‘హోదా’ ఇచ్చేది లేదాయె..నిధులు వచ్చేది లేదాయె: ఢిల్లీ ‘పక్షపాత’ డ్రామాలో తెలంగాణ బలి!

                            ఏటీఎంగా మారిందా? హోదా ఇవ్వరు.. నిధులు ఇవ్వరు!

"ఢిల్లీ పీఠానికి తెలంగాణ అంటే పన్నులు వసూలు చేసే ఏటీఎం మాత్రమేనా? నీళ్లు, నిధుల దగ్గరకు వచ్చేసరికి పక్షపాతపు గోడలు కడతారా?" — ఇది కేవలం ఒక రాజకీయ విమర్శ కాదు, కృష్ణా పరివాహక, కరువు ప్రాంతాల (మహబూబ్‌నగర్, రంగారెడ్డి, నల్లగొండ మొదలైన) ప్రజల ఆవేదన. ప్రతీ ఏటా వేల కోట్ల రూపాయల ఆదాయం కేంద్ర ఖజానాకు పన్నుల రూపంలో చేరుతున్నప్పటికీ, తెలంగాణ దాహార్తిని తీర్చే అత్యంత కీలకమైన పాలమూరు-రంగారెడ్డి ఎత్తిపోతల పథకానికి (PRLIS) జాతీయ హోదా కల్పించే ప్రసక్తే లేదని, DPRను తిప్పి పంపుతున్నామని కేంద్ర జలశక్తి శాఖ పార్లమెంట్ సాక్షిగా ప్రకటించడం తెలంగాణ వ్యాప్తంగా తీవ్ర ఆగ్రహావేశాలు వ్యక్తమవుతున్నాయి.

కేంద్రంలోని ఎన్డీఏ ప్రభుత్వం विभिन्न రాష్ట్రాల ప్రాజెక్టులకు జాతీయ హోదా కల్పిస్తూ భారీగా నిధులు కేటాయిస్తోంది. ఉత్తరాదిలోని కేన్-బెత్వా లింక్ ప్రాజెక్టుకు రూ. 44,605 కోట్ల వ్యయంలో ఏకంగా 90% నిధులు భరించేందుకు ఆమోదం తెలిపిన కేంద్రం, కర్ణాటక ఎన్నికల లబ్ధి కోసం అప్పర్ భద్ర ప్రాజెక్టుకు రూ. 5,300 కోట్ల ప్రత్యేక గ్రాంట్‌ను ప్రకటించింది. అలాగే ఆంధ్రప్రదేశ్‌లోని పోలవరం ప్రాజెక్టును విభజన చట్టం నెపంతో 100% కేంద్ర నిధులతో నిర్మించే బాధ్యతను తన భుజాన వేసుకుంది. కానీ, శతాబ్దాలుగా కరువుతో అల్లాడుతున్న మహబూబ్‌నగర్, రంగారెడ్డి, నల్లగొండ జిల్లాల దాహార్తిని తీర్చే సుమారు రూ. 55,000 కోట్ల 'పాలమూరు-రంగారెడ్డి' ఎత్తిపోతల పథకం దగ్గరకు వచ్చేసరికి మాత్రం "కృష్ణా ట్రిబ్యునల్-II పరిధిలో నీటి కేటాయింపులు తేలలేదు, ఇంటర్-స్టేట్ వివాదాలు ఉన్నాయి" అంటూ ప్రధాన కారణంగా ట్రిబ్యునల్ అంశాన్నే చూపుతూ మెలికలు పెడుతోంది. పొరుగు రాష్ట్రాలకు నిధుల వర్షం కురిపిస్తూ, అభివృద్ధి పథంలో దూసుకుపోతున్న తెలంగాణపై మాత్రం శీతకన్ను వేయడం కేంద్ర ప్రభుత్వం అనైతికతకు నిదర్శనం.

పోలవరం ప్రాజెక్టుకు జాతీయ హోదా దక్కడం వెనుక కేంద్రం చూపిన ప్రత్యేక రాజకీయ చొరవే కారణం. ముంపునకు గురయ్యే తెలంగాణలోని (నాటి ఖమ్మం జిల్లా) 7 మండలాలను ఆంధ్రప్రదేశ్‌లో కలపకపోతే అసలు పోలవరానికి మనుగడ ఉండేది కాదు, జాతీయ హోదా దక్కేదీ కాదు. అప్పుడు తెలంగాణ ప్రజలు ఎంత మొత్తుకున్నా వినకుండా, ఎన్డీఏ ప్రభుత్వం అత్యంత వేగంగా ఆర్డినెన్స్ తెచ్చి, చట్టాన్ని సవరించి మరీ ఆ 7 మండలాలను ఏపీకి కట్టబెట్టింది.

