Stock Markets | భారీ లాభాల్లో ముగిసిన స్టాక్ మార్కెట్లు.. ఇంట్రా డేలో బుల్ ర్యాలీ..

Stock Markets | దేశీయ స్టాక్ మార్కెట్లు బుధ‌వారం భారీ లాభాల్లో ముగిశాయి. బీఎస్ఈ సెన్సెక్స్‌, నిఫ్టీ 50 రెండూ 1 శాతానికి పైగా పెరిగాయి. అమెరికా–ఇరాన్ మధ్య ఒప్పందం సమీపంలో ఉందన్న వార్తల నేపథ్యంలో ఇన్వెస్టర్లలో రిస్క్-ఆన్ భావన పెరగడం ఈ ర్యాలీకి ప్రధాన కారణమైంది. సెన్సెక్స్ ఇంట్రాడేలో 1,000 పాయింట్లకు పైగా ఎగ‌బాకి 78,022.78 వద్ద గరిష్ఠాన్ని తాకగా, చివరికి 77,958.52 వద్ద 940.73 పాయింట్ల (1.22 శాతం) లాభంతో ముగిసింది. నిఫ్టీ 50 కూడా 24,356.50 వరకు చేరి, చివరికి 24,330.95 వద్ద 298.15 పాయింట్లు (1.24 శాతం) పెరిగింది. మిడ్‌క్యాప్, స్మాల్‌క్యాప్ సెగ్మెంట్లలో కూడా కొనుగోళ్ల‌ ఉత్సాహం కనిపించింది. బీఎస్ఈ 150 మిడ్‌క్యాప్ ఇండెక్స్ 1.67 శాతం పెరిగింది, బీఎస్ఈ 250 స్మాల్‌క్యాప్ ఇండెక్స్ 1.77 శాతం ఎగ‌బాకింది. బుధ‌వారం ట్రేడింగ్‌లో ఇంట‌ర్ గ్లోబ్ ఏవియేష‌న్‌, టాటా మోటార్స్ ప్యాసింజ‌ర్ వెహిక‌ల్స్‌, శ్రీ‌రాం ఫైనాన్స్ టాప్ గెయిన‌ర్లుగా నిలిచాయి. ఓఎన్‌జీసీ, రిల‌య‌న్స్ ఇండ‌స్ట్రీస్‌, ప‌వ‌ర్ గ్రిడ్ కార్పొరేష‌న్ ఆఫ్ ఇండియా న‌ష్టాల్లో ముగిశాయి.

మార్కెట్ల పెరుగుద‌ల‌కు కార‌ణాలు..

మొత్తం మార్కెట్ క్యాపిటలైజేషన్ రూ.467 లక్షల కోట్ల నుంచి రూ.473 లక్షల కోట్లకు పెరగడంతో, ఇన్వెస్టర్లు ఒకే సెషన్‌లో సుమారు రూ.6 లక్షల కోట్ల సంపదను పొందారు. అమెరికా, ఇరాన్ మధ్య ఉద్రిక్తతలు తగ్గే సూచనలు కనిపించడం మార్కెట్ల‌కు ప్రధాన బూస్ట్ ఇచ్చింది. అంతర్జాతీయ వార్తల ప్రకారం ఈ రెండు దేశాలు యుద్ధాన్ని ముగించేందుకు ఒప్పందానికి దగ్గరగా ఉన్నట్లు తెలుస్తోంది. ఈ పరిణామం గ్లోబల్ మార్కెట్లలో నమ్మకాన్ని పెంచింది. బ్రెంట్ క్రూడ్ ధరలు 6 శాతం వరకు పడి బ్యారెల్‌కు సుమారు 103 డాల‌ర్ల వద్ద ట్రేడ్ అయ్యాయి. హోర్ముజ్ సముద్ర మార్గం తిరిగి తెరుచుకునే అవకాశాలు పెరగడం దీనికి ప్ర‌ధాన కారణం. క్రూడ్ ధరలు తగ్గడం భారత ఆర్థిక వ్యవస్థకు అనుకూలంగా మారుతుంది.

నిఫ్టీ కీల‌క స్థాయిలు..

మార్కెట్‌లో భారీ స్థాయిలో షార్ట్ కవరింగ్ జరిగింది. ముఖ్యంగా బ్యాంకింగ్, ఆటో, ఫైనాన్షియల్ సర్వీసెస్, ఫార్మా, రియాల్టీ రంగాల్లో 2 శాతానికి పైగా లాభాలు నమోదయ్యాయి. మెటల్, ఐటీ, కన్స్యూమర్ డ్యూరబుల్స్ రంగాలు కూడా పెరిగాయి. భారత రూపాయి డాలర్‌కు వ్యతిరేకంగా 0.7 శాతం పెరిగి 94.5975 వద్ద ఒక వారం గరిష్ఠాన్ని తాకింది. ఇది కూడా మార్కెట్ సెంటిమెంట్‌ను బలోపేతం చేసింది. కాగా నిఫ్టీ50 సూచీ ప్ర‌స్తుతం 24,450 నుంచి 24,500 స్థాయి వద్ద రెసిస్టెన్స్ ను ఎదుర్కొంటుండ‌గా, ఈ స్థాయిని దాటితే 24,650-24,800 వరకు వెళ్లే అవకాశం ఉంద‌ని విశ్లేష‌కులు చెబుతున్నారు. ఇక కింది వైపు 24,200 నుంచి 24,220 వద్ద సపోర్ట్ ఉండ‌గా, ఇండెక్స్ ప్రస్తుతం సిమెట్రికల్ ట్రయాంగిల్ ప్యాటర్న్ నుంచి బ్రేక్ అవుట్ కావడం పాజిటివ్ సంకేతంగా భావిస్తున్నారు. అలాగే ఇండియా విక్స్ (VIX) 7 శాతం పడిపోవడం వోల‌టిలిటీ తగ్గుతున్నదని సూచిస్తోంది.

అప్ర‌మ‌త్తంగానే ఉండాలి..

ప్రస్తుత ర్యాలీ ప్రధానంగా భౌగోళిక ఉద్రిక్త‌త‌లు తగ్గడం, క్రూడ్ ధరలు పడిపోవడం, గ్లోబల్ సెంటిమెంట్ మెరుగుదలపై ఆధారపడి ఉంది. అయితే ఇంకా హెడ్‌లైన్ ఆధారిత వోల‌టిలిటీ కొనసాగే అవ‌కాశాలు ఉన్నాయ‌ని నిపుణులు అంచ‌నా వేస్తున్నారు. అందువ‌ల్ల పెట్టుబ‌డిదారులు తొంద‌ర ప‌డ‌కూడ‌ద‌ని, అల‌ర్ట్‌గానే ఉండాల‌ని వారు హెచ్చ‌రిస్తున్నారు.