Retail Inflation | ఇంధ‌న ధ‌ర‌ల ప్ర‌భావం.. పెరిగిన రిటైల్ ద్ర‌వ్యోల్బ‌ణం..!

Retail Inflation | దేశంలో ఆహారం, ఇంధన ధరల పెరుగుదల ప్రభావం స్పష్టంగా కనిపిస్తోంది. ఈ పరిణామాల నేపథ్యంలో మే నెలలో రిటైల్ ద్రవ్యోల్బణం 3.93 శాతానికి పెరిగింది. అయితే, రిజర్వ్ బ్యాంక్ నిర్దేశించిన 4 శాతం లక్ష్యానికి దిగువగానే ఉండటం కొంత ఊరటనిచ్చే అంశం. వరుసగా 16వ నెలగా ద్రవ్యోల్బణం టార్గెట్ ప‌రిధిలోనే నమోదవడం గమనార్హం. నెలవారీగా చూస్తే పెరుగుదల స్పష్టంగా క‌నిపించింది. ఏప్రిల్‌లో 3.48 శాతంగా ఉన్న రిటైల్ ద్రవ్యోల్బణం మేలో 3.93 శాతానికి ఎగసింది. జాతీయ గణాంకాల కార్యాలయం (NSO) శుక్రవారం విడుదల చేసిన గణాంకాల ప్రకారం.. ఈ పెరుగుదలకు ప్రధాన కారణం ఆహార వస్తువుల ధరల పెరుగుదలే. కన్స్యూమర్ ప్రైస్ ఇండెక్స్ ఆధారంగా ఆహార ద్రవ్యోల్బణం మేలో 4.78 శాతానికి చేరింది. ఏప్రిల్‌లో ఇది 4.2 శాతంగా ఉండటంతో, నిత్యావసరాల ఖర్చులు పెరిగి సాధారణ కుటుంబాల వంటింటి బడ్జెట్‌పై మరింత ఒత్తిడి పడుతోంది.

ద్రవ్యోల్బణం పెరుగుదలకు కారణాలు..

పట్టణాలు, గ్రామాల్లో వినియోగదారులు రోజువారీ అవసరాల కోసం ఎక్కువ ఖర్చు చేయాల్సిన పరిస్థితి కొనసాగుతోంది. ముఖ్యంగా పేద, మధ్యతరగతి కుటుంబాలపై ఈ ప్రభావం మరింతగా పడుతోంది. ద్రవ్యోల్బణం రిజర్వ్ బ్యాంక్ లక్ష్యానికి దగ్గరగా ఉండటం ఆర్థిక వర్గాల్లో ఆందోళనకు కారణమవుతోంది. ధరల స్థిరత్వం ఆర్థిక వ్యవస్థకు కీలకమైన అంశం కాగా, పెరుగుతున్న ద్రవ్యోల్బణం వృద్ధి వేగంపై ఒత్తిడి తీసుకురావచ్చని నిపుణులు అభిప్రాయపడుతున్నారు. తాజా గణాంకాల ప్రకారం.. బంగారు ఆభరణాలు, టమాటాలు, అల్లం ధరలు గణనీయంగా పెరిగాయి. అలాగే కిస్మిస్‌, ఎండుద్రాక్ష ధరలు పెరిగాయి. రోజువారీ వంటలో ఉపయోగించే కూరగాయల ధరల పెరుగుదల సాధారణ ప్రజలపై నేరుగా ప్రభావం చూపుతోంది. బంగాళాదుంపలు, బఠానీలు, కార్లు, జీపులు, జీలకర్ర, మోటార్ సైకిళ్లు, స్కూటర్లు తక్కువ ధర పెరుగుదల కనిపించిన విభాగాల్లో ఉన్నాయి. దేశవ్యాప్తంగా సేకరించిన ఈ గణాంకాలు కొన్ని రంగాల్లో ధరల ఒత్తిడి కొంత తగ్గినట్లు సూచిస్తున్నాయి.

రిజర్వ్ బ్యాంక్ వైఖరి కీలకం

ద్రవ్య విధాన నిర్ణయాల్లో కన్స్యూమర్ ప్రైస్ ఇండెక్స్‌ను రిజర్వ్ బ్యాంక్ ప్రధాన ఆధారంగా తీసుకుంటోంది. జూన్ 5 ప్రాంతంలో కేంద్ర బ్యాంక్ ప్రస్తుత ఆర్థిక సంవత్సరానికి ద్రవ్యోల్బణ అంచనాను సవరించింది. ముందుగా 4.6 శాతంగా ఉన్న అంచనాను 5.1 శాతానికి పెంచింది. ఉత్పత్తి ఖర్చులు పెరగడం దీనికి ప్రధాన కారణంగా పేర్కొంది. అంతర్జాతీయ మార్కెట్లలో ఇంధన ధరల పెరుగుదల దేశీయంగా పెట్రోల్, డీజిల్ ధరలపై ప్రభావం చూపుతోంది. ఇది రిటైల్ ద్రవ్యోల్బణం పెరుగుదలకు కూడా ఒక ప్రధాన కారణంగా మారింది. ఈ పరిస్థితిపై రిజర్వ్ బ్యాంక్ ఆందోళన వ్యక్తం చేస్తూ అవసరమైన దశలో చర్యలు తీసుకునే అవకాశం ఉన్నట్లు సంకేతాలు ఇచ్చింది. మే తర్వాతి కాలంలో పెట్రోల్ ధరలు మొత్తం 7.4 శాతం పెరిగినట్లు గణాంకాలు చెబుతున్నాయి. అదే సమయంలో డీజిల్ ధరలు 8.4 శాతం పెరిగాయి. రిజర్వ్ బ్యాంక్ తాజా ద్రవ్య విధాన ప్రకటనలో ఈ విషయాన్ని స్పష్టం చేసింది. ఇంధన ధరల పెరుగుదలతో రవాణా ఖర్చులు పెరుగుతున్నాయి. వాటి ప్రభావం ఇతర వస్తువులు, సేవల ధరలపై కూడా పడుతోంది. ఈ క్రమంలో ద్రవ్యోల్బణం మరింత పెరిగే అవకాశం ఉందని నిపుణులు హెచ్చరిస్తున్నారు. ఫలితంగా సాధారణ ప్రజల నెలవారీ బడ్జెట్‌పై అదనపు భారం తప్పదనే అభిప్రాయం వ్యక్తమవుతోంది.