Iran | భార‌త్‌కు భారీ ఊర‌ట‌.. హార్ముజ్ జలసంధిలో నౌకలకు గ్రీన్ సిగ్నల్..

Iran | పశ్చిమాసియాలో ఉద్రిక్తతలు కొనసాగుతున్న నేపథ్యంలో హార్ముజ్ జలసంధిలో భారత్, చైనా, ఇరాక్, ఖతార్ దేశాలకు చెందిన వాణిజ్య నౌకలకు ఇరాన్ కీలక మినహాయింపు ఇచ్చింది. భారత్ నుంచి ఔషధాల దిగుమతులకు ఆటంకం కలగకుండా భారత నౌకలకు స్వేచ్ఛగా ప్రయాణించే అవకాశం కల్పించినట్లు ఇరాన్ పార్లమెంట్ జాతీయ భద్రత, విదేశాంగ విధాన కమిటీ డిప్యూటీ ఛైర్మన్ అమీర్ హయత్ మొఘద్దమ్ వెల్లడించారు.

భార‌త్‌, చైనా, ఇరాక్‌, ఖ‌తార్‌ల‌కు మిన‌హాయింపు..

హార్ముజ్ జలసంధిలో విధించిన రవాణా ఆంక్షల నుంచి భారత్, చైనా, ఇరాక్, ఖతార్ దేశాల వాణిజ్య నౌకలకు మినహాయింపు ఇచ్చినట్లు అమీర్ హయత్ మొఘద్దమ్ తెలిపారు. ఈ నాలుగు దేశాలకు చెందిన నౌకలు ఎలాంటి అడ్డంకులు లేకుండా ప్రయాణించవచ్చని, అమెరికా కూడా వాటిని అడ్డుకోవడం లేదని ఇరాన్ స్టూడెంట్స్ న్యూస్ ఏజెన్సీకి ఇచ్చిన ఇంటర్వ్యూలో వెల్లడించారు. భారత్ నుంచి ఔషధాలను దిగుమతి చేసుకునేందుకు వీలుగా భారత నౌకల ప్రయాణాన్ని ఇరాన్ అనుమతిస్తోందని, చైనా నుంచి రాజకీయ మద్దతు పొందే ఉద్దేశంతో ఆ దేశ నౌకలకు మినహాయింపు కల్పించినట్లు వివరించారు. అయితే భారత, చైనా నౌకల నుంచి రవాణా రుసుములు వసూలు చేస్తున్నామని, ఖతార్ నౌకలను మాత్రం ఎలాంటి రుసుము లేకుండా అనుమతిస్తున్నామని చెప్పారు. ఇరాక్ నౌకలకు రుసుములు వర్తిస్తాయా లేదా అనే విషయాన్ని స్పష్టం చేయలేదు.

దిగుమ‌తుల‌పై భారీగా ఆధార‌ప‌డిన భార‌త్‌..

భారత్ తన ముడి చమురు అవసరాల్లో దాదాపు 90 శాతం దిగుమతులపైనే ఆధారపడుతోంది. ప్రస్తుతం ఈ దిగుమతుల్లో సుమారు 30 శాతం హార్ముజ్ జలసంధి మీదుగా వస్తున్నాయి. గతంలో భారత్ ముడి చమురు దిగుమతుల్లో ఈ మార్గం వాటా 70 శాతంగా ఉండేది. అయితే పశ్చిమాసియా సంఘర్షణ ప్రారంభమైన తర్వాత రష్యా, అమెరికా, పశ్చిమ ఆఫ్రికా, యునైటెడ్ అరబ్ ఎమిరేట్స్‌లోని ఫుజైరా వంటి ప్రాంతాల నుంచి దిగుమతులను పెంచుకోవడంతో ఆధారపడడం తగ్గింది. అయినప్పటికీ భారత్ ఎల్పీజీ దిగుమతుల్లో 90 శాతం, ఖతార్, యూఏఈ నుంచి వచ్చే ఎల్ఎన్జీ దిగుమతుల్లో 50 శాతానికి పైగా ఈ జలసంధి మీదుగానే రవాణా అవుతున్నాయి. ఎరువుల దిగుమతులకు కూడా ఈ మార్గం అత్యంత కీలకంగా ఉంది. ఇరాన్ హార్ముజ్ జలసంధిని మూసివేసి వాణిజ్య నౌకల రాకపోకలపై ఆంక్షలు విధించినప్పటి నుంచి ఇంధన సరఫరాలకు ఎలాంటి ఆటంకాలు లేకుండా చూడాలని, అంతర్జాతీయ జలమార్గాల్లో నౌకాయాన స్వేచ్ఛను గౌరవించాలని భారత్ పదేపదే కోరుతోంది.

చెక్ చేసి పంపిస్తున్న ఇరాన్‌..

ఇరాన్, ఒమన్ మధ్య ఉన్న హార్ముజ్ జలసంధి ద్వారా పశ్చిమాసియా దేశాల నుంచి ప్రపంచానికి సరఫరా అయ్యే సముద్ర మార్గ ముడి చమురులో దాదాపు 25 శాతం రవాణా అవుతోంది. ఈ నేపథ్యంలో అక్కడ నౌకల రాకపోకలపై ఆంక్షలు కొనసాగుతున్నాయి. నౌకలు సురక్షితంగా ప్రయాణించాలంటే వాటి గుర్తింపు, సరుకు వివరాలు, గమ్యస్థానం వంటి సమాచారాన్ని అందించాల్సిన వ్యవస్థను ఇరాన్ ఇస్లామిక్ రివల్యూషనరీ గార్డ్ కార్ప్స్ నేవీ అమలు చేస్తోందని యూరోపియన్ యూనియన్ వెల్లడించింది. అంతర్జాతీయ సముద్ర సంస్థ (ఐఎంఓ) ప్రకారం ఫిబ్రవరి నుంచి ఆగస్టు వరకు సంఘర్షణ ప్రారంభమైన తర్వాత వాణిజ్య నౌకలపై కనీసం 70 దాడులు జరిగాయి. ఈ దాడుల్లో 19 మంది నావికులు ప్రాణాలు కోల్పోయారు. పశ్చిమాసియా సంఘర్షణలో ఇప్పటివరకు మరణించిన 24 మంది భారతీయుల్లో 15 మంది నావికులే కావడం ఆందోళన కలిగిస్తోంది.