Hyderabad Police Nepal Gang Arrest | ఇంటి గుట్టు పట్టి.. యజమానురాలిని మట్టుబెట్టి: జూబ్లీహిల్స్ ఐపీఎస్ భార్య హత్య క్రైమ్ మిస్టరీ వీడింది!

• జూబ్లీహిల్స్ రిటైర్డ్ ఐపీఎస్ భార్య హత్య కేసు కొలిక్కి
• యజమాని టూర్ వెళ్లగానే స్కెచ్
• 5 నెలలు.. 7 రాష్ట్రాలు.. నేపాల్ సరిహద్దుల్లో వేట
• రిటైర్డ్ ఐపీఎస్ ఇంట్లో ఘోరం వెనుక నేపాల్ ముఠా
• పనిమనిషి మాస్టర్ ప్లాన్
• జూబ్లీహిల్స్ కిల్లర్ గ్యాంగ్ చిక్కిందిలా

Hyderabad Police Nepal Gang Arrest | త్రినేత్ర న్యూస్ : హైదరాబాద్‌లోని ప్రముఖుల నివాస ప్రాంతమైన జూబ్లీహిల్స్‌లో సంచలనం సృష్టించిన రిటైర్డ్ ఐపీఎస్ అధికారి రే వినయ్ రంజన్ భార్య తనూజ రంజన్ (Tanuja Ranjan) హత్య, దోపిడీ కేసును నగర పోలీసులు విజయవంతంగా ఛేదించారు. ఇంట్లో పనిచేసే పనిమనిషే ఇంటి దొంగగా మారి, పథకం ప్రకారం అంతర్జాతీయ నేపాల్ గ్యాంగ్‌తో చేతులు కలిపి ఈ దారుణానికి పాల్పడినట్లు తేలింది. సుమారు 5 నెలల పాటు 7 రాష్ట్రాలు, భారత్-నేపాల్ సరిహద్దుల్లోని క్లిష్టమైన కొండ ప్రాంతాల్లో రహస్యంగా గాలించిన స్పెషల్ ఇన్వెస్టిగేషన్ టీమ్ (SIT), సోమవారం నాంపల్లి రైల్వే స్టేషన్ సమీపంలో పనిమనిషితో సహా నలుగురు కీలక నిందితులను అరెస్ట్ చేసింది.

అరెస్టయిన వారిలో పనిమనిషి ధర్మ తిరువా అలియాస్ కల్పన (26), గణేష్ బి.కె (31), చంద్ర బహదూర్ తమంగ్ అలియాస్ శంకర్ లామా (44), గణేష్ బహదూర్ షాహీ (37) ఉన్నారు. వీరి నుంచి కీలక ఆధారాలతో పాటు రూ.51,130 నగదును స్వాధీనం చేసుకున్నారు.

టూర్ వెళ్లగానే స్కెచ్.. అర్ధరాత్రి దారుణం

పోలీసుల వివరాల ప్రకారం.. నేపాల్‌కు చెందిన కల్పన 2025 జూన్‌లో జూబ్లీహిల్స్ ప్రశాసన్ నగర్‌లోని రిటైర్డ్ ఐపీఎస్ అధికారి ఇంట్లో నెలకు రూ.20 వేల జీతానికి పనిమనిషిగా చేరింది. పుణెలోని నేపాల్ ముఠా సభ్యుడు బికాస్‌తో టచ్‌లో ఉన్న ఆమె.. ఇంట్లోని విలువైన వస్తువులు, లాకర్ల వివరాలను ఎప్పటికప్పుడు చేరవేసింది. దోపిడీ సొత్తులో వాటా ఇస్తామని ముఠా ఆమెను ప్రలోభపెట్టింది.

మే 4న యజమాని పనిమీద బెంగళూరు వెళ్లగానే కల్పన ముఠాకు సమాచారం అందించింది. పక్కా ప్లాన్‌తో కారు, బస్సుల్లో వేర్వేరుగా హైదరాబాద్ చేరుకున్న నిందితులు ఎంజీబీఎస్ (MGBS) వద్ద రెండు గ్రూపులుగా విడిపోయారు. మే 7న అర్ధరాత్రి వేళ పనిమనిషి తలుపులు తెరవడంతో ముఠా ఇంట్లోకి ప్రవేశించింది. ఆ సమయంలో నిద్రలేచిన తనూజ కేకలు వేయబోగా, ఆమె కాళ్లు చేతులు కట్టేసి, నోట్లో గుడ్డలు కుక్కి ఊపిరాడకుండా చేసి అత్యంత కిరాతకంగా చంపేశారు. అనంతరం బీరువాలు పగలగొట్టి 225 గ్రాముల బంగారు ఆభరణాలు, ఇతర విలువైన వస్తువులను దోచుకుని పరారయ్యారు. కాజీపేట సమీపంలోని కొండ ప్రాంతానికి వెళ్లి ఆ సొత్తును తొమ్మిది వాటాలుగా పంచుకుని నేపాల్‌కు పారిపోయారు.

