SBI Funds IPO | పెట్టుబ‌డిదారుల‌కు భారీ శుభ‌వార్త‌.. ఎస్‌బీఐ ఫండ్స్ భారీ ఐపీఓ వ‌స్తోంది..

SBI Funds IPO | భారత్‌లోని అతిపెద్ద అసెట్ మేనేజ్‌మెంట్ సంస్థ ఎస్‌బీఐ ఫండ్స్ మేనేజ్‌మెంట్ లిమిటెడ్ తన తొలి పబ్లిక్ ఇష్యూ (ఐపీఓ)ను జూలై 13తో ప్రారంభమయ్యే వారంలో ప్రారంభించేందుకు సిద్ధమవుతోంది. ఈ ఐపీఓ ద్వారా కంపెనీ దాదాపు 1.2 బిలియన్ డాలర్ల నిధుల‌ను సమీకరించే అవకాశం ఉందని తెలుస్తోంది. భారత్‌లో త్వరలో రానున్న బిలియన్ డాలర్లకు పైగా విలువైన పలు భారీ ఐపీఓలకు ముందు, పెట్టుబడిదారుల ఆసక్తిని పరీక్షించే కీలక ఆఫర్‌గా ఇది నిలవనుంది. ఈ ఐపీఓలో కంపెనీ తన విలువను 1.15 ట్రిలియన్ రూపాయల నుంచి 1.20 ట్రిలియన్ రూపాయల (సుమారు 12.1 బిలియన్ డాలర్లు) మధ్య నిర్ణయించాలని భావిస్తోంది. గతంలో కంపెనీ 14 బిలియన్ నుంచి 15 బిలియన్ డాలర్ల విలువను లక్ష్యంగా నిర్ణ‌యించుకున్నప్పటికీ, ఇప్పుడు దానిని తగ్గించినట్లు సమాచారం. అయితే ఈ వివరాలు ఇంకా అధికారికంగా వెల్ల‌డించాల్సి ఉంది.

ఐపీఓల‌కు వ‌చ్చే 6 నెల‌లు కీల‌కం..

ఈ ఏడాది తొలి ఆరు నెలల్లో భారత ప్రైమరీ మార్కెట్ నెమ్మదిగా సాగినప్పటికీ, రానున్న నెలల్లో బిలియన్ డాలర్లకు పైగా విలువైన ఐపీఓల వరుసకు సిద్ధమవుతోంది. ప్రముఖ పారిశ్రామికవేత్త ముకేష్ అంబానీకి చెందిన జియో ప్లాట్‌ఫార్మ్స్ లిమిటెడ్, నేషనల్ స్టాక్ ఎక్స్చేంజ్ ఆఫ్ ఇండియా లిమిటెడ్, మణిపాల్ హెల్త్ ఎంటర్‌ప్రైజెస్ లిమిటెడ్ వంటి సంస్థలు కూడా త్వరలో స్టాక్ మార్కెట్‌లో లిస్టింగ్‌కు రానున్నాయి. ప్రస్తుతం స్టాక్ మార్కెట్‌లో లిస్టింగ్ అయిన ఎస్‌బీఐ ఫండ్స్ పోటీ సంస్థల్లో ఐసీఐసీఐ ప్రుడెన్షియల్ అసెట్ మేనేజ్‌మెంట్ కంపెనీ మార్కెట్ విలువ సుమారు 17.7 బిలియన్ డాలర్లు, హెచ్‌డీఎఫ్‌సీ అసెట్ మేనేజ్‌మెంట్ కంపెనీ విలువ సుమారు 12.4 బిలియన్ డాలర్లుగా ఉంది. ఐపీఓకు సంబంధించిన విలువ, పరిమాణం, ప్రారంభ తేదీ వంటి అంశాలపై చర్చలు ఇంకా కొనసాగుతున్నాయని, చివరి దశలో మార్పులు చోటుచేసుకునే అవకాశం ఉందని సమాచారం. ఈ విషయంపై ఎస్‌బీఐ ఫండ్స్ ఇంకా స్పందించాల్సి ఉంది.

సెకండ‌రీ ఆఫ‌ర్ రూపంలోనే ఐపీవో..

డ్రాఫ్ట్ ప్రాస్పెక్టస్ ప్రకారం ఈ ఐపీఓ నిర్వహణ కోసం కంపెనీ మొత్తం తొమ్మిది బ్యాంకులను నియమించింది. ఇందులో కోటక్ మహీంద్రా క్యాపిటల్ కంపెనీ, యాక్సిస్ క్యాపిటల్ లిమిటెడ్, ఎస్‌బీఐ క్యాపిటల్ మార్కెట్స్ లిమిటెడ్, జేఎం ఫైనాన్షియల్ లిమిటెడ్, హెచ్‌ఎస్‌బీసీ హోల్డింగ్స్ పీఎల్‌సీ తదితర సంస్థలు ఉన్నాయి. ఎస్‌బీఐ ఫండ్స్‌లో స్టేట్ బ్యాంక్ ఆఫ్ ఇండియా, అముండీ ఎస్‌ఏ సంయుక్త యాజమాన్య హక్కులు కలిగి ఉన్నాయి. డ్రాఫ్ట్ ప్రాస్పెక్టస్ ప్రకారం ఈ ఐపీఓ పూర్తిగా సెకండరీ ఆఫర్ రూపంలోనే ఉంటుంద‌ని తెలుస్తోంది. ఇందులో స్టేట్ బ్యాంక్ ఆఫ్ ఇండియా తనకు చెందిన 128.3 మిలియన్ షేర్లు లేదా సుమారు 6.3 శాతం ఈక్విటీని విక్రయించనుండగా, అముండీ 75.4 మిలియన్ షేర్లు లేదా 3.7 శాతం వాటాను విక్రయించనుంది. అయితే అధికారికంగా ఈ స‌మాచారాన్ని ఎస్‌బీఐ ఫండ్స్ త్వ‌ర‌లోనే వెల్ల‌డించ‌నుంది.