IPO | వ‌చ్చే వారంలో ఐపీవోకు వ‌స్తున్న రెండు ఎస్ఎంఈ కంపెనీలు.. పెట్టుబ‌డిదారుల ఆస‌క్తి..

IPO | భారత ప్రైమరీ మార్కెట్ వచ్చే వారం కూడా చురుగ్గా కొనసాగనుంది. ప్రధాన బోర్డు ఐపీవోల కార్యకలాపాలు నెమ్మదిగా ఉన్నప్పటికీ, రెండు ఎస్‌ఎంఈ ఐపీవోలు పెట్టుబడిదారుల దృష్టిని ఆకర్షిస్తున్నాయి. ఆర్ఎఫ్బీఎల్ ఫ్లెక్సి ప్యాక్‌, గోల్డ్ లైన్ ఫార్మాసూటిక‌ల్ కంపెనీలు మే 12న సబ్‌స్క్రిప్షన్‌కు ఓపెన్ కానున్నాయి. ఈ రెండు ఇష్యూల ద్వారా కలిపి దాదాపు రూ.47 కోట్లు సమీకరించాలని ఆయా కంపెనీలు లక్ష్యంగా నిర్ణ‌యించుకున్నాయి. ఇందులో అతిపెద్ద ఇష్యూ ఆర్ఎఫ్‌బీఎల్ ఫ్లెక్సి ప్యాక్ ది కాగా ఈ సంస్థ పూర్తిగా ఫ్రెష్ ఇష్యూ రూపంలో 70.65 లక్షల షేర్లను విడుదల చేస్తూ రూ.35.33 కోట్లు సమీకరించనుంది. ఒక్కో షేర్ ధరను రూ.47 నుంచి రూ.50 మధ్య నిర్ణయించింది. గరిష్ట ధర ప్రకారం చూస్తే రిటైల్ పెట్టుబడిదారులు కనీసం 6వేల షేర్ల కోసం దాదాపు రూ.3 లక్షలు పెట్టుబడి పెట్టాల్సి ఉంటుంది. ఈ షేర్ NSE SME ప్లాట్‌ఫామ్‌లో లిస్ట్ కానుంది. ప్రస్తుతం ఈ ఐపీవోకు గ్రే మార్కెట్ ప్రీమియం (GMP) శూన్యంగా ఉన్నట్లు మార్కెట్ వర్గాలు చెబుతున్నాయి.

ఆర్ఎఫ్‌బీఎల్ ఫ్లెక్సి ప్యాక్..

2005లో స్థాపితమైన ఆర్ఎఫ్‌బీఎల్ ఫ్లెక్సి ప్యాక్ మల్టీలేయర్ ఫ్లెక్సిబుల్ ప్యాకేజింగ్ మెటీరియల్స్ తయారీ, ట్రేడింగ్ వ్యాపారంలో ఉంది. ముఖ్యంగా ఫుడ్, ఫార్మాసూటికల్, హోమ్ కేర్ రంగాలకు ఉపయోగించే ప్రింటెడ్ ప్లాస్టిక్ ఫిల్మ్ రోల్స్, పౌచ్‌లు తయారు చేస్తోంది. గుజరాత్‌కు చెందిన ఈ సంస్థ B2B మోడల్‌లో పనిచేస్తూ BOPP, CPP, లామినేటెడ్ ఫిల్మ్స్ ఆధారిత కస్టమైజ్డ్ ప్యాకేజింగ్ సొల్యూషన్స్ అందిస్తోంది. ఆర్థిక ఫలితాల పరంగా చూస్తే, 2025 ఆర్థిక సంవత్సరంలో సంస్థ మొత్తం ఆదాయం రూ.135.46 కోట్లకు చేరుకుంది. గతేడాది ఇదే కాలంలో ఇది రూ.79.96 కోట్లుగా ఉంది. పన్నుల తర్వాత లాభం రూ.5.79 కోట్ల నుంచి రూ.8.33 కోట్లకు పెరిగింది. ఐపీవో ద్వారా సమీకరించే నిధులను క్యాపిటల్ ఎక్స్‌పెండిచర్, వర్కింగ్ క్యాపిటల్ అవసరాలు, సాధారణ కార్పొరేట్ అవసరాలకు వినియోగించనున్నట్లు కంపెనీ తెలిపింది.

గోల్డ్‌లైన్ ఫార్మాసూటిక‌ల్..

మరోవైపు గోల్డ్‌లైన్ ఫార్మాసూటిక‌ల్ రూ.11.61 కోట్లు సమీకరించేందుకు 27 లక్షల ఫ్రెష్ షేర్లను విడుదల చేయనుంది. ఒక్కో షేర్ ధరను రూ.41 నుంచి రూ.43 మధ్య నిర్ణయించారు. కనీసం 6వేల షేర్ల కోసం రిటైల్ ఇన్వెస్టర్లు సుమారు రూ.2.58 లక్షలు పెట్టుబడి పెట్టాల్సి ఉంటుంది. ఈ షేర్ BSE SME ప్లాట్‌ఫామ్‌లో లిస్ట్ కానుంది. గోల్డ్‌లైన్ ఫార్మాసూటిక‌ల్ అసెట్-లైట్ ఫార్మా మార్కెటింగ్ మోడల్‌లో పనిచేస్తోంది. కంపెనీ స్వయంగా మందులు తయారు చేయకుండా, థర్డ్ పార్టీ తయారీదారులతో ఒప్పందాలు కుదుర్చుకుని గోల్డ్ లైన్ బ్రాండ్ పేరుతో మార్కెటింగ్ చేస్తోంది. కార్డియాలజీ, ఆర్థోపెడిక్స్, పీడియాట్రిక్స్, డయాబెటిస్ కేర్, క్రిటికల్ కేర్ వంటి విభాగాల్లో మందులను విక్రయిస్తోంది. మహారాష్ట్ర, మధ్యప్రదేశ్, ఒడిశా, జార్ఖండ్, తమిళనాడు, రాజస్థాన్, బీహార్ రాష్ట్రాల్లో కంపెనీ ఉత్పత్తులు అందుబాటులో ఉన్నాయి.

మే 14 వ‌ర‌కు గ‌డువు..

గోల్డ్‌లైన్ ఫార్మాసూటిక‌ల్ కంపెనీ ఆర్థిక ఫలితాల ప్రకారం, 2025 ఆర్థిక సంవత్సరంలో ఆదాయం రూ.28.06 కోట్లకు పెరిగింది. గతేడాది ఇది రూ.23.57 కోట్లుగా ఉంది. పన్నుల తర్వాత లాభం రూ.1.81 కోట్ల నుంచి రూ.2.83 కోట్లకు పెరిగింది. ఐపీవో ద్వారా సమీకరించే నిధుల్లో ఎక్కువ భాగాన్ని రూ.8.35 కోట్ల అప్పుల చెల్లింపుకు వినియోగించనున్నట్లు సంస్థ వెల్లడించింది. ఈ రెండు ఐపీవోల సబ్‌స్క్రిప్షన్ మే 14తో ముగియనుండగా, మే 19న తాత్కాలికంగా లిస్టింగ్ జరగనుంది. ప్రధాన బోర్డు ఐపీవోలు ప్రస్తుతం మందగమనంలో ఉన్న సమయంలో, SME విభాగం మాత్రం పెట్టుబడిదారుల ఆసక్తిని కొనసాగిస్తున్నట్లు మార్కెట్ విశ్లేషకులు అభిప్రాయపడుతున్నారు.