Malreddy Ranga Reddy | ఆ ఎమ్మెల్యేకు గుడ్ టచ్ ఏదో.. బ్యాడ్ టచ్ ఏదో కాస్త నేర్పించడయ్యా

• ఎమ్మెల్యేకు భరోసా సెంటర్‌లో ట్రైనింగ్ ఇవ్వాలి
• మల్‌రెడ్డి వీడియో కేసుపై ఆర్ఎస్ ప్రవీణ్ కుమార్ సంచలన ట్వీట్

Malreddy Ranga Reddy | త్రినేత్ర న్యూస్ : ఇబ్రహీంపట్నం కాంగ్రెస్ ఎమ్మెల్యే మల్‌రెడ్డి రంగారెడ్డి ఆర్టీసీ బస్సులో ప్రయాణించిన సమయంలో చోటుచేసుకున్న ఓ ఉదంతం ఇప్పుడు తెలంగాణ రాజకీయాల్లో తీవ్ర దుమారం రేపుతోంది. విద్యార్థినులతో ఎమ్మెల్యే అసభ్యంగా ప్రవర్తించారంటూ ఒక వీడియో సామాజిక మాధ్యమాల్లో వైరల్ కావడం, ఆ వీడియో పోస్ట్ చేసిన వారిపై పోలీసులు కేసులు నమోదు చేయడం తీవ్ర చర్చనీయాంశంగా మారింది. ఈ పరిణామంపై బీఆర్ఎస్ సీనియర్ నేత ఆర్.ఎస్. ప్రవీణ్ కుమార్ సోషల్ మీడియా వేదికగా నిప్పులు చెరిగారు.

"నిజానికి ఎమ్మెల్యే గారి ఆగడాలను బయటకు తీసుకొచ్చినందుకు ఆ యువకులకు ‘మహిళా మిత్ర’ అవార్డు ఇచ్చి సత్కరించాలి, షీ టీమ్స్‌లోకి తీసుకోవాలి" అంటూ ప్రవీణ్ కుమార్ వ్యాఖ్యానించారు. పోలీసులు కేసు నమోదు చేయాల్సింది ఎమ్మెల్యే మీదేనని, ఆయన్ను జైలుకు పంపకపోయినా కనీసం భరోసా సెంటర్‌కు తీసుకెళ్లి 'గుడ్ టచ్ - బ్యాడ్ టచ్' పై శిక్షణ ఇవ్వాలంటూ ఘాటుగా చురకలంటించారు. పోలీసు వ్యవస్థ ఇంతలా దిగజారిపోయిందా అంటూ ఆయన ఆవేదన వ్యక్తం చేశారు.

అసలు వివాదం ఏమిటి?

మహిళలకు ఉచిత బస్సు ప్రయాణం కల్పిస్తున్న 'మహాలక్ష్మి' పథకం అమలు తీరును పరిశీలించేందుకు ఎమ్మెల్యే మల్‌రెడ్డి రంగారెడ్డి బొంగుళూరు ఓఆర్‌ఆర్ వద్ద బస్సు ఎక్కారు. ఈ క్రమంలో బస్సులోని విద్యార్థినులతో ఆయన మాట్లాడారు. అయితే, బస్సు సర్కిల్ వద్ద మలుపు తిరుగుతున్న సమయంలో రికార్డయిన విజువల్స్‌ను వక్రీకరించి, ఎమ్మెల్యే విద్యార్థినుల పట్ల అనుచితంగా ప్రవర్తించినట్లు కొందరు సోషల్ మీడియాలో తప్పుడు ప్రచారం చేశారని ఇబ్రహీంపట్నం నియోజకవర్గ యూత్ కాంగ్రెస్ అధ్యక్షుడు వెదిరె సికిందర్ రెడ్డి పోలీసులకు ఫిర్యాదు చేశారు.

యూత్ కాంగ్రెస్ ఇచ్చిన ఫిర్యాదు ఆధారంగా ఇబ్రహీంపట్నం పోలీసులు అక్టోబర్ 7న క్రైమ్ నంబర్ 703/2026 కింద భారతీయ న్యాయ సంహిత (BNS) సెక్షన్లు 353(2), 336(4), 79 r/w 3(5), ఐటీ యాక్ట్ సెక్షన్ 67 కింద కేసు నమోదు చేశారు. సోషల్ మీడియాలో పోస్టులు పెట్టిన ఖాతాలు, వాటి మూలాలపై పోలీసులు దర్యాప్తు ప్రారంభించారు.

పోలీసులు ఎమ్మెల్యే తరఫున నిలబడి ప్రశ్నించిన వారిపై కేసులు పెడుతున్నారని విపక్షాలు ఆరోపిస్తుండగా, పథకం మైలేజ్ తట్టుకోలేక కావాలనే వీడియోను ఎడిట్ చేసి ఎమ్మెల్యే వ్యక్తిగత ప్రతిష్టను దిగజార్చే కుట్ర చేస్తున్నారని కాంగ్రెస్ శ్రేణులు వాదిస్తున్నాయి. ప్రస్తుతం ఈ వీడియో రాజకీయ వర్గాల్లో తీవ్ర వాదోపవాదాలకు దారితీస్తోంది.

నిజానికి ఎమ్మెల్యే గారి ఆగడాలను బయటికి తీసుకొచ్చినందుకు ఈ యువకులకు ‘మహిళా మిత్ర’ అవార్డు ఇచ్చి సత్కరించాలి. SHE Teams లోకి తీసుకోవాలి.

నిజానికి కేసు పెట్టాల్సింది ఎమ్మెల్యే రంగారెడ్డి గారి మీద. ఆయన్ను జైలుకు పంపకపోయినా కనీసం భరోసా సెంటర్ లో గుడ్ టచ్ బ్యాడ్ టచ్ మీద ట్రైనింగ్ ఇవ్వాలి కదా..

ఎట్ల దిగజారిపోయింది పోలీసు వ్యవస్థ!

— Dr.RS Praveen Kumar (@RSPraveenSwaero) October 8, 2026