Jio Platforms | జియో రాక‌తో టీసీఎస్‌కు షాక్‌.. టాప్ 5 నుంచి ఔట్‌..

Jio Platforms | జియో ప్లాట్‌ఫామ్స్‌ స్టాక్‌ మార్కెట్‌లో అదిరిపోయే అరంగేట్రం చేయడంతో భారత కార్పొరేట్‌ ర్యాంకింగ్స్‌లో కీలక మార్పులు చోటుచేసుకున్నాయి. మార్కెట్‌ విలువలో జియో రెండో స్థానానికి చేరగా, దశాబ్దాలుగా టాప్‌-5లో కొనసాగిన టీసీఎస్‌ ఆరో స్థానానికి పడిపోయింది. దీంతో రిలయన్స్‌ గ్రూప్‌ దేశంలోనే అత్యంత విలువైన వ్యాపార సమూహంగా అవతరించింది.

భారత స్టాక్‌ మార్కెట్‌లో బుధ‌వారం జియో ప్లాట్‌ఫామ్స్‌ సంచలన అరంగేట్రం చేసింది. ప్రారంభ పబ్లిక్‌ ఆఫర్‌ (ఐపీఓ) ధర రూ.1,119తో పోలిస్తే షేరు ధర 21.36 శాతం పెరిగింది. దీంతో కంపెనీ మార్కెట్‌ విలువ సుమారు రూ.12.5 లక్షల కోట్లకు చేరుకుని దేశంలోనే రెండో అత్యంత విలువైన సంస్థగా నిలిచింది. మరోవైపు, ఐటీ షేర్లలో అమ్మకాల ఒత్తిడి, అంతర్జాతీయ ఆర్థిక అనిశ్చితి కారణంగా టాటా కన్సల్టెన్సీ సర్వీసెస్‌ (టీసీఎస్‌) షేరు దాదాపు 3.5 శాతం పడిపోయింది. దీంతో ఆ సంస్థ మార్కెట్‌ విలువ రూ.8.76 లక్షల కోట్లకు తగ్గి, షేరు ధర రూ.2,411.70కు చేరింది. రిలయన్స్‌ ఇండస్ట్రీస్‌ రూ.16.20 లక్షల కోట్ల మార్కెట్‌ విలువతో మొదటి స్థానంలో కొనసాగుతోంది.

టాప్ 5 నుంచి టీసీఎస్ బ‌య‌ట‌కు..

భారతీ ఎయిర్‌టెల్‌ రూ.12.07 లక్షల కోట్లు, హెచ్‌డీఎఫ్‌సీ బ్యాంక్‌ రూ.10.44 లక్షల కోట్లు, ఐసీఐసీఐ బ్యాంక్‌ రూ.9.83 లక్షల కోట్ల మార్కెట్‌ విలువతో మూడు, నాలుగు, ఐదు స్థానాల్లో నిలిచాయి. దీంతో దశాబ్దాల తర్వాత టీసీఎస్‌ దేశంలోని అత్యంత విలువైన ఐదు కంపెనీల జాబితా నుంచి బయటకు వెళ్లింది. రిలయన్స్‌ గ్రూప్‌ మొత్తం మార్కెట్‌ విలువ రూ.28 లక్షల కోట్లను దాటగా, సుమారు రూ.26 లక్షల కోట్ల విలువైన టాటా గ్రూప్‌ను అధిగమించింది. తొలిసారిగా దేశంలోని టాప్‌-5 విలువైన లిస్టెడ్‌ కంపెనీల్లో టాటా గ్రూప్‌, అదానీ గ్రూప్‌లకు చెందిన సంస్థలు లేకపోవడం గమనార్హం.

భారీగా న‌ష్ట‌పోయిన ఐటీ షేర్లు..

