GHMC Elections | జీహెచ్ఎంసీ ఎన్నిక‌లు.. బీసీల‌కు 122 డివిజ‌న్లు..!

GHMC Elections | త్రినేత్ర‌.న్యూస్ : గ్రేట‌ర్ హైద‌రాబాద్ మున్సిప‌ల్ కార్పొరేష‌న్‌(జీహెచ్ఎంసీ) ఎన్నిక‌లకు సంబంధించిన ప్ర‌క్రియ‌ను మున్సిప‌ల్ శాఖ వేగ‌వంతం చేసింది. 2011 జ‌నాభా లెక్క‌ల ప్ర‌కారం, బీసీ డెడికేష‌న్ క‌మిష‌న్ రిపోర్టు ఆధారంగా జీహెచ్ఎంసీ ప‌రిధిలోని మొత్తం 300 డివిజ‌న్ల‌కు రిజ‌ర్వేష‌న్ల‌ను ఖ‌రారు చేశారు. బీసీల‌కు 40 శాతం రిజ‌ర్వేష‌న్లు కేటాయించ‌గా, మ‌హిళ‌ల‌కు 50 శాతం రిజ‌ర్వేష‌న్లు కేటాయించారు.

300 డివిజ‌న్ల‌కు రిజ‌ర్వేష‌న్లు ఇలా..

బీసీల‌కు 122 డివిజ‌న్లు (పురుషుల‌కు 61, మ‌హిళ‌ల‌కు 61)
ఎస్సీల‌కు 23 డివిజ‌న్లు (పురుషుల‌కు 12, మ‌హిళ‌ల‌కు 11)
ఎస్టీల‌కు 5 డివిజ‌న్లు (పురుషుల‌కు 03, మ‌హిళ‌ల‌కు 02)
జ‌న‌ర‌ల్ మ‌హిళ‌ల‌కు 76 డివిజ‌న్లు
అన్‌రిజ‌ర్వ్‌డ్ - 74

ఆరు జోన్లు, 30 సర్కిళ్లు, 150 డివిజ‌న్ల‌తో ఉన్న జీహెచ్‌ఎంసీ పరిధిని 12 జోన్లు, 60 సర్కిళ్లు, 300 డివిజన్లకు ప్ర‌భుత్వం పెంచిన సంగ‌తి తెలిసిందే. హైదరాబాద్ మ‌హా న‌గ‌రాన్ని ప్రపంచ స్థాయి నగరంగా తీర్చిదిద్దడమే లక్ష్యంగా రాష్ట్ర ప్రభుత్వం మహా విస్తరణ చేపట్టింది. ఇందులో భాగంగా 650 చదరపు కిలోమీటర్ల విస్తీర్ణంతో ఉన్న జీహెచ్‌ఎంసీ పరిధిని ఔటర్‌ రింగ్‌ రోడ్డు అవతలి వరకు 2053చదరపు కిలోమీటర్ల వరకు విస్తరించింది. జీహెచ్‌ఎంసీ అవతల ఉన్న 27 మున్సిపాలిటీలు, కార్పొరేషన్లను విలీనం చేసుకొని 300 డివిజన్లతో మహా హైదరాబాద్‌ను నిర్ణయించింది. దీంతో జీహెచ్‌ఎంసీలో జోన్ల సంఖ్యను ఆరు నుంచి 12కి పెంచారు. 30 సర్కిళ్లను 60 సర్కిళ్లు చేశారు.