Nifty | వ‌చ్చే వారం నిఫ్టీ పాజిటివ్‌గానే..? ఆ జోన్ కీల‌కం అంటున్న విశ్లేష‌కులు..

Nifty | దేశీయ స్టాక్‌ మార్కెట్లు ఈ వారం స్వల్ప లాభాలతో ముగిశాయి. అయితే నిఫ్టీ కీలక రెసిస్టెన్స్‌ స్థాయి 23,800 దగ్గరే నిలిచిపోవడంతో మార్కెట్‌లో ఇంకా స్పష్టమైన దిశ కనిపించడం లేదు. వోలాటిలిటీ తగ్గినా, టెక్నికల్‌ సూచీలు మాత్రం న్యూట్రల్‌ నుంచి జాగ్రత్త ధోరణినే సూచిస్తున్నాయి. 23,800 పైగా బలమైన బ్రేకౌట్‌ వచ్చే వరకు మార్కెట్‌ కన్సాలిడేషన్‌ కొనసాగవచ్చని విశ్లేషకులు చెబుతున్నారు. ఈ వారం నిఫ్టీ 542 పాయింట్ల పరిధిలో కదిలింది. ఇండెక్స్‌ గరిష్ఠంగా 23,859.90 వరకు చేరుకోగా, కనిష్ఠంగా 23,317.10 స్థాయిని తాకింది. వారం ముగిసే సమయానికి నిఫ్టీ 75.80 పాయింట్లు (0.32 శాతం) లాభంతో ముగిసింది. మార్కెట్‌లో భయాందోళనలు కొంత తగ్గిన సంకేతాలు కూడా కనిపించాయి. ఇండియా వీఐఎక్స్‌ 4.68 శాతం పడిపోయి 17.91 వద్ద ముగిసింది. ఇది తాత్కాలికంగా మార్కెట్‌ ఒత్తిడి తగ్గినట్టు సూచిస్తోంది.

23,800 దాటితేనే..

టెక్నికల్‌గా చూస్తే, నిఫ్టీ ఇప్పటికీ 23,800-23,850 కీలక రెసిస్టెన్స్‌ జోన్‌ కిందే ట్రేడ్‌ అవుతోంది. ఈ స్థాయి మార్కెట్‌కు ప్రధాన అడ్డంకిగా మారింది. ఈ జోన్‌ను నిఫ్టీ దాటుకుని క్లోజింగ్‌ ఆధారంగా నిలబడితేనే మార్కెట్‌లో స్థిరత్వం తిరిగి వచ్చే అవకాశం ఉందని నిపుణులు చెబుతున్నారు. అంతవరకు మార్కెట్‌ విస్తృత కన్సాలిడేషన్‌ రేంజ్‌లోనే కొనసాగవచ్చని అంచనా. దిగువ స్థాయిల నుంచి వచ్చిన రికవరీ మార్కెట్‌కు కొంత మద్దతు ఇచ్చినా, బలమైన కొనుగోళ్లు కనిపించకపోవడం వల్ల ర్యాలీ ఇంకా బలహీనంగానే ఉందని విశ్లేషణలు సూచిస్తున్నాయి. 23,800 పైగా స్థిరంగా కదిలితే షార్ట్‌ కవరింగ్‌ పెరిగి సమీప కాలంలో ట్రెండ్‌ మెరుగుపడవచ్చ‌ని, లేకపోతే మళ్లీ అమ్మకాల ఒత్తిడి పెరగవచ్చ‌ని అంటున్నారు. మే 28న ఈద్‌ సందర్భంగా ట్రేడింగ్‌ హాలిడే ఉండటంతో వచ్చే వారం ట్రేడింగ్‌ రోజుల సంఖ్య తక్కువగా ఉంటుంది. దీంతో వాల్యూమ్స్‌ కూడా తక్కువగా ఉండే అవకాశం ఉంది. ఈ పరిస్థితుల్లో స్టాక్‌-స్పెసిఫిక్‌ మూవ్స్‌ ఎక్కువగా కనిపించే చాన్స్ ఉంటుంది.

స్థిరంగా లేదా పాజిటివ్‌గా..

వచ్చే వారం మార్కెట్‌ స్థిరంగా లేదా స్వల్ప పాజిటివ్‌గా ప్రారంభమయ్యే అవకాశం ఉందని అంచనా. అయితే 23,800 స్థాయి వద్ద నిఫ్టీ ప్రవర్తనపై ట్రేడర్లు ప్రత్యేక దృష్టి పెట్టాలని నిపుణులు సూచిస్తున్నారు. సమీప రెసిస్టెన్స్‌ స్థాయిలు 23,800, 24,050 కాగా సపోర్ట్‌ స్థాయిలు 23,500, 23,350 వద్ద ఉన్నాయి. వీక్లీ ఆర్ఎస్ఐ ప్రస్తుతం 42.35 వద్ద ఉంది. ఇది న్యూట్రల్‌ స్థితినే సూచిస్తోంది. బుల్లిష్‌ లేదా బేరిష్‌ డైవర్జెన్స్‌ ఏదీ స్పష్టంగా కనిపించడం లేదు. మొమెంటమ్‌లో స్వల్ప మెరుగుదల ఉన్నా, బలమైన బుల్‌ ట్రెండ్‌కు అవసరమైన స్థాయిలను ఇంకా చేరుకోలేదు. వీక్లీ ఎంఏసీడీ ఇప్పటికీ సిగ్నల్‌ లైన్‌ కంటే దిగువనే ఉంది. అంటే మార్కెట్‌ ఇంకా బేరిష్‌ జోన్‌లోనే ఉందని అర్థం. అయితే హిస్టోగ్రామ్ కుదించుకుపోవ‌టం వల్ల దిగువ ఒత్తిడి కొంత బలహీనపడుతున్న సంకేతాలు కనిపిస్తున్నాయి. తాజా క్యాండిల్‌ ఫార్మేషన్‌ కూడా మార్కెట్‌లో స్పష్టమైన దిశ లేకపోవడాన్ని సూచిస్తోంది.

