Jio Platforms IPO | జియో, పారస్ హెల్త్‌కేర్ ఐపీఓ అలాట్‌మెంట్ నేడే.. స్టేటస్ ఇలా చెక్ చేసుకోండి..

Jio Platforms IPO | జియో ప్లాట్‌ఫామ్స్, పారస్ హెల్త్‌కేర్ ఐపీఓల షేర్ల కేటాయింపు ప్రక్రియ సోమ‌వారం పూర్తయ్యే అవకాశం ఉంది. ఈ రెండు పబ్లిక్ ఇష్యూలకు దరఖాస్తు చేసుకున్న ఇన్వెస్టర్లు తమ షేర్లు కేటాయించబడ్డాయో లేదో ఆన్‌లైన్‌లో తెలుసుకోవచ్చు. బీఎస్ఈ, ఎన్ఎస్ఈ వెబ్‌సైట్లతోపాటు సంబంధిత రిజిస్ట్రార్ల వెబ్‌సైట్ల ద్వారా అలాట్‌మెంట్ స్టేటస్‌ను తనిఖీ చేసుకోవచ్చు. జియో ప్లాట్‌ఫామ్స్, పారస్ హెల్త్‌కేర్ ఐపీఓలు అక్టోబర్ 21న సబ్‌స్క్రిప్షన్‌కు ప్రారంభమై, అక్టోబర్ 23న ముగిశాయి. జియో ప్లాట్‌ఫామ్స్ ఐపీఓకు మొత్తం 12.45 రెట్లు సబ్‌స్క్రిప్షన్ లభించగా, పారస్ హెల్త్‌కేర్ ఐపీఓ 1.92 రెట్లు సబ్‌స్క్రైబ్ అయింది. జియో ప్లాట్‌ఫామ్స్ ఒక్కో షేరు ధరల శ్రేణిని రూ.1,065 నుంచి రూ.1,119గా నిర్ణయించింది. పారస్ హెల్త్‌కేర్ షేరు ధరల శ్రేణి రూ.660 నుంచి రూ.693గా ఉంది. జియో ప్లాట్‌ఫామ్స్ ఐపీఓలో కొత్త షేర్ల జారీ ఉండగా, పారస్ హెల్త్‌కేర్ రూ.1,450 కోట్ల పబ్లిక్ ఇష్యూలో రూ.500 కోట్ల విలువైన కొత్త షేర్ల జారీ, రూ.950 కోట్ల విలువైన ఆఫర్ ఫర్ సేల్ ఉన్నాయి.

బీఎస్ఈలో జియో ప్లాట్‌ఫామ్స్ ఐపీఓ అలాట్‌మెంట్ స్టేటస్ ఎలా తెలుసుకోవాలి?

ముందుగా బీఎస్ఈ ఐపీఓ అలాట్‌మెంట్ పేజీని సందర్శించాలి. అక్కడ ఇష్యూ రకంగా ఈక్విటీని ఎంచుకోవాలి. కంపెనీల జాబితాలో జియో ప్లాట్‌ఫామ్స్ లిమిటెడ్ ను ఎంపిక చేయాలి. అనంతరం ఐపీఓ దరఖాస్తు నంబర్ లేదా పర్మనెంట్ అకౌంట్ నంబర్ (పాన్) నమోదు చేయాలి. క్యాప్చా వెరిఫికేషన్ పూర్తి చేసి సెర్చ్ పై క్లిక్ చేస్తే షేర్ల కేటాయింపు వివరాలు కనిపిస్తాయి.

ఎన్ఎస్ఈలో జియో ఐపీఓ స్టేటస్ చెక్ చేయడం ఎలా?