5 నెలల పాటు సరిహద్దుల్లో 'సిట్' ఆపరేషన్

నేపాల్ ముఠాల ఆగడాలకు అడ్డుకట్ట వేసేందుకు హైదరాబాద్ సీపీ ఆదేశాలతో టాస్క్‌ఫోర్స్ డీసీపీ వైభవ్ రఘునాథ్ గైక్వాడ్, జూబ్లీహిల్స్ డీసీపీ రమణారెడ్డి పర్యవేక్షణలో ప్రత్యేక సిట్ ఏర్పాటైంది. గ్రౌండ్ లెవల్‌లో ఐటీ సెల్ ఇన్‌స్పెక్టర్ జి.ఎస్. డేనియల్ శాంతి కుమార్, జూబ్లీహిల్స్ ఇన్‌స్పెక్టర్ డి. అశోక్ బృందాలు పనిచేశాయి. మే 22నే ఇద్దరిని పట్టుకుని 26 గ్రాముల బంగారం రికవరీ చేశారు.

మిగిలిన ప్రధాన నిందితుల కోసం సిట్ బృందాలు బెంగళూరు, ముంబై, పుణె, సూరత్, పాట్నా, ఢిల్లీ, లక్నో, ఉత్తరాఖండ్‌లతో పాటు భారత్-నేపాల్ సరిహద్దుల్లో దాదాపు ఐదు నెలల పాటు క్యాంప్ వేసి లోకల్ ఇన్ఫార్మర్ల సాయంతో నిఘా పెట్టాయి. నిందితులు మళ్లీ నగరంలోకి రాగానే నాంపల్లి వద్ద పక్కా ప్లాన్‌తో వలపన్ని పట్టుకున్నారు.

ఈ ఆపరేషన్‌లో భాగంగా వివిధ పాత కేసుల్లో వాంటెడ్‌గా ఉన్న మరో ఐదుగురు నేపాల్ జాతీయులపై నాన్-బెయిలబుల్ వారెంట్లను (NBW) అమలు చేయడంతో పాటు, తెలుగు రాష్ట్రాలు, గుజరాత్, మహారాష్ట్రల్లో 8 దోపిడీ కేసుల్లో నిందితుడైన జీవన్ చంద్ అనే మోస్ట్ వాంటెడ్ నేరస్థుడిని కూడా పోలీసులు కటకటాల్లోకి నెట్టారు.

పనిమనుషుల నియామకంలో ఈ జాగ్రత్తలు తప్పనిసరి: సీపీ సజ్జనార్

నగరంలో పనిచేసే సిబ్బంది నియామకంపై హైదరాబాద్ సీపీ వీసీ సజ్జనార్ ప్రజలకు, గేటెడ్ కమ్యూనిటీలకు కీలక మార్గదర్శకాలు జారీ చేశారు.

ఐడీ వెరిఫికేషన్: పనిమనిషి, వాచ్‌మెన్, కుక్‌లను నియమించుకునే ముందు వారి గుర్తింపు కార్డులను క్షుణ్ణంగా పరిశీలించాలి. యూపీఐ (UPI) ద్వారా వారి బ్యాంక్ ఖాతా పేరు, ఐడీ వివరాలు సరిపోలుతున్నాయో లేదో నిర్ధారించుకోవాలి.

బంధువుల వివరాలు: కొత్తగా చేర్చుకునే వారి కుటుంబానికి చెందిన కనీసం 5 మంది బంధువుల ఫోన్ నంబర్లు తీసుకుని మాట్లాడాలి.

గత నివాస చరిత్ర: గత 2-3 ఏళ్లుగా వారు ఎక్కడ పనిచేశారు, ఎక్కడ నివసించారనే వివరాలు సేకరించి పాత యజమానులతో క్రాస్ చెక్ చేసుకోవాలి.

గోప్యత పాటించాలి: ఇంట్లోని నగదు, బంగారం, లాకర్లు, టూర్ ప్లాన్స్, సీసీటీవీ కెమెరాల కవరేజీ వంటి వ్యక్తిగత విషయాలను పనిమనుషుల ఎదుట అస్సలు ప్రస్తావించవద్దు.

ఎవరైనా అనుమానాస్పదంగా కనిపిస్తే వెంటనే డయల్ 100/112 లేదా నగర పోలీస్ వాట్సాప్ నంబర్ 94906 16555కు సమాచారం అందించాలని సీపీ కోరారు.