Investor Sentiment | ఇన్వెస్ట‌ర్ల‌లో అధిక‌మ‌వుతున్న ఆందోళ‌న‌.. ఏడాది కాలంలో భారీగా త‌గ్గిన సెంటిమెంట్‌..

Investor Sentiment | అమెరికా మార్కెట్లలో ఇన్వెస్టర్ల సెంటిమెంట్ 2025 తర్వాత కనిష్ఠ స్థాయికి పడిపోయింది. చమురు ధరలు అధిక స్థాయిలో కొనసాగుతుండడం, ఫెడరల్ రిజర్వ్ 2023 తర్వాత తొలిసారిగా వడ్డీ రేట్లను పెంచడం వంటి పరిణామాలు మార్కెట్‌ల‌పై ప్రతికూల ప్రభావం చూపుతున్నాయి. అమెరికన్ అసోసియేషన్ ఆఫ్ ఇండివిడ్యువల్ ఇన్వెస్టర్స్ విడుదల చేసిన తాజా వారపు సర్వేలో ఈ విషయం వెల్లడైంది. సర్వేలో పాల్గొన్న ఇన్వెస్టర్లలో ఏకంగా 53.3 శాతం మంది మార్కెట్‌ల‌పై బేరిష్‌గా ఉన్నట్లు తెలిపారు. మరోవైపు కేవలం 28.8 శాతం మంది మాత్రమే బుల్లిష్‌గా ఉన్నారు. ఏడాది కాలంలో నమోదైన బుల్లిష్ సెంటిమెంట్‌లో ఇదే అత్యల్ప స్థాయి కావడం గమనార్హం.

భారీగా త‌గ్గిన సెంటిమెంట్‌..

బుల్స్, బేర్స్ మధ్య వ్యత్యాసం మైనస్ 24.5 శాతానికి పడిపోయింది. ఇది సాధారణ స్థాయితో పోలిస్తే చాలా తక్కువగా ఉందని అమెరికన్ అసోసియేషన్ ఆఫ్ ఇండివిడ్యువల్ ఇన్వెస్టర్స్ వైస్ ప్రెసిడెంట్ చార్లెస్ రోట్‌బ్లట్ తెలిపారు. చారిత్రక సగటు 6.5 శాతంతో పోలిస్తే ఈ సూచీ వరుసగా తొమ్మిదో వారంలోనూ దిగువన కొనసాగుతోంది. చివరిసారిగా 2025 మేలో ఇంత తక్కువ స్థాయి నమోదైంది. ఇన్వెస్టర్ సెంటిమెంట్ సూచీని కొంతమంది ట్రేడర్లు విరుద్ధ సూచికగా కూడా ఉపయోగిస్తారు. సెంటిమెంట్ అధికంగా ఉన్నప్పుడు మార్కెట్‌లో అతివిశ్వాసం ఉంటుంద‌ని, తక్కువగా ఉన్నప్పుడు ఇన్వెస్టర్లలో భయం పెరుగుతుంద‌ని భావిస్తారు. తాజా సర్వే సమయంలో ఎస్‌అండ్‌పీ 500 సూచీ తన ఆల్‌టైమ్ గరిష్ఠ స్థాయి నుంచి సుమారు 2 శాతం దూరంలో ఉంది. వేసవి చివరి దశలో మార్కెట్లలో చోటుచేసుకున్న అస్థిరత కూడా ఇన్వెస్టర్ల సెంటిమెంట్‌పై ప్రభావం చూపినట్లు సర్వే ఫలితాలు సూచిస్తున్నాయి.

ఇదే సమయంలో సర్వేలో పాల్గొన్న ఇన్వెస్టర్లలో సగానికి పైగా సాధారణ స్థాయితో పోలిస్తే తమ పెట్టుబడుల్లో నగదు కేటాయింపును పెంచినట్లు తెలిపారు. ఏకంగా 19.1 శాతం మంది తమ నగదు కేటాయింపులు సాధారణం కంటే చాలా ఎక్కువగా ఉన్నాయని వెల్లడించారు. మార్కెట్‌లో అనిశ్చితి పెరగడంతో కొంతమంది ఇన్వెస్టర్లు మరింత జాగ్రత్తగా వ్యవహరిస్తున్నారనే సంకేతాలను ఇది సూచిస్తోంది.