AR Rahman | మ‌ళ్లీ హిందుమ‌తంలో చేరండి.. ఏఆర్ రెహ‌మాన్‌కు వీహెచ్‌పీ కౌంట‌ర్‌..

AR Rahman | ప్ర‌ముఖ సంగీత ద‌ర్శ‌కుడు, ఆస్కార్ అవార్డు విజేత ఏఆర్ రెహ‌మాన్ చేసిన వ్యాఖ్య‌ల‌పై విశ్వ హిందూ ప‌రిష‌త్ (VHP) తీవ్ర‌స్థాయిలో విమ‌ర్శ‌లు గుప్పించింది. ఆయ‌న తిరిగి హిందూ మ‌తంలోకి మారితే మంచిద‌ని వీహెచ్‌పీ జాతీయ అధికార ప్ర‌తినిధి వినోద్ బ‌ల్స‌న్ వ్యాఖ్యానించారు. బీబీసీ ఏషియ‌న్ నెట్‌వ‌ర్క్ ఇచ్చిన ఇంట‌ర్వ్యూలో రెహ‌మాన్ మాట్లాడుతూ గ‌త ఎనిమిదేళ్లుగా బాలీవుడ్‌లో అవ‌కాశాలు త‌గ్గాయ‌న్నారు. ఇందుకు ఇండ‌స్ట్రీలో మారిన ప‌వ‌ర్ షిఫ్ట్ ఒక కార‌ణ‌మైతే.. త‌న మ‌తం మ‌రో కార‌ణమై ఉండ‌చ్చ‌వ‌న్నారు. ఈ విషయాన్ని త‌న‌కు ఎవ‌రూ చెప్ప‌క‌పోయినా పుకార్ల రూపంలో మాత్రం తెలిసింద‌ని రెహ‌మాన్ వ్యాఖ్యానించారు.

అయితే, వినోద్ బ‌న్స‌ల్ మాట్లాడుతూ రెహ‌మాన్ ఓ వ‌ర్గంతో చేతులు క‌లిపార‌ని ఆరోపించారు. గ‌తంలో మాజీ ఉప రాష్ట్ర‌ప‌తి హ‌మీద్ అన్సారీ నాయ‌క‌త్వం వ‌హించిన వ‌ర్గానికి రెహ‌మాన్ నాయ‌కుడిగా మారిన‌ట్లుగా అనిపిస్తోంద‌ని విమ‌ర్శించారు. అన్సారీ ప‌దేళ్లు ఎన్నో ప్ర‌యోజ‌నాల‌ను పొంది, రాజ్యాంగ‌బ‌ద్ద‌మైన ప‌దువుల్లో కొన‌సాగ‌రని బ‌న్స‌ల్ పేర్కొన్నారు. ప‌ద‌వీ విర‌మ‌ణ త‌ర్వాత ఆయ‌న భార‌త్‌ను కించ‌ప‌రిచార‌ని విమ‌ర్శించారు. రెహ‌మాన్‌ను భార‌తీయులంతా ఆద‌రించార‌న్నారు. కానీ, త‌న‌కు ఎందుకు ప్ర‌స్తుతం ప‌ని దొర‌క‌డం లేదో ఆత్మ ప‌రిశీల‌న చేసుకోకుండా.. వ్య‌వ‌స్థ‌ను విమ‌ర్శిస్తూ ఇండ‌స్ట్రీని అప‌ఖ్యాతి పాలు చేస్తున్నార‌ని ఆయ‌న మండిప‌డ్డారు. ఒక‌ప్పుడు ఆయ‌న హిందువేన‌ని.. ఆయ‌న ఇస్లాంలోకి ఎందుకు మారారు. ఇప్ప‌డు తిరిగి హిందూ మ‌తంలోకి చేరితో మ‌ళ్లీ ప‌ని దొరుకుతుంద‌ని ఆయ‌న వ్యాఖ్య‌నించారు. ఇలాంటి వ్యాఖ్య‌లు రాజ‌కీయ నాయ‌కుల‌కు స‌రిపోతాయేమో కానీ ఓ క‌ళాకారుడికి మాత్రం త‌గ‌వన్నారు.

ఇదిలా ఉండ‌గా ప‌లువురు బాలీవుడ్ సినీ ప్ర‌ముఖులు రెహ‌మాన్ వ్యాఖ్య‌ల‌ను త‌ప్పుప‌ట్టారు. ప్ర‌ముఖ ర‌చ‌యిత జావేద్ అక్త‌ర్ మాట్లాడుతూ హిందీ ప‌రిశ్ర‌మ‌లో మ‌త‌ప‌ర‌మైన వివ‌క్ష లేద‌న్నారు. దిలీప్ కుమార్, షారుఖ్ ఖాన్ వంటి ఎంద‌రో అగ్ర‌స్థానంలో ఉన్నార‌న్నారు. మ‌రో ప్ర‌ముఖ నిర్మాత సైతం రెహ‌మాన్ వ్యాఖ్య‌ల‌ను చౌక‌బారు వ్యాఖ్య‌లంటూ మండిప‌డ్డారు. సంగీతంలో క్వాలిటీ లేక‌పోవ‌డం, ఎక్కువ ఫీజులు వ‌సూలు చేయ‌డం, ఆల‌స్యంగా పాట‌లు ఇవ్వ‌డం వ‌ల్లే అవ‌కాశాలు త‌ప్పా మ‌రే కార‌ణం లేద‌న్నారు.