Chiranjeevi Shoulder Surgery | చిరంజీవికి సర్జరీ.. చేతికి కట్టుతో కనిపించడంతో ఫ్యాన్స్ ఆందోళన.. ఆయనకేమైంది?

Chiranjeevi Shoulder Surgery | టాలీవుడ్ అగ్ర కథానాయకుడు, మెగాస్టార్ చిరంజీవి చేతికి కట్టుతో (Sling) కనిపించడం ఇప్పుడు సినీ వర్గాల్లో, అభిమానుల్లో చర్చనీయాంశమైంది. ఎప్పుడూ హుషారుగా ఉండే తమ అభిమాన నటుడి చేతికి పట్టీ చూసి ఫ్యాన్స్ ఒక్కసారిగా ఆందోళనకు గురయ్యారు. షూటింగ్ సమయంలో ఏమైనా గాయమైందా? లేక ఇంకేమైనా ఆరోగ్య సమస్యా? అంటూ సోషల్ మీడియాలో రకరకాల ఊహాగానాలు మొదలయ్యాయి. అయితే, ఈ వదంతులకు చెక్ పెడుతూ మెగాస్టార్ చిరంజీవి స్వయంగా ఎక్స్ (ట్విట్టర్) వేదికగా స్పందించారు. అభిమానులెవరూ ఆందోళన చెందాల్సిన అవసరం లేదని ఆయన భరోసా ఇచ్చారు.

అసలేం జరిగింది?

చిరంజీవి తెలిపిన వివరాల ప్రకారం.. ఆయనకు కుడి భుజానికి సంబంధించి చిన్నపాటి అసౌకర్యం ఉండటంతో డాక్టర్లను సంప్రదించారు. పరీక్షల అనంతరం వైద్యులు చిన్నపాటి 'కీహోల్ సర్జరీ' (Keyhole Surgery) నిర్వహించారు. ఇది కేవలం ముందస్తు జాగ్రత్తగా చేసిన సాధారణ చికిత్స మాత్రమేనని చిరు స్పష్టం చేశారు.

చిరంజీవి ట్వీట్ సారాంశం

"నా చేతికి పట్టీని చూసి చాలామంది అభిమానులు, శ్రేయోభిలాషులు నా ఆరోగ్యం గురించి ఆరా తీస్తున్నారు. మీ ప్రేమాభిమానాలకు ధన్యవాదాలు. ఇది కేవలం చిన్నపాటి షోల్డర్ కీహోల్ సర్జరీ మాత్రమే. ప్రస్తుతం నేను పూర్తిగా కోలుకున్నాను. నా దినచర్య కూడా సాఫీగా సాగుతోంది. ఈ ఆపరేషన్‌ను ఎంతో నైపుణ్యంతో విజయవంతంగా పూర్తి చేసిన ప్రముఖ ఆర్థోస్కోపీ సర్జన్ డాక్టర్ నితిన్ గారికి నా ప్రత్యేక కృతజ్ఞతలు" అని చిరంజీవి పేర్కొన్నారు.

వరుస సినిమాలతో బిజీబిజీ

ఇటీవలే 'మన శంకర వర ప్రసాద్ గారు' చిత్రంతో రీజినల్ ఇండస్ట్రీ హిట్‌ను తన ఖాతాలో వేసుకున్న మెగాస్టార్.. ప్రస్తుతం ఫుల్ జోష్‌తో ఉన్నారు. ప్రస్తుతం ఆయన వశిష్ఠ దర్శకత్వంలో తెరకెక్కుతున్న సోషియో ఫాంటసీ చిత్రం 'విశ్వంభర'లో నటిస్తున్నారు. ఈ సినిమా షూటింగ్ శరవేగంగా జరుగుతోంది. దీనితో పాటు, బ్లాక్‌బస్టర్ దర్శకుడు బాబీతో మరోసారి చేతులు కలిపేందుకు చిరు సిద్ధమవుతున్నారు. వాల్తేరు వీరయ్య తర్వాత వీరిద్దరి కాంబినేషన్‌లో రాబోయే సినిమాపై భారీ అంచనాలు ఉన్నాయి.

మొత్తానికి మెగాస్టార్ క్లారిటీ ఇవ్వడంతో మెగా అభిమానులు ఊపిరి పీల్చుకున్నారు. ఆయన త్వరగా షూటింగ్‌లో పాల్గొనాలని కోరుకుంటున్నారు.

https://x.com/KChiruTweets/status/2023387574258246050