Diwali Muhurat Trading | దీపావళి ముహూర్త ట్రేడింగ్‌లో లాభాల వెలుగులు.. ఆరేళ్ల రికార్డు ఊపుతో ‘సంవత్ 2083’కి గ్రాండ్ వెల్‌కమ్!

Diwali Muhurat Trading | త్రినేత్ర న్యూస్ : దీపావళి పండుగ సందర్భంగా నిర్వహించిన ప్రత్యేక 'ముహూర్త ట్రేడింగ్' (Muhurat Trading) సెషన్‌లో దేశీయ స్టాక్ మార్కెట్లు లాభాలతో కళకళలాడాయి. కొత్త హిందూ క్యాలెండర్ ఏడాది 'సంవత్ 2083' (Samvat 2083) ప్రారంభాన్ని పురస్కరించుకుని మధ్యాహ్నం 2:20 గంటలకు మొదలైన 70 నిమిషాల ప్రత్యేక సెషన్‌లో బెంచ్‌మార్క్ సూచీలు గ్రీన్‌లో ఓపెన్ అయ్యాయి. ట్రేడింగ్ ఆరంభంలోనే సెన్సెక్స్ (Sensex) 250 పాయింట్లు లాభపడగా, నిఫ్టీ (Nifty) 40 పాయింట్లు ఎగబాకింది.

ప్రతి ఏటా దీపావళి రోజున నిర్వహించే ఈ స్పెషల్ ట్రేడింగ్ సెషన్ పాజిటివ్ నోట్‌తో ముగియడం ఆనవాయితీగా వస్తోంది. ఈ ఏడాది మధ్యాహ్నం 2:20 గంటల నుంచి 3:30 గంటల వరకు స్టాక్ మార్కెట్లు పనిచేశాయి. అటు మల్టీ కమోడిటీ ఎక్స్ఛేంజ్ (MCX) కూడా ఇదే టైమ్ విండోను పాటించింది. కొత్త సంవత్ ఆరంభంలో షేర్లు కొనుగోలు చేస్తే ఏడాది పొడవునా సంపద, సానుకూల ఊపు (Positive Momentum) కొనసాగుతాయనే నమ్మకంతో ఇన్వెస్టర్లు ఈ సెషన్‌ను ఎంతో సెంటిమెంట్‌గా భావిస్తారు.

మరోవైపు, గత ఆరేళ్లలో ఎన్నడూ లేని విధంగా భారీ వీక్లీ గెయిన్స్ (Weekly Gains) నమోదు చేసిన ఉత్సాహంతో భారత మార్కెట్లు 'సంవత్ 2083'లోకి బుల్లిష్ (Bullish) నోట్‌తో అడుగుపెట్టాయి. గత ఒక్క వారంలోనే నిఫ్టీ ఏకంగా 8 శాతానికి పైగా లాభపడటం విశేషం. సెన్సెక్స్, నిఫ్టీ వరుసగా ఏడు ట్రేడింగ్ సెషన్ల పాటు తమ ర్యాలీని కొనసాగించడంతో, కొత్త ఏడాదిపై ఇన్వెస్టర్లలో రెట్టింపు ఆశాభావం కనిపిస్తోంది.