రాజకీయ అవసరాల కోసం ఏకంగా రాష్ట్రాల సరిహద్దులను, రాజ్యాంగ చట్టాలనే సవరించిన కేంద్ర ప్రభుత్వం.. తెలంగాణకు నష్టం జరుగుతుందని తెలిసినా ఏపీ ప్రాజెక్టుకు మార్గం సుగమం చేసింది. కానీ అదే తెలంగాణ ప్రాజెక్టుల విషయానికి వచ్చేసరికి మాత్రం హఠాత్తుగా "చట్టాలు, ట్రిబ్యునల్ వివాదాలు, సాంకేతిక అనుమతులు" అంటూ లీగల్ మెలికలు పెట్టడం అతిపెద్ద రాజకీయ డ్రామా కాక మరేమిటి? నిజంగానే సాంకేతిక సమస్యలు, నిబంధనలే అడ్డొస్తుంటే.. కేంద్రం చొరవ తీసుకుని ఒకే ఒక్క ఉన్నత స్థాయి సమావేశంలో ఆ సమస్యలేంటో తేల్చి చెప్పలేదా? లోపాలను సరిదిద్దుకునేలా రాష్ట్ర ప్రభుత్వానికి స్పష్టమైన సూచనలు చేయలేదా? అలా చేయకుండా సాకులు చెబుతూ పక్కనబెట్టడమే కేంద్రం నైజానికి అద్దంపడుతోంది.

జాతీయ ప్రాజెక్టుగా గుర్తింపు లభిస్తే ప్రాజెక్ట్ వ్యయంలో 60% నుండి 90% వరకు నిధులను కేంద్ర ప్రభుత్వమే భరిస్తుంది.

పాలమూరు ఎత్తిపోతల జాతీయ హోదా తిరస్కరణపై ఢిల్లీ పీఠంపై సమరశంఖం పూరించాల్సిన తెలంగాణ పార్టీలు, దాన్ని పక్కనబెట్టి పరస్పరం నిందారోపణలకే ప్రాధాన్యమిస్తున్నాయి:

అదే తమిళనాడులో చూస్తే.. అక్కడి అధికార, ప్రతిపక్ష పార్టీలు తమలో తాము ఎంత తీవ్రంగా కొట్లాడుకున్నప్పటికీ, రాష్ట్ర ప్రయోజనాలు, కావేరి నీళ్లు లేదా పన్నుల వాటా వంటి అంశాలు వచ్చేసరికి రాజకీయ వైరివర్గాలను పక్కనబెట్టి ఒకే తాటిపైకి వచ్చి ఢిల్లీ పీఠంపై ఒత్తిడి తెస్తాయి. తమిళ తంబీల వలె రాష్ట్ర ప్రయోజనాల కోసం స్వార్థ రాజకీయాలను, అధిష్టాన భయాన్ని పక్కనబెట్టి ఐక్యపోరాటం చేయకపోవడం వల్లే, ఢిల్లీ పెద్దలు తెలంగాణ డిమాండ్లను తేలిగ్గా తీసుకుంటున్నారనే నిరసన క్షేత్రస్థాయిలో వ్యక్తమవుతోంది.

కేంద్ర ప్రభుత్వ పెద్దలకు ప్రాజెక్టులనేవి ఓట్ల రాజకీయాలకు, ఎన్నికల సమీకరణాలకు ఉపయోగపడే సాధనాలు కావచ్చు. కానీ పాలమూరు ప్రజలకు PRLIS అనేది జీవన్మరణ సమస్య. 'మనసుంటే మార్గం ఉంటుంది' అనే నిజానికి పోలవరం కోసం తెచ్చిన ఆర్డినెన్సే నిదర్శనమైతే, 'రాజకీయ కోణం ఉంటే సాకులు వేలల్లో ఉంటాయి' అనడానికి పాలమూరు విషయంలో ఎన్డీఏ ప్రభుత్వ వైఖరే సజీవ సాక్ష్యం! ఢిల్లీ పీఠం తన పక్షపాత వైఖరిని వీడకపోతే తెలంగాణ ప్రజలు తగిన రీతిలోనే గుణపాఠం చెబుతారు.