Tollywood | చిరు, వెంకీ , నాగ్‌, బాల‌య్య క‌లిసి న‌టించిన ఒకే ఒక తెలుగు సినిమా ఏదో తెలుసా!

Tollywood |  టాలీవుడ్ అగ్ర హీరోలు చిరంజీవి, బాల‌కృష్ణ‌, నాగార్జున‌, వెంక‌టేష్ కాంబినేష‌న్‌లో ఓ సినిమా రావాల‌న్న‌ది తెలుగు సినీ అభిమానుల చిర‌కాల క‌ల‌. ఈ న‌లుగురు స్టార్ హీరోల‌ను ఒకే ఫ్రేమ్‌లో చూసేందుకు ఎన్నో ఏళ్లుగా అభిమానులు ఎదురుచూస్తున్నారు. కానీ వారి కోరిక మాత్రం నెర‌వేర‌డం లేదు. చిరంజీవి, నాగార్జున, వెంక‌టేష్‌, బాల‌కృష్ణ కాంబినేష‌న్‌లో సినిమాను రూపొందించాల‌ని కొంద‌రు నిర్మాత‌లు ప్ర‌య‌త్నించారు. కానీ వ‌ర్క‌వుట్‌ కాలేదు. చాలా ఏళ్ల క్రిత‌మే ఈ న‌లుగురు టాప్ హీరోలు ఓ తెలుగు సినిమాలో న‌టించారు. అయితే హీరోలుగా కాదు గెస్ట్ రోల్స్ చేశారు.

మ‌ల్టీస్టార‌ర్ మూవీ...

వెంక‌టేష్‌, అర్జున్‌, రాజేంద్ర‌ప్ర‌సాద్ హీరోలుగా సీనియ‌ర్ డైరెక్ట‌ర్ కే ముర‌ళీమోహ‌న్ రావు డైరెక్ష‌న్‌లో తెలుగులో త్రిమూర్తులు పేరుతో ఓ మ‌ల్టీస్టార‌ర్ మూవీ తెర‌కెక్కింది. 1987లో రిలీజైన ఈ సినిమాను సుబ్బిరామిరెడ్డి నిర్మించారు.బాలీవుడ్‌లో విజ‌య‌వంత‌మైన న‌సీబ్ ఆధారంగా రూపొందిన ఈ సినిమాలో చిరంజీవి, నాగార్జున‌, బాల‌కృష్ణ గెస్ట్ రోల్స్‌లో క‌నిపించారు.

25 మంది స్టార్స్‌...

ఈ సినిమాలోని ఒకే మాట ఒకే బాట పాట‌లో కృష్ణ‌, శోభ‌న్‌బాబు, కృష్ణంరాజుతో పాటు చిరంజీవి, వెంక‌టేష్, బాల‌కృష్ణ‌, విజ‌య‌శాంతి, రాధిక స‌హా టాప్ హీరోహీరోయిన్లంద‌రూ న‌టించారు. నిర్మాత సుబ్బిరామిరెడ్డితో ఉన్న అనుబంధం కార‌ణంగా గెస్ట్‌లుగా న‌టించ‌డానికి నాయ‌కానాయిక‌లంద‌రూ అంగీక‌రించారు. దాదాపుగా ఇర‌వై ఐదు మంది స్టార్స్ ఈ పాట‌లో న‌టించ‌డం గ‌మ‌నార్హం. రిలీజ్‌కు ముందు ఈ పాట హాట్ టాపిక్‌గా మారింది. అభిమాన హీరోలంద‌రిని ఒకే సినిమాలో చూసి ఫ్యాన్స్ థ్రిల్ల‌య్యారు. కానీ క‌మ‌ర్షియ‌ల్‌గా మాత్రం త్రిమూర్తులు డిజాస్ట‌ర్‌గా నిలిచింది. చిరంజీవి, నాగార్జున‌, వెంక‌టేష్‌, బాల‌కృష్ణ క‌లిసి న‌టించిన ఒకే ఒక సినిమాగా మాత్రం నిలిచింది. ఈ సినిమాకు బ‌ప్పిల‌హ‌రి మ్యూజిక్ అందించారు.