రిలయన్స్‌ మద్దతుతో వచ్చిన జియో ప్లాట్‌ఫామ్స్‌ రూ.30,213 కోట్ల ఐపీఓ బీఎస్‌ఈ, ఎన్‌ఎస్‌ఈల్లో ఘనంగా నమోదైంది. షేరు రూ.1,358 వద్ద ప్రారంభమై, ఇష్యూ ధరపై సుమారు 21 శాతం లాభాన్ని అందించింది. పెట్టుబడిదారుల నుంచి రూ.7.5 లక్షల కోట్లకు పైగా విలువైన దరఖాస్తులు వచ్చాయని, 1.3 కోట్లకు పైగా దరఖాస్తులు అందాయని రిలయన్స్‌ జియో ఇన్ఫోకామ్‌ ఛైర్మన్‌ ఆకాశ్‌ అంబానీ తెలిపారు. ఐపీఓ ప్రారంభమైన 95 నిమిషాల్లోనే పూర్తిగా సబ్‌స్క్రైబ్‌ కావడం దేశంలోనే వేగవంతమైన రికార్డుగా ఆయన పేర్కొన్నారు. కంపెనీకి, వాటాదారులకు ఇది ముగింపు రేఖ కాదని, కొత్త ప్రయాణానికి ప్రారంభమని వ్యాఖ్యానించారు. కాగా బుధవారం భారత స్టాక్‌ మార్కెట్లు ఒత్తిడికి లోనయ్యాయి. కీలక సూచీలు ఒక శాతానికి పైగా పడిపోగా, ఐటీ రంగ సూచీ సుమారు 3.3 శాతం క్షీణించింది. ఇన్ఫోసిస్‌ 4.4 శాతం నష్టపోగా, టీసీఎస్‌, హెచ్‌సీఎల్‌ టెక్‌ షేర్లు దాదాపు 3 శాతం చొప్పున పడిపోయాయి.

సౌదీ అరేబియాలోని చమురు శుద్ధి కేంద్రంపై దాడి నేపథ్యంలో సరఫరా అంతరాయాల ఆందోళనలు పెరిగి, ముడి చమురు ధర 1.4 శాతం పెరిగి బ్యారెల్‌కు 115.40 డాలర్లకు చేరింది. అమెరికా ఫెడరల్‌ రిజర్వ్‌ వడ్డీ రేట్ల నిర్ణయంపై ఎదురుచూపులు కూడా మదుపర్లలో అప్రమత్తతను పెంచాయి. జియో ఐపీఓలో అర్హత కలిగిన సంస్థాగత మదుపర్ల విభాగం 70.5 రెట్లు సబ్‌స్క్రైబ్‌ కావడం బలమైన సంస్థాగత ఆసక్తిని సూచించింది. అయితే, భారత మార్కెట్లలో స్థిరమైన కోలుకోవడం ముడి చమురు ధరలు తగ్గడం, విదేశీ పోర్ట్‌ఫోలియో మదుపర్ల అమ్మకాలు ఆగడంపై ఆధారపడి ఉంటుందని జియోజిత్‌ ఇన్వెస్ట్‌మెంట్స్‌ చీఫ్‌ ఇన్వెస్ట్‌మెంట్‌ స్ట్రాటజిస్ట్‌ వి.కె. విజయకుమార్‌ అభిప్రాయపడ్డారు.

టీసీఎస్‌ షేర్లు కొనవచ్చా?

ఛాయిస్‌ బ్రోకింగ్‌ టెక్నికల్‌ రీసెర్చ్‌ అనలిస్ట్‌ హితేశ్‌ టైలర్‌ ప్రకారం, టీసీఎస్‌ షేరు దిగువ స్థాయిల నుంచి కోలుకుని సుమారు రూ.2,416 వద్ద ట్రేడవుతోంది. అయితే, రూ.2,470 వద్ద 50 వారాల ఎక్స్‌పోనెన్షియల్‌ మూవింగ్‌ యావరేజ్‌ (ఈఎంఏ) సమీపంలో అమ్మకాల ఒత్తిడి ఎదురవుతోంది. రూ.2,470-రూ.2,600 స్థాయిని కీలక నిరోధక పరిధిగా ఆయన గుర్తించారు. గతంలో మద్దతుగా ఉన్న స్థాయి, దీర్ఘకాలిక దిగువ ట్రెండ్‌లైన్‌ కూడా ఈ పరిధిలో ఉండడంతో షేరు ముందుకు సాగడం సవాలుగా మారుతుంద‌ని విశ్లేషించారు. మరోవైపు, రూ.2,000-రూ.2,200 పరిధిలో కీలక మద్దతు ఉందని తెలిపారు. వారపు ఆర్‌ఎస్‌ఐ 54.22 వద్ద ఉండడం, షేరు ధర బహుళ నెలల కనిష్ఠాలను పరీక్షిస్తున్న సమయంలో సూచీ అధిక కనిష్ఠాలను నమోదు చేయడం సానుకూల సంకేతాలని పేర్కొన్నారు. అయితే, టీసీఎస్‌లో ట్రెండ్‌ పూర్తిగా మారిందని నిర్ధారించాలంటే వారపు ముగింపు ధర రూ.2,600 పైన స్థిరపడాల్సి ఉంటుందని వివ‌రించారు.