Union Budget 2026 | పెళ్లైన వారికి కేంద్రం గుడ్ న్యూస్.. జాయింట్ టాక్స్ విధానంతో భారీగా పన్ను ఆదా!

Union Budget 2026 | త్రినేత్ర.న్యూస్ : ఫిబ్రవరి 1న ప్రవేశపెట్టబోయే కేంద్ర బడ్జెట్ 2026పై మధ్యతరగతి ప్రజల్లో భారీ అంచనాలు నెలకొన్నాయి. ఈ క్రమంలో ఆదాయపు పన్ను చెల్లింపుదారుల కోసం, ముఖ్యంగా వివాహితుల కోసం కేంద్ర ఆర్థిక శాఖ ఒక చరిత్రాత్మక మార్పుకు శ్రీకారం చుట్టబోతున్నట్లు తెలుస్తోంది. ఇకపై భార్యాభర్తలు ఇద్దరూ కలిసి పన్ను రిటర్నులు దాఖలు చేసే (Joint Taxation System) వెసులుబాటును కల్పించనున్నట్లు సమాచారం.

ఒకే సంపాదన ఉన్న కుటుంబాలకు పెద్ద పీట

ప్రస్తుత విధానంలో భార్యాభర్తలు విడివిడిగా పన్ను చెల్లించాల్సి ఉంటుంది. ఒకవేళ భార్యకు ఆదాయం లేకపోతే, ఆమెకు వచ్చే పన్ను మినహాయింపు ప్రయోజనాలు వృథా అవుతున్నాయి. ఫలితంగా సంపాదిస్తున్న వ్యక్తిపై పన్ను భారం పెరుగుతోంది. కొత్తగా ప్రతిపాదించిన 'జాయింట్ టాక్స్' విధానం అమల్లోకి వస్తే, భర్త సంపాదనపై భార్యకు దక్కే పన్ను మినహాయింపులను కూడా వాడుకోవచ్చు. దీనివల్ల మధ్యతరగతి కుటుంబాలకు వేల రూపాయల ఆదా అయ్యే అవకాశం ఉంది.

అమెరికా, జర్మనీ తరహాలో

ప్రస్తుతం అమెరికా, జర్మనీ వంటి దేశాల్లో ఒక కుటుంబాన్ని ఒక ఆర్థిక యూనిట్‌గా పరిగణించి పన్ను విధిస్తారు. భారత చార్టర్డ్ అకౌంటెంట్స్ సంస్థ (ICAI) కూడా ఇదే విధానాన్ని భారత్‌లో అమలు చేయాలని సూచించింది.

జాయింట్ టాక్స్ విధానంలో లాభాలు ఇవే

పన్ను పరిమితి పెంపు: భార్యాభర్తలు కలిసి రిటర్న్స్ వేస్తే ప్రాథమిక పన్ను మినహాయింపు పరిమితిని పెంచే అవకాశం ఉంది.

సర్‌ఛార్జ్ ఉపశమనం: ప్రస్తుతం రూ.50 లక్షల పైన ఆదాయం ఉంటే సర్‌ఛార్జ్ పడుతుంది. జాయింట్ టాక్స్ కింద ఈ పరిమితిని రూ.75 లక్షల వరకు పెంచవచ్చని సమాచారం.

డిడక్షన్స్: హోమ్ లోన్ వడ్డీ, మెడికల్ ఇన్సూరెన్స్ వంటి వాటిపై మినహాయింపులను ఇద్దరికీ సర్దుబాటు చేసుకునే వీలుంటుంది.

కేంద్ర ఆర్థిక మంత్రి నిర్మలా సీతారామన్ ఫిబ్రవరి 1న లోక్‌సభలో ఈ బడ్జెట్‌ను ప్రవేశపెట్టనున్నారు. జనవరి 28 నుంచి ఏప్రిల్ 2 వరకు బడ్జెట్ సమావేశాలు జరగనున్నాయి. ఒకవేళ ఈ జాయింట్ టాక్స్ విధానం అమల్లోకి వస్తే, ఇది భారత పన్నుల చరిత్రలోనే ఒక పెద్ద సంస్కరణ కానుంది.