ETF | సెప్టెంబర్ 1 నుంచి గోల్డ్, సిల్వర్ ఈటీఎఫ్‌లలో భారీ మార్పులు

ETF | భారతీయ సెక్యూరిటీస్ అండ్ ఎక్స్చేంజ్ బోర్డ్ (సెబీ) సెప్టెంబర్ 1 నుంచి సవరించిన ఈటీఎఫ్ ఫ్రేమ్‌వర్క్‌ను అమల్లోకి తీసుకురానుంది. దీంతో గోల్డ్, సిల్వర్ ఎక్స్చేంజ్ ట్రేడెడ్ ఫండ్స్ (ఈటీఎఫ్‌లు)లో ట్రేడింగ్ విధానంలో కీలక మార్పులు చోటుచేసుకోనున్నాయి. ధరల నిర్ణయ ప్రక్రియను మెరుగుపరచడం, పారదర్శకతను పెంచడం, ఇన్వెస్టర్ల రక్షణను బలోపేతం చేయడం ఈ కొత్త నిబంధనల ప్రధాన లక్ష్యంగా ఉంది. ఈ మార్పులతో గోల్డ్, సిల్వర్ ట్రేడింగ్‌లో కొత్త దశ ప్రారంభం కానుంది. ముఖ్యంగా కమోడిటీ ఈటీఎఫ్‌లను కేంద్రంగా చేసుకుని ప్రపంచ మార్కెట్లకు అనుగుణంగా ధరలు ప్రతిబింబించేలా వ్యవస్థను రూపొందించారు. దీంతో మార్కెట్ ల‌లో పాల్గొనేవారిలో విశ్వాసం మరింత పెరిగే అవకాశం ఉంటుంది. ప్రస్తుతం గోల్డ్, సిల్వర్ ఈటీఎఫ్‌ల ధరలు అంతర్జాతీయ కమోడిటీ మార్కెట్లలో రాత్రిపూట చోటుచేసుకున్న ధరల మార్పులను వెంటనే ప్రతిబింబించడంలో విఫలమవుతున్నాయి. ఈ సమస్యను పరిష్కరించేందుకు సెబీ ప్రీ-ఓపెన్ కాల్ ఆక్షన్ విధానం, డైనమిక్ ప్రైస్ బ్యాండ్లను ప్రవేశపెడుతోంది.

వీడబ్ల్యూఏపీ ఆధారంగా రిఫ‌రెన్స్ ధ‌ర లెక్కింపు..

కొత్త విధానం ప్రకారం గోల్డ్, సిల్వర్ ఈటీఎఫ్‌ల ట్రేడింగ్ ప్రారంభంలో ±6 శాతం ధరల పరిధిలో ఉంటుంది. అవసరమైతే కూలింగ్-ఆఫ్ కాలం తర్వాత ఈ పరిమితిని ప్రతి దశలో మరో 3 శాతం చొప్పున విస్తరిస్తారు. ప్రస్తుతం ఉన్న విధానానికి భిన్నంగా, ఒక ట్రేడింగ్ సెషన్‌లో ఎన్ని సార్లైనా ఈ ప్రైస్ బ్యాండ్‌ను విస్తరించే అవకాశం ఉంటుంది. దీనికి ఎలాంటి గరిష్ట పరిమితి ఉండదు. సెబీ ఈటీఎఫ్‌ల బేస్ ప్రైస్ నిర్ణయించే విధానంలో కూడా మార్పులు చేసింది. ఈ ఏడాది సెప్టెంబర్ నుంచి గత ట్రేడింగ్ రోజు చివరి 30 నిమిషాల వాల్యూమ్ వెయిటెడ్ యావరేజ్ ప్రైస్ (వీడబ్ల్యూఏపీ) ఆధారంగా లెక్కించిన క్లోజింగ్ ధరను రిఫరెన్స్ ప్రైస్‌గా పరిగణిస్తారు. ఈ మార్పు వల్ల మార్కెట్‌లో అధిక హెచ్చుతగ్గులు ఉన్న సమయంలో ఏర్పడే ప్రీమియంలు, డిస్కౌంట్లు తగ్గే అవకాశం ఉంటుంది. తద్వారా ధరల నిర్ణయం మరింత సమర్థవంతంగా మారుతుందని నిపుణులు భావిస్తున్నారు.