ఎన్ఎస్ఈ ఐపీఓ అలాట్‌మెంట్ పేజీని ఓపెన్ చేయాలి. ఈక్విటీ అండ్ ఎస్ఎంఈ ఐపీఓ బిడ్ డీటెయిల్స్‌ అనే ఆప్షన్‌ను ఎంచుకోవాలి. కంపెనీ సింబల్ జాబితాలో జియో ప్లాట్‌ఫామ్స్‌ను ఎంపిక చేసి, పాన్ నంబర్‌తోపాటు దరఖాస్తు నంబర్‌ను నమోదు చేయాలి. అనంతరం సబ్మిట్ పై క్లిక్ చేస్తే షేర్ల కేటాయింపు స్థితిని తెలుసుకోవచ్చు.

కేఫిన్ టెక్నాలజీస్‌లో జియో ఐపీఓ స్టేటస్..

జియో ప్లాట్‌ఫామ్స్ ఐపీఓకు సంబంధించిన కేటాయింపు వివరాలను కేఫిన్ టెక్నాలజీస్ వెబ్‌సైట్లోనూ తనిఖీ చేసుకోవచ్చు. వెబ్‌సైట్‌లో జియో ప్లాట్‌ఫామ్స్ లిమిటెడ్ ను ఎంచుకోవాలి. ఆ తర్వాత పాన్ నంబర్, దరఖాస్తు నంబర్ లేదా డీమ్యాట్ ఖాతా వివరాలు వంటి అందుబాటులో ఉన్న గుర్తింపు విధానాల్లో ఒకదాన్ని ఎంపిక చేసుకోవాలి. అవసరమైన వివరాలు నమోదు చేసి స‌బ్‌మిట్ పై క్లిక్ చేస్తే అలాట్‌మెంట్ స్టేటస్ కనిపిస్తుంది.

బీఎస్ఈలో పారస్ హెల్త్‌కేర్ ఐపీఓ స్టేటస్..

బీఎస్ఈ ఐపీఓ అలాట్‌మెంట్ పేజీని సందర్శించి ఇష్యూ రకంగా ఈక్విటీని ఎంచుకోవాలి. కంపెనీల జాబితాలో పారస్ హెల్త్‌కేర్ లిమిటెడ్ ను ఎంపిక చేయాలి. అనంతరం దరఖాస్తు నంబర్ లేదా పాన్ నంబర్ నమోదు చేయాలి. క్యాప్చా వెరిఫికేషన్ పూర్తి చేసిన తర్వాత సెర్చ్ పై క్లిక్ చేస్తే షేర్ల కేటాయింపు వివరాలు తెలుస్తాయి.

ఎన్ఎస్ఈలో పారస్ హెల్త్‌కేర్ ఐపీఓ స్టేటస్..

ఎన్ఎస్ఈ ఐపీఓ పేజీని ఓపెన్ చేసి ఈక్విటీ అండ్ ఎస్ఎంఈ ఐపీఓ బిడ్ డీటెయిల్స్ ను ఎంచుకోవాలి. కంపెనీ సింబల్ జాబితాలో పారస్ హెల్త్‌కేర్‌ను ఎంపిక చేసి, అడిగిన దరఖాస్తు వివరాలను నమోదు చేయాలి. సబ్మిట్ పై క్లిక్ చేయడం ద్వారా అలాట్‌మెంట్ స్టేటస్‌ను తనిఖీ చేయవచ్చు.

ఎంయూఎఫ్‌జీ ఇంటైమ్ ఇండియాలో పారస్ హెల్త్‌కేర్ స్టేటస్..

పారస్ హెల్త్‌కేర్ ఐపీఓ షేర్ల కేటాయింపు వివరాలను ఎంయూఎఫ్‌జీ ఇంటైమ్ ఇండియా వెబ్‌సైట్లోనూ తెలుసుకోవచ్చు. వెబ్‌సైట్‌లో పారస్ హెల్త్‌కేర్ లిమిటెడ్ ను ఎంచుకోవాలి. అనంతరం పాన్ నంబర్, దరఖాస్తు నంబర్, డీమ్యాట్ ఖాతా వివరాలు లేదా ఖాతా నంబర్, ఐఎఫ్‌ఎస్‌సీ వంటి అందుబాటులో ఉన్న గుర్తింపు ఎంపికల్లో ఒకదాన్ని ఎంచుకోవాలి. అవసరమైన వివరాలు నమోదు చేసి ఫామ్‌లోని సబ్మిట్ బటన్‌పై క్లిక్ చేస్తే అలాట్‌మెంట్ వివరాలు కనిపిస్తాయి.

