WPL 2026 | బెంగళూరు జోరు.. యూపీపై ఘ‌న విజ‌యం..

WPL 2026 | ముంబైలోని డీవై పాటిల్ స్టేడియం వేదిక‌గా జ‌రిగిన డ‌బ్ల్యూపీఎల్ 2026 టోర్నీ 5వ మ్యాచ్‌లో యూపీ వారియ‌ర్జ్ వుమెన్ జ‌ట్టుపై రాయ‌ల్ చాలెంజ‌ర్స్ బెంగ‌ళూరు వుమెన్ జ‌ట్టు 9 వికెట్ల తేడాతో ఘ‌న విజ‌యం సాధించింది. యూపీ మ‌హిళ‌ల జ‌ట్టు నిర్దేశించిన ల‌క్ష్యాన్ని బెంగ‌ళూరు మ‌హిళల జ‌ట్టు చాలా సునాయాసంగా ఛేదించింది.

Mahesh Reddy B

Cricket | Jan 13, 2026, 6.45 am IST

స్వ‌ల్ప స్కోరు చేసిన యూపీ..

మ్యాచ్‌లో టాస్ గెలిచిన రాయ‌ల్ చాలెంజ‌ర్స్ బెంగ‌ళూరు వుమెన్ జ‌ట్టు ముందుగా ఫీల్డింగ్ ఎంచుకోగా యూపీ వారియ‌ర్జ్ వుమెన్ జ‌ట్టు బ్యాటింగ్ చేసింది. ఈ క్ర‌మంలో యూపీ జ‌ట్టు నిర్ణీత 20 ఓవ‌ర్ల‌లో 5 వికెట్ల‌ను కోల్పోయి కేవ‌లం 143 ప‌రుగులు మాత్ర‌మే చేసింది. ఆ జ‌ట్టు ప్లేయ‌ర్ల‌లో టాప్ ఆర్డ‌ర్ విఫ‌లం చెందింది. మ్యాచ్ ఆరంభం అయిన వెంటనే వ‌రుస క్ర‌మంలో వికెట్ల‌ను కోల్పోయింది. దీంతో భారీ స్కోరు చేయ‌డం క‌ష్ట‌మైంది. యూపీ ప్లేయ‌ర్ల‌లో దీప్తి శ‌ర్మ 35 బంతుల్లో 5 ఫోర్లు, 1 సిక్స‌ర్‌తో 45 ప‌రుగులు చేసి నాటౌట్‌గా నిల‌వ‌గా, మ‌రో ప్లేయ‌ర్ దియేంద్ర డాటిన్ 37 బంతుల్లో 3 ఫోర్లు, 1 సిక్స‌ర్‌తో 40 ప‌రుగులు చేసి నాటౌట్‌గా నిలిచింది. ఈ ఇద్ద‌రు ప్లేయర్లు చివ‌రి ఓవ‌ర్ల‌లో ప‌రుగుల‌ను ధాటిగా రాబ‌ట్టే ప్ర‌య‌త్నం చేశారు. దీంతో యూపీ మ‌హిళ‌ల జ‌ట్టు గౌర‌వ ప్ర‌ద‌మైన స్కోరు చేయ‌గ‌లిగింది. ఇక బెంగ‌ళూరు బౌల‌ర్ల‌లో శ్రేయాంక పాటిల్‌, న‌దిన్ డి క్ల‌ర్క్ చెరో 2 వికెట్ల‌ను ప‌డ‌గొట్ట‌గా, లారెన్ బెల్ 1 వికెట్ తీసి అల‌రించింది. తొలి మ్యాచ్‌లో లాగే ఇందులో కూడా బెల్ చాలా పొదుపుగా ప‌రుగుల‌ను ఇవ్వ‌డం విశేషం. మొత్తం 4 ఓవ‌ర్లు వేసిన బెల్ కేవ‌లం 16 ప‌రుగులను మాత్ర‌మే ఇచ్చి ఆక‌ట్టుకుంది.

చెల‌రేగిన ఆర్‌సీబీ ఓపెన‌ర్లు..

అనంత‌రం బ్యాటింగ్ ప్రారంభించిన బెంగ‌ళూరు ఆరంభం నుంచి దూకుడును ప్ర‌ద‌ర్శించింది. ఓపెన‌ర్లు స్మృతి మంధాన‌, గ్రేస్ హారిస్ చెల‌రేగిపోయారు. ఈ క్ర‌మంలో ఈ ఇద్ద‌రూ తొలి వికెట్‌కు ఏకంగా 137 ప‌రుగుల భాగ‌స్వామ్యాన్ని న‌మోదు చేశారు. 40 బంతుల్లోనే 10 ఫోర్లు, 5 సిక్స‌ర్ల‌తో హారిస్ 85 ప‌రుగులు చేయ‌గా, కెప్టెన్ స్మృతి 32 బంతుల్లో 9 ఫోర్ల‌తో 47 ప‌రుగులు చేసి నాటౌట్‌గా నిలిచింది. అలాగే యూపీ బౌల‌ర్ల‌లో శిఖా పాండేకు 1 వికెట్ ద‌క్కింది. ఈ క్ర‌మంలో బెంగ‌ళూరు జ‌ట్టు 12.1 ఓవ‌ర్ల‌లోనే కేవ‌లం 1 వికెట్‌ను మాత్ర‌మే కోల్పోయి ల‌క్ష్యాన్ని ఛేదించింది. 145 ప‌రుగులు చేసింది. ఈ మ్యాచ్‌లో గెలుపుతో బెంగ‌ళూరు జ‌ట్టు టోర్నీలో త‌న రెండో విజ‌యాన్ని న‌మోదు చేయ‌గా, పాయింట్ల ప‌ట్టిక‌లోనూ అగ్ర స్థానంలో ఉండ‌డం విశేషం.