దూకుడు వ‌ద్దు..

వీక్లీ చార్ట్‌ విశ్లేషణ ప్రకారం, గత వారాల్లో జరిగిన భారీ కరెక్షన్‌ తర్వాత నిఫ్టీ ప్రస్తుతం పెద్ద ట్రేడింగ్‌ స్ట్రక్చర్‌ దిగువ అంచుల వద్ద స్థిరపడేందుకు ప్రయత్నిస్తోంది. ఇండెక్స్‌ ఇంకా 20-వీక్‌ మూవింగ్ యావరేజ్‌ 24,243, 100-వీక్‌ మూవింగ్ యావరేజ్‌ 24,540 కంటే దిగువనే ఉంది. ఇవి బలమైన రెసిస్టెన్స్‌లుగా పనిచేస్తున్నాయి. 200-వీక్‌ మూవింగ్ యావరేజ్‌ 22,025 పైన నిఫ్టీ కొనసాగుతుండటం వల్ల దీర్ఘకాలిక అప్‌ట్రెండ్‌ ఇంకా చెదరలేదని విశ్లేషకులు చెబుతున్నారు. వచ్చే వారం ట్రేడర్లు స్టాక్‌-స్పెసిఫిక్‌, సెలెక్టివ్‌ విధానాన్నే కొనసాగించాలని సూచిస్తున్నారు. నిఫ్టీ 23,800 పైన స్పష్టంగా క్లోజ్‌ అయ్యే వరకు దూకుడైన కొనుగోళ్లు చేయకపోవడమే మంచిదని చెబుతున్నారు. అదే సమయంలో 23,300-23,350 జోన్‌ పైన నిఫ్టీ కొనసాగుతున్నంత వరకు పెద్ద టెక్నికల్‌ డ్యామేజ్‌ లేదని భావిస్తున్నారు.

లాభాల‌ను ర‌క్షించుకోవాలి..

ప్రస్తుత పరిస్థితుల్లో అధిక లెవరేజ్‌కు దూరంగా ఉండాలని, లాభాలను రక్షించుకోవడంపై దృష్టి పెట్టాలని మార్కెట్‌ నిపుణులు సూచిస్తున్నారు. రిస్క్‌ మేనేజ్‌మెంట్‌తో కూడిన బ్యాలెన్స్‌డ్‌ స్ట్రాటజీ ట్రేడర్లకు ఉపయోగపడే అవకాశముంది. రిలేటివ్‌ రొటేషన్‌ గ్రాఫ్స్‌ విశ్లేషణ ప్రకారం నిఫ్టీ మెటల్‌ ఇండెక్స్‌ మళ్లీ లీడింగ్‌ క్వాడ్రంట్‌లోకి వచ్చింది. దీనితో పాటు మిడ్‌క్యాప్‌ 100, ఎనర్జీ, ఫార్మా, మీడియా ఇండెక్స్‌లు కూడా లీడింగ్‌ క్వాడ్రంట్‌లో ఉన్నాయి. ఇవి విస్తృత మార్కెట్‌తో పోలిస్తే మెరుగైన ప్రదర్శన ఇవ్వవచ్చని అంచనా. ఇక నిఫ్టీ పీఎస్‌ఈ ఇండెక్స్‌ వీకెనింగ్‌ క్వాడ్రంట్‌లోకి జారిపోయింది. ఇన్‌ఫ్రాస్ట్రక్చర్‌, పీఎస్‌యూ బ్యాంక్‌ ఇండెక్స్‌లు కూడా ఇదే జోన్‌లో ఉన్నాయి. వీటి రిలేటివ్‌ పనితీరు మందగించే అవకాశం ఉందని విశ్లేషణలు సూచిస్తున్నాయి. నిఫ్టీ సర్వీసెస్‌ సెక్టార్‌, బ్యాంక్‌నిఫ్టీ, నిఫ్టీ ఫైనాన్షియల్‌ సర్వీసెస్‌ ఇండెక్స్‌లు ల్యాగింగ్‌ క్వాడ్రంట్‌లోనే కొనసాగుతున్నాయి. దీంతో ఇవి మార్కెట్‌తో పోలిస్తే బలహీన ప్రదర్శన చూపవచ్చని భావిస్తున్నారు. ఆటో, ఐటీ ఇండెక్స్‌లు కూడా ల్యాగింగ్‌ జోన్‌లో ఉన్నప్పటికీ, వాటి రిలేటివ్‌ మొమెంటమ్‌లో కొంత మెరుగుదల కనిపిస్తోంది. ఎఫ్‌ఎంసీజీ, రియాల్టీ ఇండెక్స్‌లు ప్రస్తుతం ఇంప్రూవింగ్‌ క్వాడ్రంట్‌లో ఉన్నాయి.