జియో ప్లాట్‌ఫామ్స్ ఐపీఓ జీఎంపీ ఎంత? లిస్టింగ్ ధర అంచనా ఇదే!

సోమ‌వారం జియో ప్లాట్‌ఫామ్స్ ఐపీఓ గ్రే మార్కెట్ ప్రీమియం (జీఎంపీ) ఒక్కో షేరుకు రూ.247గా ఉంది. గరిష్ఠ ఇష్యూ ధర రూ.1,119ను పరిగణనలోకి తీసుకుంటే, అంచనా లిస్టింగ్ ధర రూ.1,366గా ఉండే చాన్స్ ఉంది. అంటే ఇష్యూ ధరతో పోలిస్తే సుమారు 22.07 శాతం ప్రీమియంతో షేరు లిస్ట్ అయ్యే అవకాశం ఉందని గ్రే మార్కెట్ అంచనాలు సూచిస్తున్నాయి. అయితే, జీఎంపీ అనేది అనధికారిక గ్రే మార్కెట్ అంచనా మాత్రమే. ఇది లిస్టింగ్ సమయంలో లభించే ధరకు హామీ కాదు. వాస్తవ లిస్టింగ్ ధర మార్కెట్ పరిస్థితులు, పెట్టుబడిదారుల డిమాండ్‌పై ఆధారపడి ఉంటుంది.

పారస్ హెల్త్‌కేర్ ఐపీఓ జీఎంపీ, అంచనా లిస్టింగ్ ధర..

పారస్ హెల్త్‌కేర్ ఐపీఓ గ్రే మార్కెట్ ప్రీమియం ఒక్కో షేరుకు రూ.9గా ఉంది. గరిష్ఠ ఇష్యూ ధర రూ.693ను పరిగణనలోకి తీసుకుంటే, అంచనా లిస్టింగ్ ధర రూ.702గా ఉండే చాన్స్ ఉంది. ఇది ఇష్యూ ధర కంటే సుమారు 1.30 శాతం ఎక్కువ. అయితే, ఈ అంచనా కూడా అనధికారిక గ్రే మార్కెట్ ధోరణుల ఆధారంగా మాత్రమే ఉంటుంది. అసలు లిస్టింగ్ ధర మారే అవకాశం ఉంది.

కాగా జియో ప్లాట్‌ఫామ్స్ డిజిటల్ టెక్నాలజీ రంగంలో కార్యకలాపాలు నిర్వహిస్తున్న సంస్థ. టెలికమ్యూనికేషన్స్, బ్రాడ్‌బ్యాండ్ కనెక్టివిటీ, డిజిటల్ వినోదం, క్లౌడ్ సేవలు, సంస్థలకు అవసరమైన డిజిటల్ పరిష్కారాలు వంటి విభాగాల్లో దీని వ్యాపారాలు విస్తరించి ఉన్నాయి. జియో ప్లాట్‌ఫామ్స్ అనుబంధ సంస్థ అయిన రిలయన్స్ జియో ఇన్ఫోకామ్ లిమిటెడ్ టెలికాం సేవలను నిర్వహిస్తోంది. ఇక పార‌స్ హెల్త్‌కేర్ పారస్ హెల్త్‌ బ్రాండ్ పేరుతో మల్టీ స్పెషాలిటీ ఆసుపత్రులను నిర్వహిస్తోంది. వివిధ వైద్య విభాగాల్లో చికిత్సా సేవలు అందిస్తున్న ఈ సంస్థకు ఉత్తర భారతదేశంతోపాటు ఇతర ప్రాంతాల్లోనూ ఆసుపత్రుల నెట్‌వర్క్ ఉంది.