TCS Dividend | ఈ వారం డివిడెండ్‌ ప్రకటించిన 4 స్టాక్స్‌.. రికార్డు తేదీలు ఇవే..

TCS Dividend | ఈ వారం స్టాక్‌ మార్కెట్‌లో టాటా కన్సల్టెన్సీ సర్వీసెస్‌ (టీసీఎస్‌), వేదాంత, ఆనంద్‌ రాఠీ వెల్త్‌, కెరా రొబెకో అసెట్‌ మేనేజ్‌మెంట్‌ కంపెనీ షేర్లు మదుపర్ల దృష్టిని ఆకర్షించనున్నాయి. ఈ నాలుగు కంపెనీలు తమ మధ్యంతర డివిడెండ్లకు సంబంధించి అక్టోబర్‌ 14 నుంచి అక్టోబర్ 16 మధ్య రికార్డు తేదీలను నిర్ణయించాయి. డివిడెండ్‌ చెల్లింపుల కోసం అర్హులైన వాటాదారులను గుర్తించేందుకు ఈ తేదీలను ఖరారు చేశాయి. రికార్డు తేదీ అంటే.. డివిడెండ్‌ పొందేందుకు అర్హులైన వాటాదారులను నిర్ణయించే తేదీ. ఎక్స్‌-డివిడెండ్‌ తేదీ సాధారణంగా రికార్డు తేదీకి సమీపంలో ఉంటుంది. ఈ తేదీ నుంచి డివిడెండ్‌ చెల్లింపును పరిగణనలోకి తీసుకుని షేరు ధరలో మార్పులు చోటుచేసుకుంటాయి.

టాటా కన్సల్టెన్సీ సర్వీసెస్‌ (టీసీఎస్‌)..

టాటా కన్సల్టెన్సీ సర్వీసెస్‌ (టీసీఎస్‌) 2026-27 ఆర్థిక సంవత్సరానికి సంబంధించి ఒక్కో ఈక్విటీ షేరుపై రూ.12 చొప్పున రెండో మధ్యంతర డివిడెండ్‌ను ప్రకటించింది. సెప్టెంబర్‌ త్రైమాసిక ఆర్థిక ఫలితాలతోపాటు ఈ ప్రకటన చేసింది. డివిడెండ్‌ పొందేందుకు అర్హులైన వాటాదారులను గుర్తించడానికి అక్టోబర్‌ 14ను రికార్డు తేదీగా నిర్ణయించింది. అక్టోబర్‌ 30న డివిడెండ్‌ చెల్లించనుంది. అక్టోబర్ 8న జరిగిన కంపెనీ డైరెక్టర్ల బోర్డు సమావేశంలో ఈ నిర్ణయం తీసుకుంది. ఒక్కో షేరు ముఖ విలువ రూ.1గా ఉంది. 2026-27 ఆర్థిక సంవత్సరానికి టీసీఎస్‌ ప్రకటించిన రెండో మధ్యంతర డివిడెండ్‌ ఇది. అంతకుముందు జూలైలో ఒక్కో షేరుపై రూ.12 మధ్యంతర డివిడెండ్‌ను ప్రకటించింది. దీంతో ప్రస్తుత ఆర్థిక సంవత్సరంలో ఇప్పటివరకు ప్రకటించిన మధ్యంతర డివిడెండ్‌ మొత్తం ఒక్కో షేరుకు రూ.24కు చేరింది.

కెనరా రొబెకో అసెట్‌ మేనేజ్‌మెంట్‌ కంపెనీ..

కెనరా రొబెకో అసెట్‌ మేనేజ్‌మెంట్‌ కంపెనీ (కెనరా రొబెకో ఏఎంసీ) 2026-27 ఆర్థిక సంవత్సరానికి ఒక్కో ఈక్విటీ షేరుపై రూ.2 మధ్యంతర డివిడెండ్‌ను ప్రకటించింది. ఈ మేరకు స్టాక్‌ ఎక్స్ఛేంజీలకు సమాచారం అందించింది. ఒక్కో షేరు ముఖ విలువ రూ.10 కాగా, ప్రకటించిన డివిడెండ్‌ దానిలో 20 శాతానికి సమానం. డివిడెండ్‌కు అర్హులైన వాటాదారులను గుర్తించేందుకు అక్టోబర్‌ 16, శుక్రవారాన్ని రికార్డు తేదీగా నిర్ణయించింది. డివిడెండ్‌ ప్రకటించిన తేదీ నుంచి 30 రోజుల్లోగా చెల్లింపులు పూర్తి చేయనుంది. రికార్డు తేదీ నాటికి కంపెనీ వాటాదారుల రిజిస్టర్‌లో లేదా డిపాజిటరీ రికార్డుల్లో పేర్లు నమోదైన వారికి ఈ డివిడెండ్‌ అందుతుంది.

వేదాంత లిమిటెడ్‌..

వేదాంత లిమిటెడ్‌ 2026-27 ఆర్థిక సంవత్సరానికి ఒక్కో ఈక్విటీ షేరుపై రూ.5 చొప్పున తొలి మధ్యంతర డివిడెండ్‌ను ప్రకటించింది. ఒక్కో షేరు ముఖ విలువ రూ.1గా ఉంది. ఈ డివిడెండ్‌ చెల్లింపుల కోసం కంపెనీ మొత్తం సుమారు రూ.1,955 కోట్లను వెచ్చించనుంది. అర్హులైన వాటాదారులను గుర్తించేందుకు అక్టోబర్ 14ను రికార్డు తేదీగా నిర్ణయించింది. అలాగే ఆనంద్‌ రాఠీ వెల్త్‌ లిమిటెడ్‌ 2026-27 ఆర్థిక సంవత్సరానికి ఒక్కో ఈక్విటీ షేరుపై రూ.4 మధ్యంతర డివిడెండ్‌ను ప్రకటించింది. ఒక్కో షేరు ముఖ విలువ రూ.5 కాగా, ఈ డివిడెండ్‌ దానిలో 80 శాతానికి సమానం. డివిడెండ్‌ పొందేందుకు అర్హులైన వాటాదారులను గుర్తించడానికి అక్టోబర్‌ 15ను రికార్డు తేదీగా నిర్ణయించింది. ఈ నాలుగు కంపెనీల డివిడెండ్‌ ప్రకటనల నేపథ్యంలో ఈ వారం ఆయా షేర్లు మదుపర్ల దృష్టిలో ఉండనున్నాయి. అయితే, డివిడెండ్‌ పొందాలనుకునే వారు రికార్డు తేదీతోపాటు సంబంధిత ఎక్స్‌-డివిడెండ్‌ తేదీ, అర్హత నిబంధనలను కూడా పరిశీలించాలి.