Stock Markets | భారీ న‌ష్టాల‌తో ముగిసిన స్టాక్ మార్కెట్లు.. మ‌దుప‌ర్ల‌కు రూ.5 ల‌క్ష‌ల కోట్లు న‌ష్టం..

Stock Markets | భారత స్టాక్ మార్కెట్ల‌లో ప్రధాన సూచీలు అయిన సెన్సెక్స్, నిఫ్టీ 50 బుధ‌వారం ట్రేడింగ్ సెష‌న్‌లో భారీ నష్టాలను చవిచూశాయి. గత ట్రేడింగ్ సెషన్‌లో నమోదైన లాభాల అనంతరం పెట్టుబడిదారులు లాభాల స్వీకరణకు మొగ్గు చూప‌డంతో మార్కెట్‌పై అమ్మ‌కాల‌ ఒత్తిడి పెరిగింది. 30 షేర్లతో కూడిన బీఎస్‌ఈ సెన్సెక్స్ 1,342 పాయింట్లు (1.72 శాతం) పతనమై 76,863.71 వద్ద ముగిసింది. ఎన్‌ఎస్‌ఈ నిఫ్టీ 50 కూడా 395 పాయింట్లు (1.63 శాతం) పడిపోయి 23,866.85 వద్ద స్థిరపడింది. బీఎస్‌ఈ 150 మిడ్‌క్యాప్ సూచీ 1.13 శాతం పడిపోగా, బీఎస్‌ఈ 250 స్మాల్‌క్యాప్ సూచీ 0.32 శాతం తగ్గింది. బీఎస్‌ఈలో నమోదైన కంపెనీల మొత్తం మార్కెట్ మూలధనం గత సెషన్‌లోని రూ.447 లక్షల కోట్ల నుంచి రూ.442 లక్షల కోట్లకు తగ్గింది. దీంతో ఒక్క ట్రేడింగ్ సెషన్‌లోనే పెట్టుబడిదారులు దాదాపు రూ.5 లక్షల కోట్లు నష్టపోయారు.

బ్యాంకింగ్‌, ఫైనాన్స్ రంగాల‌పై ఒత్తిడి..

స్టాక్ మార్కెట్ పతనానికి కారణమైన ప్రధాన అంశాలను పరిశీలిస్తే.. ముఖ్యంగా బ్యాంకింగ్, ఫైనాన్స్ రంగంలోని ప్రముఖ షేర్లలో లాభాల స్వీకరణ ప్రధాన కారణంగా నిలిచింది. హెచ్‌డీఎఫ్‌సీ బ్యాంక్, ఐసీఐసీఐ బ్యాంక్, యాక్సిస్ బ్యాంక్, బజాజ్ ఫైనాన్స్ వంటి భారీ కంపెనీల షేర్లలో విక్రయాలు పెరగడంతో ఈక్విటీ మార్కెట్లు క్షీణించాయి. నిఫ్టీ బ్యాంక్ సూచీ 2.13 శాతం పడిపోయింది. ఫైనాన్షియల్ సర్వీసెస్ సూచీ కూడా 2.32 శాతం క్షీణించింది. ఇతర ప్రధాన కంపెనీలైన భారతి ఎయిర్‌టెల్, రిలయన్స్ ఇండస్ట్రీస్, మహీంద్రా అండ్ మహీంద్రా షేర్లు కూడా సూచీలను దిగజార్చేందుకు ప్రధాన కారణాలుగా నిలిచాయి. ఇరాన్, అమెరికా-ఇజ్రాయెల్ సంయుక్త బలగాల మధ్య కొనసాగుతున్న యుద్ధం కారణంగా పెరుగుతున్న భౌగోళిక ఉద్రిక్తతలు కూడా దేశీయ మార్కెట్‌లో లాభాల స్వీకరణకు దారితీశాయి.

బ‌ల‌హీన ప‌డిన రూపాయి..

ఇక భారత రూపాయి కూడా బలహీనపడడం మార్కెట్ సెంటిమెంట్‌పై ప్రతికూల ప్రభావం చూపింది. బ్లూమ్‌బర్గ్ డేటా ప్రకారం బుధవారం డాలర్‌తో పోలిస్తే రూపాయి 24 పైసలు పడిపోయి 92.04 వద్ద ముగిసింది. రూపాయి బలహీనత విదేశీ పెట్టుబడిదారుల పెట్టుబడులపై ప్రభావం చూపింది. కరెన్సీ విలువ తగ్గడం వల్ల వారి లాభాలు తగ్గిపోతాయి. రూపాయి పతనం ద్రవ్యోల్బణం పెరిగే ప్రమాదాన్ని కూడా పెంచుతుంది. దీనివల్ల వడ్డీ రేట్లు పెరుగుతాయి. ఎల్‌కేపీ సెక్యూరిటీస్‌లో కమోడిటీ, కరెన్సీ పరిశోధన విభాగం ఉపాధ్యక్షుడు జతీన్ త్రివేది మాట్లాడుతూ రూపాయి తక్షణ ట్రేడింగ్ పరిధి 91.25 నుంచి 92.60 మధ్య ఉండే అవకాశం ఉంద‌ని తెలిపారు. క్రూడ్ ఆయిల్ ధరల మార్పులు, డాలర్ సూచీ దిశ రూపాయి భవిష్యత్తును ప్రభావితం చేస్తాయని అన్నారు.

ప్ర‌పంచ ఆర్థిక వృద్ధిపై ప్ర‌భావం..

