Cinema Ticket Price | 90 రోజుల ముందే అనుమ‌తులు – సినిమా టికెట్ ధ‌ర‌ల పెంపుపై హైకోర్టు ఆదేశాలు

Cinema Ticket Price | టాలీవుడ్‌కు హైకోర్టు ఊర‌ట‌నిచ్చింది. సినిమా టికెట్ ధ‌ర‌లు పెంచొద్దంటూ దాఖ‌లైన పిటిష‌న్‌పై హైకోర్టు కీల‌క ఆదేశాలు జారీ చేసింది. ఇక‌పై టికెట్ ధ‌ర‌ల పెంపుకు సంబంధించిన అనుమ‌తుల‌ను 90 రోజుల ముందే జారీ చేయాల‌ని తీర్పు ఇచ్చింది. సంక్రాంతికి రిలీజైన సినిమాల్లో ప్ర‌భాస్ రాజాసాబ్‌తో పాటు చిరంజీవి మ‌న శంక‌ర వ‌ర‌ప్ర‌సాద్‌గారుకు టికెట్ ధ‌ర‌లు పెరిగాయి. అయితే రాజాసాబ్ టికెట్ ధ‌ర‌ల పెంపు మెమోను హైకోర్టు స‌స్పెండ్ చేసింది. అదే రోజు మ‌న శంక‌ర వ‌ర‌ప్ర‌సాద్ గారు సినిమాకు ప్ర‌భుత్వం టికెట్ ధ‌ర‌లు పెంచుతూ జీవోను జారీ చేసింది. ఈ జీవోపై విజ‌య్ గోపాల్ అనే యాక్టివిస్ట్ హైకోర్టులో పిటీష‌న్ దాఖ‌లు చేశారు. ఈ పిటీష‌న్‌పై మంగ‌ళ‌వారం విచార‌ణ జ‌రిపిన హైకోర్టు ఇక‌పై టికెట్ ధ‌ర‌ల పెంపుకు సంబంధించిన జీవోల‌ను 90 రోజుల ముందే ఇవ్వాల‌ని ఆదేశించింది. మ‌న శంక‌ర వ‌ర‌ప్ర‌సాద్‌గారు టికెట్ ధ‌ర‌ల పెంపు జీవోను కోర్టు దృష్టికి హోంశాఖ కార్య‌ద‌ర్శి తీసుకురాలేద‌నే విజ‌య్ గోపాల్ వాద‌న‌ను హైకోర్టు స‌మ‌ర్ధించింది. హోంశాఖ ప్ర‌త్యేక కార్య‌ద‌ర్శిపై కోర్టు ధిక్క‌ర‌ణ కేసు న‌మోదు చేయాల‌ని ఆదేశించింది. ఈ కేసుపై త‌దుప‌రి విచార‌ణ‌ను వాయిదా వేసింది.