త పవన్.. కావాలంటే గుజరాత్‌లో పార్టీ పెట్టుకో!” పవన్ కళ్యాణ్‌పై కాంగ్రెస్ ఎమ్మెల్యే ఫైర్

Congress MLA Anirudh Reddy | త్రినేత్ర.న్యూస్ : జడ్చర్ల (Jadcherla) కాంగ్రెస్ ఎమ్మెల్యే అనిరుధ్ రెడ్డి ఏపీ డిప్యూటీ సీఎం, జనసేనాని పవన్ కళ్యాణ్‌పై (Pawan Kalyan) తీవ్రస్థాయిలో ధ్వజమెత్తారు. పవన్ ఇటీవల తెలంగాణను ఉద్దేశించి చేసిన వ్యాఖ్యలపై మండిపడ్డ ఆయన.. తెలంగాణ ప్రజల సెంటిమెంట్‌తో ఆడుకుంటే తగిన బుద్ధి చెబుతామని స్ట్రాంగ్ వార్నింగ్ ఇచ్చారు. కోనసీమకు తెలంగాణ ప్రజల దిష్టి తగిలిందంటూ ఆయన చేసిన వ్యాఖ్యలకు తక్షణమే క్షమాపణలు చెప్పాలని డిమాండ్ చేశారు.

గుజరాత్‌లో పార్టీ పెట్టుకో

పవన్ కళ్యాణ్‌ రాజకీయాలు తెలంగాణలో (Telangana) చెల్లవని అనిరుధ్ రెడ్డి స్పష్టం చేశారు. బీజేపీని (BJP), అమిత్ షాను మెప్పించడానికే పవన్ ఇక్కడ రాజకీయం చేస్తున్నారని విమర్శించారు. "నీకు పార్టీ పెట్టుకుని పోటీ చేయాలని ఉంటే వెళ్లి గుజరాత్‌లో పెట్టుకో.. ఎవరూ వద్దనరు. కానీ ఏపీలో (AP) గెలిచిన నువ్వు, డిప్యూటీ సీఎంగా అక్కడ ఎన్ని రోజులు ఉంటున్నావు? హైదరాబాద్‌లో ఎన్ని రోజులు ఉంటున్నావు?" అంటూ సూటిగా ప్రశ్నించారు. ఏపీలో వచ్చేసారి మళ్లీ అధికారం దక్కదన్న భయంతోనే, తెలంగాణలో అడుగుపెడుతున్నారని ఆయన ఆరోపించారు. తెలంగాణపై నిజంగా అంత ప్రేమ ఉంటే గత 12 ఏళ్లుగా ఎక్కడికి పోయావని అనిరుధ్ నిలదీశారు.

నేను ఫస్ట్ టైమే గెలిచా

పవన్ గురించి మాట్లాడే స్థాయి తనకు లేదని కొందరు చేస్తున్న విమర్శలకు అనిరుధ్ రెడ్డి గట్టి కౌంటర్ ఇచ్చారు. "నేను జడ్చర్లలో పోటీ చేసిన మొదటిసారే ఎమ్మెల్యేగా గెలిచాను. పవన్ లాగా రెండు చోట్ల పోటీ చేసి ఓడిపోలేదు" అని చురకలంటించారు. అంతేకాకుండా, పవన్ అన్న చిరంజీవి (Chiranjeevi) అప్పట్లో తన ప్రజారాజ్యం పార్టీని కాంగ్రెస్‌లో విలీనం చేస్తేనే, ఆయనను రాజ్యసభకు పంపి కేంద్ర మంత్రి పదవి ఇచ్చామని గుర్తుచేశారు.

డిప్రెషన్‌లో ఉన్నారు

పవన్ నటిస్తున్న సినిమాలు 'ఓజీ' (OG), 'ఉస్తాద్ భగత్ సింగ్' ఫ్లాప్ అయ్యాయని, ఆ డిప్రెషన్‌లో (Depression) ఉండిపోయిన పవన్ ఇలాంటి వ్యాఖ్యలు చేస్తున్నారని అనిరుధ్ రెడ్డి ఎద్దేవా చేశారు. పవన్‌ తీరును చూసి ఇతర సినీ నటులు కూడా సిగ్గుపడుతున్నారని వ్యాఖ్యానించారు. నరదిష్టి పేరుతో తెలంగాణ ప్రజలను అవమానించిన పవన్.. ఇకపై తెలంగాణ గురించి మాట్లాడేటప్పుడు నాలుక అదుపులో పెట్టుకోవాలని హెచ్చరించారు. దేవుడికి (కొండగట్టు అంజన్న) విరాళంగా ఇచ్చిన పైసల గురించి కూడా గొప్పలు చెప్పుకోవడం దారుణమన్నారు.

జన్వాడ భూమిపై సంచలన ఆరోపణలు

జన్వాడలో (Janwada) పవన్ ఫామ్‌హౌస్ వివాదంపై కూడా ఎమ్మెల్యే అనిరుధ్ స్పందించారు. పవన్ ఆక్రమించిన ఆ స్థలం.. ఒకప్పుడు ఒక పంట పండే చెరువు శిఖం, అసైన్డ్ భూమి అని ఆయన సంచలన ఆరోపణలు చేశారు. ఆ భూమిలోకి ఎవరినీ రానివ్వకుండా కేసులు పెడతామని బెదిరించడం ఎంతవరకు కరెక్ట్ అని ఆయన ప్రశ్నించారు. రెచ్చగొట్టి రాజకీయాలు చేయాలని చూస్తే పరిణామాలు తీవ్రంగా ఉంటాయని కాంగ్రెస్ ఎమ్మెల్యే హెచ్చరించారు.