IPOs | పెట్టుబ‌డిదారులు ఎంతో ఆస‌క్తిగా ఎదురు చూస్తున్న 5 మెగా ఐపీవోలు ఇవే.. లాంచింగ్ ఎప్పుడు..?

IPOs | భారత్‌లో ఐపీవో మార్కెట్ మరోసారి భారీ లిస్టింగ్‌ల దిశగా సాగుతుందా? లేక పెట్టుబడిదారులు ఇంకా వేచి చూసే ధోర‌ణిలోనే ఉన్నారా? అనే ప్రశ్న ప్ర‌స్తుతం మార్కెట్‌ల‌లో చర్చనీయాంశంగా మారింది. ఈ ఏడాది పలు ప్రముఖ కంపెనీలు మార్కెట్‌ల‌లోకి రావడానికి సిద్ధమవుతున్నప్పటికీ, వాటి టైమ్‌లైన్‌లపై స్పష్టత ఇంకా లేదు. 2026 మొదటి నెలలో ప్రైమరీ మార్కెట్ కొంత నిశ్శబ్దంగా కనిపించింది. ఐపీవోల సంఖ్య గణనీయంగా తగ్గింది. దీనికి ప్రధాన కారణం స్టాక్ మార్కెట్‌లో పెరిగిన వోలాటిలిటీయే అని చెప్ప‌వ‌చ్చు. అంతేకాకుండా ప్రపంచవ్యాప్తంగా కొనసాగుతున్న భౌగోళిక ఉద్రిక్తతలు కూడా ఈ ప్రభావానికి దారితీశాయి. అయితే ఈ నిశ్శబ్దం వెనుక ఒక బలమైన పైప్‌లైన్ రూపుదిద్దుకుంటోంది. టెలికాం, ఫిన్‌టెక్, ఈ-కామర్స్ నుంచి స్టాక్ ఎక్స్చేంజ్‌ల వరకు దేశంలోని పెద్ద కంపెనీలు లిస్టింగ్‌లకు సిద్ధమవుతున్నాయి.

రిల‌య‌న్స్ జియో ఐపీవో..

అందరి దృష్టి ఎక్కువగా రిలయన్స్ జియో ఐపీవోపైనే ఉంది. రిల‌యన్స్ ఇండ‌స్ట్రీస్ మద్దతుతో ఉన్న ఈ టెలికాం సంస్థపై పెట్టుబడిదారుల ఆసక్తి ఎక్కువగా ఉంది. చైర్మన్ ముకేష్ అంబానీ ఇటీవల నాలుగో త్రైమాసికం ఫ‌లితాల సందర్భంగా జియో ప్లాట్‌ఫామ్ లిస్టింగ్ దిశగా పురోగతి ఉందని తెలిపారు. అయితే క‌చ్చితమైన తేదీ ప్రకటించలేదు. కానీ ఈ ఐపీవో 2027 ఆర్థిక సంవత్సర ద్వితీయార్థానికి వెళ్లే అవకాశమున్న‌ట్లు తెలుస్తోంది.

ఫోన్‌పే ఐపీవో..

డిజిటల్ పేమెంట్స్ సంస్థ ఫోన్‌పేకు సెబీ నుంచి రూ.12వేల కోట్ల సేకరణకు అనుమతి లభించినప్పటికీ, మార్కెట్ అనిశ్చితి కారణంగా సంస్థ తాత్కాలికంగా ఐపీవో ప్రణాళికను నిలిపివేసింది. ప్రస్తుతం లాంచ్ తేదీపై ఎలాంటి ప్రకటన లేదు.

జెప్టో..

బెంగళూరుకు చెందిన క్విక్ కామర్స్ సంస్థ జెప్టో కూడా ఐపీవోకు సిద్ధమవుతోంది. సంస్థ ఇప్పటికే కాన్ఫిడెన్షియల్ రూట్ ద్వారా డ్రాఫ్ట్ పేపర్లు దాఖలు చేసి, సెబీ నుంచి ప్రాథమిక అనుమతి పొందినట్లు సమాచారం. ఈ ఏడాది లిస్టింగ్ జరిగే అవకాశమున్నప్పటికీ, అధికారిక తేదీని ఇంకా వెల్లడించలేదు.

ఎన్ఎస్ఈ ఐపీవో పురోగతి..

ఎన్‌ఎస్‌ఈ ఐపీవో కోసం పెట్టుబ‌డిదారులు ఎన్నో సంవత్సరాలుగా ఎదురుచూస్తున్నారు. పలు రెగ్యులేటరీ సమస్యల వల్ల వాయిదా పడుతూ వచ్చిన ఈ ప్రక్రియ ఇప్పుడు ముందుకు కదులుతోంది. ఇటీవల ఆఫర్ ఫర్ సేల్ (ఓఎఫ్ఎస్) కోసం ఎక్స్‌ప్రెషన్ ఆఫ్ ఇంటరెస్ట్ ప్రక్రియ పూర్తవ్వడం పురోగతిని సూచిస్తోంది. అయినప్పటికీ అధికారిక టైమ్‌లైన్ ఇంకా తెలియలేదు.

ఫ్లిప్‌కార్ట్ ఐపీవో..

ఈ-కామర్స్ దిగ్గజం ఫ్లిప్‌కార్ట్ కూడా ఐపీవో లిస్టింగ్‌కు సిద్ధమవుతోంది. సంస్థ తన లీగల్ డొమిసైల్‌ను సింగపూర్ నుంచి భారత్‌కు మార్చడం కీలక అడుగు. అయితే ఇష్యూ ప్రారంభ తేదీపై ఇంకా స్పష్టత లేదు.

మార్కెట్ పరిస్థితులు, రెగ్యులేటరీ అనుమతులు, ప్రపంచవ్యాప్త పరిణామాలు ఇవన్నీ ఐపీవోఓల ప్రారంభాన్ని ప్రభావితం చేస్తున్నాయి. అందువల్ల పెట్టుబడిదారులు ఈ అంశాలను జాగ్రత్తగా గమనిస్తూ నిర్ణయాలు తీసుకోవడం అవసరం. ప్రస్తుతం మార్కెట్ నిశ్శబ్దంగా ఉన్నప్పటికీ, భారీ ఐపీవోల కోసం బలమైన వేదిక సిద్ధమవుతోంది. సరైన సమయం కోసం కంపెనీలు, పెట్టుబడిదారులు వేచి చూస్తున్నారు.