Jio Platforms | జియో ప్లాట్‌ఫామ్స్ షేర్ల ర్యాలీ.. రెండు రోజుల్లో 33 శాతం లాభాలు..

Jio Platforms | స్టాక్ మార్కెట్‌లో లిస్టింగ్ అయిన తర్వాత జియో ప్లాట్‌ఫామ్స్ షేర్లు వరుసగా రెండో రోజూ లాభాల్లో దూసుకెళ్లాయి. గురువారం ఇంట్రాడేలో రూ.1,490 గరిష్ఠ స్థాయిని తాకాయి. ఐపీఓ ధరతో పోలిస్తే షేరు ఇప్పటికే 33.15 శాతం లాభపడింది. అయితే టారిఫ్ పెంపులు, డిజిటల్ సేవల విస్తరణ, నగదు ప్రవాహం మెరుగుదల వంటి అంశాలే భవిష్యత్తులో ఈ కంపెనీ వృద్ధికి కీలకం కానున్నాయి.

రెండు రోజుల్లో 33 శాతం లాభాలు..

రిలయన్స్ ఇండస్ట్రీస్‌కు చెందిన జియో ప్లాట్‌ఫామ్స్ షేర్లు స్టాక్ మార్కెట్‌లో దూకుడు కొనసాగిస్తున్నాయి. గురువారం బీఎస్‌ఈలో ఈ షేరు ఇంట్రాడేలో గరిష్ఠంగా 5.12 శాతం పెరిగి రూ.1,490 స్థాయికి చేరుకుంది. ఉదయం 10.38 గంటల సమయంలో 3.9 శాతం లాభంతో రూ.1,472.60 వద్ద ట్రేడయ్యింది. ఇదే సమయంలో బీఎస్‌ఈ సెన్సెక్స్ 0.71 శాతం పెరిగి 73,764 పాయింట్ల వద్ద కొనసాగింది. అక్టోబర్ 28న జియో ప్లాట్‌ఫామ్స్ షేరు బీఎస్‌ఈ, ఎన్‌ఎస్‌ఈల్లో రూ.1,358 వద్ద లిస్టింగ్ అయింది. ఇది ఐపీఓ గరిష్ఠ ఇష్యూ ధర రూ.1,119తో పోలిస్తే 21.36 శాతం ప్రీమియం. ప్రస్తుతం లిస్టింగ్ ధరతో పోలిస్తే 9.72 శాతం, ఐపీఓ ధరతో పోలిస్తే 33.15 శాతం లాభపడింది. కంపెనీ మార్కెట్ విలువ రూ.13,52,208.04 కోట్లకు చేరడంతో దేశంలో రెండో అతిపెద్ద లిస్టెడ్ కంపెనీగా భారతి ఎయిర్‌టెల్‌ను అధిగమించింది. రిలయన్స్ ఇండస్ట్రీస్ మొదటి స్థానంలో కొనసాగుతోంది. గురువారం బీఎస్‌ఈలో 31.36 లక్షల షేర్లు, రూ.461.33 కోట్ల విలువైన లావాదేవీలు జరగ్గా, ఎన్‌ఎస్‌ఈలో 215.61 లక్షల షేర్లు, రూ.3,172.65 కోట్ల విలువైన లావాదేవీలు నమోదయ్యాయి.

ల‌క్ష్యాన్ని చేరిన షేర్ ధ‌ర‌..

జియో ప్లాట్‌ఫామ్స్ షేర్లు ఇప్పటికే బ్రోకరేజ్ సంస్థలు ఇచ్చిన ప్రారంభ ధర లక్ష్యాలను దాటేశాయి. నోమురా రూ.1,340, మోతీలాల్ ఓస్వాల్ రూ.1,350, ఎలారా క్యాపిటల్ రూ.1,367 లక్ష్య ధరలను ప్రకటించాయి. లిస్టింగ్ రోజే షేరు రూ.1,375 గరిష్ఠ స్థాయిని తాకగా, ఇప్పుడు రూ.1,490 వరకు చేరింది. కంపెనీ భవిష్యత్తు వృద్ధికి టారిఫ్ పెంపులు ప్రధాన కారణంగా మారుతాయ‌ని నోమురా, మోతీలాల్ ఓస్వాల్ అంచనా వేస్తున్నాయి. నోమురా 2026 నవంబర్‌-డిసెంబర్‌లో టెలికాం రంగం మొత్తంగా సుమారు 15 శాతం టారిఫ్ పెంపును ఆశిస్తుండగా, మోతీలాల్ ఓస్వాల్ 2027 మార్చి నుంచి ఇలాంటి పెంపు ఉంటుంద‌ని భావిస్తోంది. అపరిమిత డేటా ప్యాక్‌లకు బదులుగా విభిన్న ధరల ప్రణాళికలు, ప్రీమియం 5జి సేవలు కూడా ఆదాయాన్ని పెంచుతాయ‌ని అంచనా. భారత మొబైల్ మార్కెట్ విలువ 2026 ఆర్థిక సంవత్సరంలోని రూ.2.9 లక్షల కోట్ల నుంచి 2031 ఆర్థిక సంవత్సరం నాటికి రూ.5.2 లక్షల కోట్లకు చేరుతుంద‌ని నోమురా పేర్కొంది. 2026-29 ఆర్థిక సంవత్సరాల మధ్య జియో ఈబీఐటీడీఏలో వార్షిక సమ్మిళిత వృద్ధి రేటు 13.5 శాతంగా ఉంటుంద‌ని అంచనా వేసింది. ఇదే సమయంలో మోతీలాల్ ఓస్వాల్ ఆదాయంలో 14 శాతం, ఈబీఐటీడీఏలో 15 శాతం, పన్నుల అనంతర లాభంలో 20 శాతం వార్షిక వృద్ధిని అంచనా వేసింది.

జియో అభివృద్ధి చేసిన 5జి, లైసెన్స్ అవసరం లేని ఫ్రీక్వెన్సీ బ్యాండ్ రేడియో సాంకేతికతలను ఇతర దేశాలకు లైసెన్సింగ్ ద్వారా అందించడం మరో అవకాశంగా భావిస్తోంది. అమెరికా, జర్మనీ, దక్షిణ అమెరికా, తూర్పు ఆసియా, ఆఫ్రికా ప్రాంతాల్లో వ్యూహాత్మక భాగస్వామ్యాల ద్వారా 150 కోట్ల మంది వినియోగదారులకు చేరుకోవాలని లక్ష్యంగా పెట్టుకున్నట్లు నోమురా పేర్కొంది. అయితే, అంచనాలకు తగ్గట్టుగా టారిఫ్ పెంపులు జరగకపోవడం, మొబైల్ ఫోన్లు, పరికరాల ఖర్చులు పెరగడం ప్రతికూల ప్రభావం చూపిస్తాయ‌ని హెచ్చరించింది. కాబట్టి ప్రస్తుత షేరు ధరను మాత్రమే చూసి నిర్ణయం తీసుకోకుండా, కంపెనీ లాభాల వృద్ధి, నగదు ప్రవాహం, భవిష్యత్తు విలువను పరిశీలించడం పెట్టుబడిదారులకు కీలకం.