కాగా అమెరికా అధ్యక్షుడు డొనాల్డ్ ట్రంప్ ఇటీవల యుద్ధం త్వరలో ముగియవచ్చని ఆశాభావం వ్యక్తం చేసినప్పటికీ, మధ్యప్రాచ్యంలో ఉద్రిక్తతలు కొనసాగుతున్నాయి. ఏఎఫ్‌పీ నివేదిక ప్రకారం హోర్ముజ్ జలసంధి సమీపంలో అమెరికా సైన్యం 16 ఇరానియన్ మైనింగ్‌ పడవలను ధ్వంసం చేసింది. ప్రపంచ చమురు సరఫరాలో ఐదవ వంతు భాగం ఈ హోర్ముజ్ జలసంధి మార్గం ద్వారా సాగుతుంది. ఈ మార్గంలో నౌకల రాకపోకలను అడ్డుకోవడానికి ప్రయత్నిస్తే ఇరాన్ తీవ్ర పరిణామాలను ఎదుర్కోవాల్సి వస్తుందని అమెరికా హెచ్చరించింది. మధ్యప్రాచ్య ఘర్షణల కారణంగా హోర్ముజ్ జలసంధిని మూసివేస్తే ప్రపంచ ఆర్థిక వృద్ధి, ద్రవ్యోల్బణంపై తీవ్రమైన ప్రభావం ఉంటుందని ఐక్యరాజ్యసమితి హెచ్చరించింది.

భారీగా ఎఫ్ఐఐల విక్ర‌యాలు..

ఇక విదేశీ సంస్థాగత పెట్టుబడిదారులు (ఎఫ్‌ఐఐలు) భారీగా భారత మార్కెట్ నుంచి పెట్టుబడులను ఉపసంహరించుకోవడం కూడా మార్కెట్ పతనానికి కారణమైంది. మార్చి నెలలో కేవలం ఆరు ట్రేడింగ్ సెషన్లలోనే ఎఫ్‌ఐఐలు క్యాష్ సెగ్మెంట్‌లో రూ.32,800 కోట్లకు పైగా విలువైన భారతీయ షేర్లను విక్రయించారు. క్రూడ్ ఆయిల్ ధరల పెరుగుదల, రూపాయి బలహీనత, అమెరికన్ డాలర్ బలపడడం కారణంగా ఎఫ్‌ఐఐలు భారత మార్కెట్ నుంచి భారీగా విక్రయాలు కొనసాగిస్తున్నారు. గతేడాది జూలై నుంచి కూడా ఎఫ్‌ఐఐలు భారత స్టాక్స్‌ను విక్రయిస్తున్నారు. కంపెనీల లాభాలు, విలువల మధ్య తేడా, అలాగే భారత్‌లో ఆర్టిఫిషియల్ ఇంటెలిజెన్స్‌కు సంబంధించిన పెట్టుబడి థీమ్‌లు తక్కువగా ఉండడం కూడా ఇందుకు కారణమని నిపుణులు చెబుతున్నారు.

క్రూడ్ ఆయిల్ ధ‌ర‌లు పెరిగితే క‌ష్ట‌మే..

జియోజిట్ ఇన్వెస్ట్మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ మాట్లాడుతూ గతేడాది తరహాలోనే ఎఫ్‌ఐఐలు విక్రయాలు కొనసాగిస్తుండగా దేశీయ సంస్థాగత పెట్టుబడిదారులు (డీఐఐలు) కొనుగోళ్లు కొనసాగిస్తున్నార‌ని అన్నారు. భారతీయ ఈక్విటీ మ్యూచువల్ ఫండ్లలో కొనసాగుతున్న పెట్టుబడులు ఈ ధోరణి మరికొంత కాలం కొనసాగుతుందని సూచిస్తున్నాయని చెప్పారు. ఇక క్రూడ్ ఆయిల్ ధరల్లో ఉన్న అస్థిరత కూడా భారత మార్కెట్‌ల‌పై ఒత్తిడిని పెంచుతోంది. క్రూడ్ ధరలు ఇటీవల గరిష్ట స్థాయిల నుంచి కొంత తగ్గినా, ఇంకా అధిక మార్పులతో కొనసాగుతున్నాయి. నిపుణుల అభిప్రాయం ప్రకారం అమెరికా-ఇరాన్ యుద్ధం మరి కొంత కాలం కొనసాగి క్రూడ్ ఆయిల్ ధరలు ఎక్కువగా పెరిగితే భారత ప్రస్తుత ఖాతా లోటు పెరిగే అవకాశం ఉంద‌ని తెలిపారు. రూపాయి మరింత బలహీనపడే ప్రమాదం ఉంద‌ని, కంపెనీల లాభదాయకత కూడా తగ్గవచ్చ‌ని అన్నారు. ఇది భారత ఆర్థిక వ్యవస్థ బలమైందనే భావనను దెబ్బతీసే అవ‌కాశం ఉంద‌ని వారు హెచ్చరించారు.

రేటింగ్ ఏజెన్సీ మూడీస్ నివేదిక ప్రకారం మధ్యప్రాచ్య యుద్ధం దీర్ఘకాలం కొనసాగితే భారత స్థూల దేశీయోత్పత్తి (జీడీపీ) వృద్ధి రేటు ఒక శాతం తగ్గే ప్రమాదం ఉంద‌ని తెలిపారు. అదనంగా వడ్డీ రేట్లు, ద్రవ్యోల్బణం 1.5 నుంచి 2 శాతం వరకు పెరిగే అవకాశం ఉందని చెప్పారు.