Sunjay Kapur Property Dispute | కరిష్మా కపూర్ పిల్లలకు భారీ ఊరట.. రూ.30 వేల కోట్ల సంజయ్ కపూర్ ఆస్తులను ఫ్రీజ్ చేసిన ఢిల్లీ హైకోర్టు

Sunjay Kapur Property Dispute | త్రినేత్ర.న్యూస్ : బాలీవుడ్ నటి కరిష్మా కపూర్ మాజీ భర్త, దివంగత వ్యాపారవేత్త సంజయ్ కపూర్ ఆస్తుల వివాదంలో కీలక పరిణామం చోటుచేసుకుంది. సంజయ్ కపూర్ కు చెందిన సుమారు రూ. 30 వేల కోట్ల విలువైన ఆస్తులను, ఖాతాలను యథాతథంగా ఉంచాలని (ప్రిజర్వ్ చేయాలని) ఢిల్లీ హైకోర్టు గురువారం ఆదేశించింది. గతేడాది జూన్‌లో లండన్‌లో సంజయ్ కపూర్ మరణించిన తర్వాత.. ఆయన మూడో భార్య ప్రియా సచ్‌దేవ్ కపూర్ కు, కరిష్మా కపూర్ పిల్లలైన కియాన్, సమైరాలకు మధ్య ఈ ఆస్తి వివాదం నడుస్తోంది.

ఫోర్జరీ వీలునామా, ఆస్తుల దాచివేత ఆరోపణలు

సంజయ్ కపూర్ రాసినట్లు చెబుతున్న వీలునామాను ప్రియా కపూర్ ఫోర్జరీ చేశారని కరిష్మా పిల్లలు కియాన్, సమైరా కోర్టులో ఆరోపించారు. అంతేకాకుండా, కోర్టుకు సమర్పించిన ఆస్తుల జాబితా అసంపూర్ణంగా ఉందని పిటిషన్ లో పేర్కొన్నారు. ఆడిమర్స్ పగెట్ (Audemars Piguet), రోలెక్స్ (Rolex) లాంటి ఖరీదైన లగ్జరీ వాచ్ లు, ఖరీదైన పోలో గుర్రాల వివరాలను ఆస్తుల జాబితాలో ఆమె ఉద్దేశపూర్వకంగానే దాచిపెట్టారని వారు వాదించారు.

కోర్టు ఆదేశాలు ఏం చెబుతున్నాయి?

ఈ ఆరోపణలను పరిగణనలోకి తీసుకున్న ఢిల్లీ హైకోర్టు.. కరిష్మా పిల్లల వాదనల్లో ప్రాథమిక ఆధారాలు ఉన్నాయని అంగీకరించింది. విదేశీ పెట్టుబడులు, క్రిప్టోకరెన్సీతో సహా ఆస్తులన్నింటినీ పక్కదారి పట్టకుండా సంరక్షించాల్సిన అవసరం ఉందని న్యాయస్థానం స్పష్టం చేసింది. ఈ ఆస్తులను విక్రయించకుండా ప్రియా కపూర్‌ను నిలువరిస్తూ మధ్యంతర ఉత్తర్వులు జారీ చేసింది. ఆ వీలునామా అసలైనదేనని నిరూపించుకోవాల్సిన బాధ్యత కూడా ప్రియా కపూర్ పైనే ఉందని కోర్టు తేల్చి చెప్పింది.

వ్యక్తిగత వస్తువులు బదిలీ చేయడానికి వీల్లేదు

దీనితో పాటుగా, సంజయ్ కపూర్ కు చెందిన వ్యక్తిగత వస్తువులు, ఆర్ట్‌వర్క్, ప్రావిడెంట్ ఫండ్ (PF) చెల్లింపులను సైతం ఇతరులకు బదిలీ చేయకుండా కోర్టు నిషేధం విధించింది. ఒకవేళ ఈ దశలో ఆస్తులను నగదు రూపంలోకి మార్చుకునేందుకు (liquidate) అనుమతిస్తే, రేపు కోర్టులో వీలునామా చెల్లదని తేలితే.. అది పిల్లలకు తీరని అన్యాయం చేసినట్లు అవుతుందని న్యాయమూర్తి వ్యాఖ్యానించారు. వారసత్వ హక్కుల చట్టబద్ధతను నిర్ధారించేందుకు ఈ కేసు ఇకపై విచారణ (trial) దశకు వెళ్లనుంది.

పిల్లల అవసరాలకు మాత్రం మినహాయింపు

అయితే, ఈ ఫ్రీజింగ్ ఆదేశాల నుంచి కోర్టు ఒక చిన్న మినహాయింపు ఇచ్చింది. గతంలో సంజయ్-కరిష్మా కపూర్ విడాకుల సెటిల్మెంట్ సందర్భంగా కుదుర్చుకున్న ఒప్పందం ప్రకారం.. పిల్లల ఆర్థిక అవసరాలు తీర్చేందుకు మాత్రమే ఆ నిధులను ఉపయోగించుకునే వెసులుబాటును కల్పించింది.