Mehdipatnam Hit and Run | మెహదీపట్నంలో ‘హిట్ అండ్ రన్’.. డ్యూటీకి వెళ్తున్న నర్సును బలిగొన్న కారు.. VIDEO

Mehdipatnam Hit and Run | త్రినేత్ర.న్యూస్ : హైదరాబాద్ (Hyderabad) నడిబొడ్డున మరో దారుణమైన రోడ్డు ప్రమాదం జరిగింది. ఆదివారం ఉదయం ఆసిఫ్‌నగర్ పీఎస్ పరిధిలోని హిల్ కాలనీలో (Hill Colony) జరిగిన 'హిట్ అండ్ రన్' (Hit and run) ఘటన స్థానికంగా తీవ్ర విషాదాన్ని నింపింది. విధులకు వెళ్లేందుకు రోడ్డుపై నడుచుకుంటూ వెళ్తున్న ఓ సీనియర్ నర్సును.. మితిమీరిన వేగంతో దూసుకొచ్చిన ఇన్నోవా కారు బలంగా ఢీకొట్టి ప్రాణాలు తీసింది.

కళ్ల ముందే ఘోరం.. ఉస్మానియాకు తరలించినా..

మృతురాలిని ఫహీమున్నిస్సా (35) గా గుర్తించారు. ఆమె స్థానిక వృద్ధికాబా ఆసుపత్రిలో నర్సుగా పనిచేస్తున్నారు. రోజూలాగే ఆదివారం ఉదయం 8:30 గంటల సమయంలో డ్యూటీకి వెళ్లేందుకు ఆమె ఇల్లు దాటి బయటకు వచ్చారు. మెయిన్ రోడ్డుపైకి రాగానే, 'AP 05 BH 3456' రిజిస్ట్రేషన్ నంబర్ గల టొయోటా ఇన్నోవా (Toyota Innova) కారు ఆమెను అత్యంత వేగంగా ఢీకొట్టింది. తీవ్ర గాయాలపాలై రక్తపు మడుగులో పడివున్న ఆమెను స్థానికులు వెంటనే ఉస్మానియా ఆసుపత్రికి తరలించారు. కానీ, తీవ్ర రక్తస్రావం జరగడంతో అప్పటికే ఆమె కన్నుమూసినట్లు డాక్టర్లు నిర్ధారించారు.

కారులో బీర్ బాటిళ్లు.. డ్రంక్ అండ్ డ్రైవ్ వల్లేనా?

ప్రమాదం జరిగిన వెంటనే కారు నడుపుతున్న వ్యక్తి, అతని స్నేహితులు వాహనాన్ని అక్కడే వదిలేసి పరారయ్యారు (Absconding). సమాచారం అందుకున్న పోలీసులు వెంటనే ఘటనా స్థలానికి చేరుకుని కారును సీజ్ చేశారు. కారు లోపల తనిఖీ చేయగా కింగ్‌ఫిషర్ బీర్ బాటిళ్లు, మూతలు దొరికాయి. దీంతో నిందితులు పీకలదాకా మద్యం సేవించి కారు నడపడం వల్లే డ్రైవింగ్‌పై కంట్రోల్ తప్పి ఈ ఘోరం జరిగిందని పోలీసులు ఓ అంచనాకు వచ్చారు.

రాజకీయ నేత కొడుకే కారు నడిపాడా?

ప్రాథమిక విచారణలో ఈ కారును రెంటల్ (సెల్ఫ్ డ్రైవ్) కోసం అద్దెకు తీసుకున్నట్లు తేలడంతో, ముందుగా కారు యజమానులను పోలీసులు అదుపులోకి తీసుకున్నారు. అద్దెకు తీసుకున్న యువకులు ఆసిఫ్‌నగర్‌కే చెందిన వారని గుర్తించారు. ఆ కారు నడిపింది ఓ స్థానిక రాజకీయ నాయకుడి కుమారుడేనన్న అనుమానాలు బలంగా వినిపిస్తున్నాయి.

ప్రస్తుతం ఆ ఏరియాలోని సీసీటీవీ (CCTV) ఫుటేజీలను పోలీసులు క్షుణ్ణంగా పరిశీలిస్తున్నారు. పరారీలో ఉన్న నిందితులను పట్టుకునేందుకు స్పెషల్ టీమ్స్‌ను రంగంలోకి దించారు. కుటుంబానికి ఏకైక ఆధారంగా ఉన్న ఫహీమున్నిస్సా ఆకస్మిక మరణంతో ఆమె బంధువులు, స్థానికులు కన్నీరుమున్నీరవుతున్నారు. ఈ ఘటనపై పోలీసులు అన్ని కోణాల్లో దర్యాప్తు వేగవంతం చేశారు.

Hit-and-run claims life of woman in #Hyderabad’s #AsifNagar

A 35-year-old woman, identified as Faheemunnisa, died after being allegedly hit by an #Innovacar (AP 05 BH 3456) while she was outside her house in Asif Nagar.

The occupants reportedly abandoned the vehicle and fled.… pic.twitter.com/ReUvM3c74F

— NewsMeter (@NewsMeter_In) June 21, 2026