Union Budget 2026 | కేవలం పన్నుల కోసమే కాదు.. దేశ భవిష్యత్తు కోసం! బడ్జెట్ ప్రసంగంలో భారీ మార్పు

Union Budget 2026 | త్రినేత్ర.న్యూస్ : కేంద్ర ఆర్థిక మంత్రి నిర్మలా సీతారామన్ ఈసారి కేంద్ర బడ్జెట్‌లో 75 ఏళ్ల నాటి సంప్రదాయానికి తెరదించబోతున్నారు. సాధారణంగా కేంద్ర బడ్జెట్ ప్రసంగంలో రెండు భాగాలు (Part A, Part B) ఉంటాయి. గత బడ్జెట్‌లలో, అసలైన పథకాలు, కేటాయింపులన్నీ 'పార్ట్-A'లో ఉండేవి. 'పార్ట్-B' కేవలం పన్నులు (Tax), విధానపరమైన ప్రకటనలకు మాత్రమే పరిమితం అయ్యేది. కానీ ఈసారి ఆ పద్ధతి మారనుంది. జాతీయ మీడియా కథనాల ప్రకారం, ఈసారి ఆర్థిక మంత్రి 'పార్ట్-B' ప్రసంగాన్ని కేవలం పన్నులకే పరిమితం చేయకుండా, భారతదేశ ఆర్థిక భవిష్యత్తుకు సంబంధించిన సమగ్ర "విజన్" (Vision) ను ఆవిష్కరించడానికి ఉపయోగించనున్నారు.

భారతదేశం 21వ శతాబ్దపు రెండో దశలోకి అడుగుపెడుతున్న తరుణంలో, దేశీయ బలాలు, అంతర్జాతీయ ఆశయాలను హైలైట్ చేస్తూ.. స్వల్పకాలిక, దీర్ఘకాలిక లక్ష్యాలను 'పార్ట్-B'లో వివరించే అవకాశం ఉంది. కేవలం రొటీన్ పన్ను మార్పులే కాకుండా, దేశం ఎటువైపు వెళ్తుందనే రోడ్‌మ్యాప్‌ను ఆర్థికవేత్తలు నిశితంగా గమనిస్తున్నారు.

నిర్మలా సీతారామన్ వరుసగా ప్రవేశపెడుతున్న 9వ బడ్జెట్ ఇది. 2019లో తన మొదటి బడ్జెట్ సమయంలోనే, దశాబ్దాలుగా వస్తున్న 'లెదర్ బ్రీఫ్‌కేస్' సంప్రదాయాన్ని పక్కనపెట్టి, ఎర్రటి వస్త్రంలో చుట్టిన సంప్రదాయ 'బహి-ఖాతా' (Bahi-Khata)ను ఆమె తీసుకొచ్చారు. గత నాలుగేళ్లుగా పేపర్‌లెస్ (డిజిటల్) బడ్జెట్‌ను ప్రవేశపెడుతున్న సంగతి తెలిసిందే.

ఆర్థిక గణాంకాలు, అంచనాలు

ఆర్థిక లోటును (Fiscal Deficit) జీడిపీలో 4.5 శాతానికి తగ్గించాలనే లక్ష్యాన్ని ప్రభుత్వం ఇప్పటికే నిర్దేశించుకుంది. ఈ నేపథ్యంలో, 2027 ఆర్థిక సంవత్సరానికి సంబంధించి అప్పులు, జీడిపీ నిష్పత్తి (Debt-to-GDP) తగ్గించడంపై బడ్జెట్‌లో ఎలాంటి దిశానిర్దేశం ఉంటుందో మార్కెట్ వర్గాలు ఆసక్తిగా చూస్తున్నాయి.

ప్రస్తుత ఆర్థిక సంవత్సరానికి మూలధన వ్యయం (Capital Expenditure) రూ.11.2 లక్షల కోట్లుగా ఉంది. ప్రైవేట్ రంగం పెట్టుబడుల విషయంలో ఆచితూచి వ్యవహరిస్తుండటంతో, ప్రభుత్వమే చొరవ తీసుకుని ఈసారి కూడా మూలధన వ్యయంపైనే ఎక్కువ దృష్టి పెట్టే అవకాశం ఉంది. ఈ టార్గెట్‌ను ప్రస్తుత స్థాయి కంటే 10-15 శాతం పెంచవచ్చని అంచనా.

వచ్చే ఆర్థిక సంవత్సరానికి (FY27) నామినల్ జీడిపీ వృద్ధిని 10.5 నుండి 11 శాతం మధ్య ప్రకటించే అవకాశం ఉంది. ఇది భవిష్యత్తు ద్రవ్యోల్బణం ఎలా ఉండబోతోందో ఒక అంచనాను ఇస్తుంది. అలాగే, 'జి రామ్ జి' (G RAM G) వంటి కీలక పథకాలతో పాటు, ఆరోగ్యం, విద్య లాంటి ముఖ్యమైన రంగాలపై ఖర్చు పెంచడంపైనే అందరి దృష్టి ఉంది.