Kurtis | 4 కుర్తీల‌ను ఆన్‌లైన్‌లో ఆర్డ‌ర్ చేసింది.. రూ.98వేలు పోగొట్టుకుంది..

Kurtis | ముంబైలో ఓ మహిళ ఆన్‌లైన్‌లో కుర్తీలు కొనుగోలు చేసిన తర్వాత సైబర్ మోసానికి గురై రూ.98వేలు నష్టపోయిన ఘటన వెలుగులోకి వచ్చింది. ఆమె చేసిన‌ చెల్లింపు పూర్తి కాలేదని చెప్పి మోసగాళ్లు తప్పుడు రీఫండ్ ప్రక్రియతో ఆమెను తప్పుదారి పట్టించారు. దీంతో ఆమె డ‌బ్బు న‌ష్ట‌పోయింది. బాధితురాలు తెలిపిన వివ‌రాల ప్ర‌కారం.. ఆ మహిళ ఇటీవల Westside.com అనే వెబ్‌సైట్ ద్వారా నాలుగు కుర్తీలు ఆర్డర్ చేసి, కొనుగోలు సమయంలోనే పూర్తి మొత్తాన్ని ఆన్‌లైన్‌లో చెల్లించింది. కొనుగోలు చేసిన కొద్దిసేపటికే ఆమెకు సైబర్ మోసగాళ్ల నుంచి ఫోన్ కాల్స్ వచ్చాయి. వారు ఆమె ముందుగా చేసిన చెల్లింపు సరిగా పూర్తికాలేదని, సాంకేతిక సమస్య ఏర్పడిందని చెప్పి, మళ్లీ చెల్లింపు చేయాలని సూచించారు.

ప‌లు ద‌ఫాల్లో చెల్లింపులు..

అదనంగా డెబిట్ అయిన మొత్తం మొత్తాన్ని రీఫండ్ ప్రక్రియ ద్వారా తిరిగి ఇస్తామని వారు హామీ ఇచ్చారు. వారి మాటలు నమ్మిన ఆ మహిళ రీఫండ్ ప్రక్రియ ప్రారంభించేందుకు రూ.2,647 మరోసారి చెల్లించింది. మోసగాళ్లు సూచించిన విధంగా ఆమె అలా ప‌లు ద‌ఫాల్లో విడ‌త‌ల‌వారిగా చెల్లింపులు చేసింది. దీంతో ఆ లావాదేవీల మొత్తం రూ.98వేలు అయింది. అయితే త‌న ఖాతా నుంచి అంత పెద్ద ఎత్తున డ‌బ్బులు ఖాళీ అవ‌డంతో ఆమెకు అనుమానం వ‌చ్చి పోలీసుల‌ను ఆశ్ర‌యించింది. వారు సైబ‌ర్ నేర‌గాళ్ల‌పై కేసు న‌మోదు చేసి ద‌ర్యాప్తు చేప‌ట్టారు.

అధికారిక వెబ్‌సైట్ల‌నే ఉప‌యోగించాలి: పోలీసులు

ప్ర‌జ‌లు ఎల్ల‌ప్పుడూ అధికారిక షాపింగ్ వెబ్‌సైట్‌ల‌లోనే కొనుగోళ్లు చేయాల‌ని, తెలియ‌ని వెబ్‌సైట్‌ల‌లో కొనుగోళ్లు చేయ‌వ‌ద్ద‌ని పోలీసులు ఈ సంద‌ర్భంగా సూచించారు. ఏ ఈ-కామ‌ర్స్ వెబ్‌సైట్ ప్ర‌తినిధులు కూడా పేమెంట్ చేయాల‌ని కాల్ చేయ‌ర‌ని, ఆ విష‌యాన్ని గుర్తుంచుకోవాల‌ని అన్నారు. అలాగే ఆన్‌లైన్‌లో క‌స్ట‌మ‌ర్ కేర్ నంబ‌ర్ల‌ను ఎల్ల‌ప్పుడూ అధికారిక వెబ్‌సైట్ల నుంచే పొందాల‌ని, ఇత‌ర సైట్ల‌లో తీసుకుని కాల్స్ చేస్తే మోస‌పోయే అవ‌కాశాలు ఎక్కువ‌గా ఉంటాయ‌ని హెచ్చ‌రించారు.