Chennai | డబుల్స్‌ టైటిల్‌పై వైష్ణవి, రుతుజ కన్ను

• డబ్ల్యూటీఏ ఫైనల్లో భారత జోడీ.. చరిత్రకు అడుగు దూరంలో..

Chennai | భారత మహిళల టెన్నిస్‌లో చరిత్ర సృష్టించేందుకు వైష్ణవి అడ్కర్‌, రుతుజా భోసలే సిద్ధమయ్యారు. చెన్నైలోని ఎస్‌డీఏటీ టెన్నిస్‌ స్టేడియంలో జరుగుతున్న డబ్ల్యూటీఏ టోర్నీ మహిళల డబుల్స్‌ ఫైనల్లో ఈ భారత జోడీ స్విట్జర్లాండ్‌కు చెందిన నైమా కరమోకో, సిమోనా వాల్టర్‌లతో తలపడనుంది. ఈ టైటిల్‌ పోరు నేడు సాయంత్రం 4 గంటలకు ప్రారంభం కానుంది. ఈ ఫైనల్‌తో వైష్ణవి, రుతుజ అరుదైన ఘనత సాధించనున్నారు. డబ్ల్యూటీఏ టూర్‌ స్థాయి డబుల్స్‌ ఫైనల్‌కు చేరిన తొలి భారత మహిళల జోడీగా చరిత్రకెక్కనున్నారు. సెమీఫైనల్లో రెండో సీడ్‌ జోడీ వెరోనికా ఫాల్కోవ్‌స్కా, అలానా స్మిత్‌పై 6-2, 2-6, (10-8)తో ఉత్కంఠ విజయం సాధించి తుదిపోరుకు అర్హత సాధించారు. ఫైనల్లోనూ ఇదే జోరు కొనసాగించి టైటిల్‌ అందుకోవాలని భారత జోడీ పట్టుదలగా ఉంది. విజయం సాధిస్తే భారత మహిళల టెన్నిస్‌లో ఇదొక మైలురాయిగా నిలవనుంది.