Warren Buffett | ఇక చాలు.. రిటైర్‌మెంట్ ప్రకటించిన ప్రపంచ కుబేరుడు, లెజండరీ ఇన్వెస్టర్ వారెన్ బఫెట్

Warren Buffett | వారెన్ బఫెట్ గురించి ప్రత్యేకంగా చెప్పాల్సిన అవసరం లేదు. ఆయన ఇన్వెస్టర్ అని చాలా మందికి తెలుసో తెలియదో కానీ ఒకప్పుడు ప్రపంచంలో అత్యధిక డబ్బు కలిగిన వ్యక్తి ఎవరు అంటే టక్కున వారెన్ బఫెట్ అని చెప్పేవాళ్లం. ఇప్పుడు ఆయన్ను దాటి వేరే వాళ్లు నెంబర్ వన్ స్థానాన్ని ఆక్రమించినా వారెన్ బఫెట్ ప్రత్యేకత వేరు. ఎలాంటి వ్యాపారం చేయకుండా, వస్తువుల ఉత్పత్తి లేకుండా, కేవలం స్టాక్ మార్కెట్లలో పెట్టుబడి పెట్టి లక్షల కోట్ల వ్యాపార సామ్రాజ్యాన్ని వారెన్ బఫెట్ నిర్మించారు. ప్రపంచంలోనే గొప్ప ఇన్వెస్టర్లలో బఫెట్ ఒకరు. ఒక టెక్స్‌టైల్ మిల్ నుంచి ఇప్పుడు లక్షల కోట్ల బిజినెస్‌కి ఓనర్ అయ్యారంటే అది కేవలం ఆయన ఇన్వెస్ట్‌మెంట్ చేసిన విధానంలో ఉన్న కొత్తదనమే. అందుకే చాలామంది ఇన్వెస్టర్లు ఇప్పటికీ వారెన్ బఫెట్ దారిలోనే నడుస్తుంటారు. ఇన్వెస్ట్‌మెంట్ చేయాలనుకునే వారికి వారెన్ బఫెట్ మార్గదర్శకులు. స్టాక్ మార్కెట్‌లో ఇన్వెస్ట్‌మెంట్ అంటేనే గుర్తొచ్చే వారెన్ బఫెట్ తన 95 ఏళ్ల వయసులో ఇక చాలు.. అంటూ బెర్క్‌షైర్ హాతవే కంపెనీ సీఈవో పదవి నుంచి తప్పుకున్నారు. ఆయన స్థానంలో బెర్క్‌షైర్ హాతవే కంపెనీ కార్యకలాపాలు నిర్వహిస్తున్న గ్రెగ్ అబెల్‌ సీఈవో పదవిని చేపట్టనున్నారు.

ముగిసిన Oracle of Omaha శకం

Oracle of Omaha గా పేరుగాంచిన వారెన్ బఫెట్ ఇన్వెస్టింగ్ శకం ముగిసింది. 7.60 డాలర్లు ఒక షేరుగా ఉన్న న్యూఇంగ్లండ్ టెక్స్‌టైల్ మిల్‌ని 1962 లో టేకోవర్ చేసిన వారెన్ బఫెట్.. దాన్ని అంచెలంచెలుగా డెవలప్ చేసి బెర్క్‌షైర్ స్టాక్‌గా పేరు మార్చి నేడు వందల బిలియన్ డాలర్ల కంపెనీగా ఒంటిచేత్తో తీర్చిదిద్దారు. ప్రస్తుతం బెర్క్‌షైర్ స్టాక్ ఒక్క షేర్ 7,50,000 డాలర్ల వద్ద ట్రేడ్ అవుతోంది. వారెన్ బఫెట్ వ్యక్తిగత సంపదే 150 బిలియన్ డాలర్లుగా ఉంది. అంటే మన కరెన్సీలో 13 లక్షల కోట్ల రూపాయలు. గత 20 ఏళ్ల నుంచి తన వ్యక్తిగత సంపద నుంచే దాదాపుగా 60 బిలియన్ డాలర్లను విరాళంగా ఇచ్చినా కూడా వారెన్ బఫెట్ వ్యక్తిగత సంపద పెరుగుతూ వచ్చింది తప్ప తగ్గలేదు. తన సంపదలో చాలా వరకు బిల్ అండ్ మెలిందా గేట్స్ ఫౌండేషన్‌కి దానం చేస్తుంటారు. మిగితాది మరికొన్ని చారిటబుల్ ట్రస్టులకు వారెన్ బఫెట్ విరాళంగా ఇస్తుంటారు.

భారీ లాభాలు తెచ్చిన కోకాకోలా, యాపిల్, అమెరికన్ ఎక్స్‌ప్రెస్ కంపెనీలు

వారెన్ బఫెట్‌ స్టాక్ మార్కెట్లలో ఒకే కంపెనీలో పెట్టుబడి పెట్టేవారు కాదు. తన ఫండ్స్‌ని డైవెర్షిఫై చేసేవారు. అంటే ఒకే కంపెనీలో మొత్తం పెట్టకుండా చాలా కంపెనీలలో కొంచెం కొంచెం ఇన్వెస్ట్ చేసేవారు. అలా దీర్ఘ కాలిక పెట్టుబడిలో భాగంగా అమెరికన్ ఎక్స్‌ప్రెస్, కోకాకోలా, యాపిల్ లాంటి కంపెనీలు ఒక్కసారిగా భారీ లాభాలను వారెన్ బఫెట్‌కి తెచ్చి పెట్టాయి. ఓవైపు ఇన్వెస్ట్‌మెంట్ చేస్తూనే మరోవైపు చాలా కంపెనీలను టేకోవర్ చేసి వాటిని కూడా లాభాల బాట పట్టించారు వారెన్ బఫెట్. మరి.. తనకు సమకాలికుడైన గ్రెగ్ అబెల్.. వారెన్ బఫెట్ నాయకత్వాన్ని అలాగే కొనసాగిస్తారా? అనేది చూడాలి.