Stock Markets | చమురు ధరల తగ్గుదల ఎఫెక్ట్‌.. లాభాల్లో సెన్సెక్స్‌, నిఫ్టీ..

Stock Markets | ప్రపంచ మార్కెట్ల‌లో ముడి చమురు ధరలు తగ్గుముఖం పట్టడంతో దేశీయ స్టాక్‌ మార్కెట్లు సోమవారం ఉదయం లాభాలతో ప్రారంభమయ్యాయి. గత సెషన్‌లో భారీ ర్యాలీని నమోదు చేసిన బెంచ్‌మార్క్‌ సూచీలు అదే జోరును కొనసాగించాయి. బీఎస్‌ఈ సెన్సెక్స్‌ 178 పాయింట్లు పెరిగి 72,627.86 వద్ద ట్రేడింగ్‌ను ప్రారంభించింది. మరోవైపు, ఎన్‌ఎస్‌ఈ నిఫ్టీ 76.20 పాయింట్లు లాభపడి 22,591.45 స్థాయికి చేరుకుంది. సెన్సెక్స్‌లోని 30 ప్రధాన కంపెనీల్లో భారత్‌ ఎలక్ట్రానిక్స్‌, మహీంద్రా అండ్‌ మహీంద్రా, బజాజ్‌ ఫైనాన్స్‌, ట్రెంట్‌, టాటా స్టీల్‌, ఎన్‌టీపీసీ షేర్లు ప్రధానంగా లాభపడ్డాయి. మరోవైపు, టెక్‌ మహీంద్రా, భారతీ ఎయిర్‌టెల్‌, ఐటీసీ, యాక్సిస్‌ బ్యాంక్‌ షేర్లు నష్టాల్లో ట్రేడయ్యాయి.

త‌గ్గిన చ‌మురు ధ‌ర‌లు..

అంతర్జాతీయ మార్కెట్ల‌లో ముడి చమురు ధరలు తగ్గాయి. ప్రపంచ చమురు ధరలకు ప్రామాణికంగా పరిగణించే బ్రెంట్‌ క్రూడ్‌ ధర 1.45 శాతం క్షీణించి బ్యారెల్‌కు 103.1 అమెరికన్‌ డాలర్లకు చేరుకుంది. చమురు ధరల తగ్గుదల దేశీయ మార్కెట్లకు కొంత ఊరటనిచ్చింది. ఆసియా మార్కెట్లలో మిశ్రమ పరిస్థితులు కనిపించాయి. దక్షిణ కొరియాకు చెందిన కోస్పి సూచీ భారీగా పడిపోగా, షాంఘై ఎస్‌ఎస్‌ఈ కాంపోజిట్‌ సూచీ కూడా నష్టాల్లో ట్రేడయ్యింది. హాంగ్‌సెంగ్‌ సూచీ స్వల్ప లాభాలతో కదలాడింది. మరోవైపు, శుక్రవారం అమెరికా స్టాక్‌ మార్కెట్లు లాభాలతో ముగిశాయి. విదేశీ సంస్థాగత మదుపరులు (ఎఫ్‌ఐఐలు) మాత్రం భారత ఈక్విటీ మార్కెట్లలో అమ్మకాలను కొనసాగించారు. శుక్రవారం వారు రూ.3,568.90 కోట్ల విలువైన షేర్లను విక్రయించినట్లు స్టాక్‌ ఎక్స్ఛేంజీల గణాంకాలు వెల్లడించాయి.

కాగా, గత శుక్రవారం దేశీయ స్టాక్‌ మార్కెట్లు భారీ లాభాలను నమోదు చేశాయి. సెన్సెక్స్‌ 879.09 పాయింట్లు, అంటే 1.23 శాతం పెరిగి 72,472.33 వద్ద స్థిరపడింది. నిఫ్టీ 288.65 పాయింట్లు, అంటే 1.30 శాతం లాభపడి 22,520.45 వద్ద ముగిసింది. ఇక ఫారెక్స్ మార్కెట్‌లో భార‌త రూపాయి లాభ‌ప‌డింది. అమెరికా డాల‌ర్‌తో పోలిస్తే 95.69 వ‌ద్ద ఉన్న రూపాయి ఈ సెష‌న్‌లో 1.13 శాతం లాభ‌ప‌డింది.