PM Modi | నక్సలిజంపై విజయం.. సైనికులతో దీపావళి వేడుకలు

• దేశంలోని ప్రతి జిల్లా నక్సల్‌ రహితం..
• జవాన్ల త్యాగాల ఫలితమేనన్న ప్రధాని మోదీ

PM Modi | దేశంలో నక్సలిజంపై విజయం సాధించిన తర్వాత వస్తున్న తొలి దీపావళి ఇదేనని ప్రధాని నరేంద్ర మోదీ అన్నారు. ఛత్తీస్‌గఢ్‌లోని బస్తర్‌ జిల్లా కరణ్‌పూర్‌లో భద్రతా బలగాలతో కలిసి దీపావళి వేడుకల్లో పాల్గొన్నారు. ఈ సందర్భంగా జవాన్లను ఉద్దేశించి ప్రసంగిస్తూ.. దేశంలోని ప్రతి జిల్లా నక్సల్‌ రహితంగా మారడం అసాధారణ విజయమని పేర్కొన్నారు. ఈ ఘనత భద్రతా బలగాల త్యాగాలు, అంకితభావానికే దక్కుతుందని కొనియాడారు. దేశ రక్షణ కోసం సరిహద్దుల్లోనే కాకుండా అంతర్గతంగా పోరాడుతున్న ప్రతి జవాను తన కుటుంబ సభ్యుడేనని మోదీ అన్నారు. 140 కోట్ల మంది భారతీయుల తరఫున భద్రతా సిబ్బందికి కృతజ్ఞతలు తెలిపేందుకు దీపావళి వేళ వారి మధ్యకు వచ్చానన్నారు. ఒకప్పుడు నక్సలిజానికి కేంద్రంగా ఉన్న బస్తర్‌లో ఇప్పుడు అభివృద్ధి కొత్త వెలుగులు నింపుతోందని చెప్పారు.

నక్సలిజం ముప్పు పూర్తిగా తొలగిపోలేదు

సాయుధ మావోయిస్టుల ప్రభావం తగ్గినా.. భావజాలం పేరుతో ప్రజలను రాజ్యాంగం, ప్రజాస్వామ్యానికి వ్యతిరేకంగా రెచ్చగొట్టే శక్తుల పట్ల అప్రమత్తంగా ఉండాలని ప్రధాని హెచ్చరించారు. ఇలాంటి శక్తులు రాజకీయ పార్టీలు, వివిధ సంస్థల్లోకి చొరబడ్డాయని ఆరోపించారు. వారిని గుర్తించి ఓడించాల్సిన అవసరం ఉందన్నారు. 2004-2013 మధ్య నక్సలిజాన్ని నయం చేయలేని సమస్యగా గత ప్రభుత్వాలు భావించాయని మోదీ విమర్శించారు. 2010లో దంతెవాడలో జరిగిన ఘటనల్లో 76 మంది సీఆర్‌పీఎఫ్‌ జవాన్లు, మరో ఘటనలో 44 మంది పౌరులు ప్రాణాలు కోల్పోయారని గుర్తుచేశారు. ఛత్తీస్‌గఢ్‌లోనే వెయ్యి మందికి పైగా భద్రతా సిబ్బంది మావోయిస్టుల దాడుల్లో అమరులయ్యారని తెలిపారు.

47 ఏళ్లలో తొలిసారి కీలక విజయం

2014 తర్వాత నక్సలిజంపై పోరులో రాజకీయ సంకల్పం, వ్యూహం మారాయని మోదీ చెప్పారు. గత ఏడాది విధి నిర్వహణలో ఒక్క సీఆర్‌పీఎఫ్‌ జవాను కూడా ప్రాణాలు కోల్పోలేదని వెల్లడించారు. 47 ఏళ్లలో ఇదొక కీలక విజయమని పేర్కొన్నారు. నక్సల్స్‌ ఆర్థిక మూలాలను దెబ్బతీయడం, నకిలీ కరెన్సీ నెట్‌వర్క్‌ను కట్టడి చేయడం, ఆయుధాల సరఫరా, నియామకాలను అడ్డుకోవడం ద్వారా మావోయిస్టు ఉగ్రవాదం వెన్ను విరిచామన్నారు. నక్సల్స్‌ ప్రభావిత ప్రాంతాల్లో ప్రజల జీవన ప్రమాణాలు మెరుగుపరిచేందుకు ప్రభుత్వం చర్యలు చేపట్టిందని చెప్పారు. గత 12 ఏళ్లలో దేశంలో 50 కోట్ల మంది అత్యంత పేదరికం నుంచి బయటపడ్డారని ప్రపంచ బ్యాంకు నివేదిక వెల్లడించినట్లు పేర్కొన్నారు. పేదరిక నిర్మూలనతోపాటు నక్సలిజం, వేర్పాటువాదంపై కూడా దేశం విజయం సాధిస్తోందన్నారు. ఈ సందర్భంగా సీఆర్‌పీఎఫ్‌, కోబ్రా, బీఎస్‌ఎఫ్‌, ఐటీబీపీ, ఎస్‌ఎస్‌బీ, రాష్ట్ర పోలీసు బలగాలు, బస్తర్‌ ఫైటర్స్‌, మహిళా భద్రతా సిబ్బంది సేవలను ప్రధాని ప్రత్యేకంగా ప్రశంసించారు. అంతకుముందు కరణ్‌పూర్‌లోని కోబ్రా ఆపరేషన్స్‌ బేస్‌ను సందర్శించారు. బస్తర్‌, అబూజ్‌మఢ్‌ ప్రాంతాల్లో నక్సల్స్‌ వ్యతిరేక ఆపరేషన్లకు ఈ కేంద్రం శిక్షణ, కార్యాచరణ స్థావరంగా పనిచేసింది.