ఈక్విటీ ఈటీఎఫ్‌ల‌కు డైన‌మిక్ బ్యాండ్లు..

ఈక్విటీ ఈటీఎఫ్‌లకు ప్రస్తుతం ఉన్న స్థిరమైన ±10 శాతం ప్రైస్ బ్యాండ్ స్థానంలో డైనమిక్ బ్యాండ్లు అమల్లోకి వస్తాయి. ప్రారంభంలో ±10 శాతం ఉండి, కూలింగ్-ఆఫ్ తర్వాత ±20 శాతం వరకు విస్తరిస్తాయి. డెట్ ఈటీఎఫ్‌లకు కూడా ఇదే డైనమిక్ బ్యాండ్ విధానం వర్తిస్తుంది. లిక్విడ్ ఈటీఎఫ్‌లలో ప్రస్తుతం ఉన్న ±5 శాతం బ్యాండ్ యథాతథంగా కొనసాగుతుంది. ఓవర్‌నైట్ ఈటీఎఫ్‌లలో కూడా ±5 శాతం బ్యాండ్ కొనసాగుతుంది కానీ, క్లోజ్-అవుట్ నిబంధనల్లో మార్పులు చేస్తారు. కమోడిటీ ఈటీఎఫ్‌లలో ప్రస్తుతం ఉన్న ±5 నుంచి ±10 శాతం బ్యాండ్ స్థానంలో ప్రీ-ఓపెన్ ఆక్షన్ విధానం, ప్రారంభంలో ±6 శాతం డైనమిక్ బ్యాండ్, ఆపై 3 శాతం చొప్పున విస్తరణ విధానం అమల్లోకి వస్తుంది. దీనికి ఎలాంటి గరిష్ట పరిమితి ఉండదు.

స్వల్ప‌కాలిక పెట్టుబ‌డులు రిస్కే..

లిక్విడ్, ఓవర్‌నైట్ ఈటీఎఫ్‌ల క్లోజ్-అవుట్ విధానాన్ని కూడా సెబీ సవరించింది. మరింత న్యాయమైన సెటిల్‌మెంట్లు జరిగేలా, మార్కెట్ వక్రీకరణలు తగ్గేలా కొత్త ధరల నిర్ణయ వ్యవస్థను తీసుకువస్తోంది. ఈ మార్పులు కూడా సెప్టెంబర్ 1 నుంచే అమల్లోకి వస్తాయి. ధరల సామర్థ్యాన్ని మెరుగుపరచడం, పారదర్శకతను పెంచడం, లిక్విడిటీని బలోపేతం చేయడం, భారత ఈటీఎఫ్ వ్యవస్థను అంతర్జాతీయ ప్రమాణాలకు అనుగుణంగా మార్చడమే ఈ సంస్కరణల ప్రధాన ఉద్దేశ్యమ‌ని సెబీ తెలిపింది. అయితే ఈ మార్పులు వచ్చినప్పటికీ గోల్డ్ ఈటీఎఫ్‌లు ప్రధానంగా దీర్ఘకాలిక పెట్టుబడులు, పోర్ట్‌ఫోలియో వైవిధ్యీకరణ, సంపద సృష్టి కోసం అనుకూలమని గుర్తుంచుకోవాలి. స్వల్పకాలిక ట్రేడింగ్ లేదా అధిక రిస్క్‌తో కూడిన టైమింగ్ ఆధారిత పెట్టుబడులకు ఇవి సరైన ఎంపికగా ఉండవు. గోల్డ్ ఈటీఎఫ్‌లు, సిల్వర్ ఈటీఎఫ్‌లు లేదా ఇతర సంబంధిత ఆస్తి తరగతుల్లో పెట్టుబడి పెట్టాలనుకునే వారు తప్పనిసరిగా గుర్తింపు పొందిన ఫైనాన్షియల్ అడ్వైజర్‌ను సంప్రదించి నిర్ణయం తీసుకోవడం మంచిది.