Stock Markets | స్వ‌ల్ప లాభాల్లో ట్రేడ‌వుతున్న దేశీయ మార్కెట్లు.. పాజిటివ్ సెంటిమెంట్ బ‌ల‌ప‌డుతుందా..?

Stock Markets | భారత స్టాక్ మార్కెట్లు శుక్రవారం ఉదయం స్వల్ప ఒడిదుడుకులతో ప్రారంభమైనప్పటికీ, అనంతరం నష్టాల నుంచి కోలుకుని లాభాల బాట పట్టాయి. ప‌శ్చిమ ఆసియాలో కొనసాగుతున్న రాజకీయ పరిణామాలు, ముఖ్యంగా అమెరికా-ఇరాన్ మధ్య శాంతి ఒప్పందంపై ఆశలు పెరగడం పెట్టుబడిదారుల సెంటిమెంట్‌ను ప్రభావితం చేశాయి. ఉదయం సెన్సెక్స్ 220 పాయింట్లకు పైగా పెరిగి 76,090 వద్ద ట్రేడవ‌గా, నిఫ్టీ 57 పాయింట్లు ఎగసి 23,964 స్థాయికి చేరుకుంది. అయితే మార్కెట్ అస్థిరతను సూచించే ఇండియా విక్స్ (India VIX) 1 శాతానికి పైగా పెరిగి 15.20 వద్ద నమోదైంది. సెన్సెక్స్‌లో ఐటీ షేర్లు ప్రధానంగా రాణించాయి. ఇన్ఫోసిస్, హెచ్‌సీఎల్ టెక్, టీసీఎస్, టెక్ మహీంద్రా షేర్లు 3 శాతం వరకు ఎగిశాయి. ఐసీఐసీఐ బ్యాంక్, మారుతీ సుజుకి, రిలయన్స్ ఇండస్ట్రీస్ షేర్లు కూడా దాదాపు 1 శాతం చొప్పున లాభపడ్డాయి. మరోవైపు భారతీ ఎయిర్‌టెల్, బీఈఎల్ షేర్లు సుమారు 1 శాతం మేర క్షీణించి నష్టాల్లో నిలిచాయి.

అన్ని రంగాల్లోనూ లాభాలు..

విస్తృత మార్కెట్లలో కూడా సానుకూల ధోరణి కనిపించింది. నిఫ్టీ స్మాల్‌క్యాప్ 100, నిఫ్టీ మిడ్‌క్యాప్ 100 సూచీలు సుమారు 0.3 శాతం చొప్పున పెరిగాయి. రంగాల వారీగా చూస్తే నిఫ్టీ ఐటీ సూచీ 2 శాతం కంటే ఎక్కువ పెరిగి అగ్రస్థానంలో నిలిచింది. అయితే నిఫ్టీ ఎఫ్‌ఎంసీజీ, నిఫ్టీ కన్స్యూమర్ డ్యూరబుల్స్ సూచీలు స్వల్ప నష్టాల్లో ఉన్నాయి. ఎన్‌ఎస్‌ఈలో 1,689 షేర్లు లాభపడగా, 925 షేర్లు నష్టపోయాయి. 122 షేర్లలో ఎలాంటి మార్పు లేదు. జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ మాట్లాడుతూ, ఆర్థిక వ్యవస్థ, మార్కెట్లకు సంబంధించిన కొన్ని సానుకూల సంకేతాలు కనిపిస్తున్నాయని చెప్పారు. బ్రెంట్ క్రూడ్ ధరలు 93 డాలర్ల కంటే దిగువకు రావడం భారత ఆర్థిక వ్యవస్థకు పెద్ద ఊరటనిచ్చే అంశమని పేర్కొన్నారు. అమెరికా-ఇరాన్ ఒప్పందంపై అంచనాల కారణంగానే చమురు ధరలు తగ్గాయని, ఒప్పందం కుదిరితే ధరలు మరింత తగ్గే అవకాశం ఉందని తెలిపారు. దీంతో భారత మాక్రో ఎకనామిక్ పరిస్థితులు మెరుగుపడటంతోపాటు రూపాయి స్థిరపడే అవకాశం ఉంటుందని, విదేశీ పెట్టుబడుల ఉపసంహరణ కూడా తగ్గుతుంద‌ని అన్నారు.

త‌గ్గిన చ‌మురు ధ‌ర‌లు, బ‌ల‌ప‌డ్డ రూపాయి..

అమెరికా, ఇరాన్ ప్రస్తుత కాల్పుల విరమణ ఒప్పందాన్ని మరో 60 రోజులు పొడిగించేందుకు అంగీకరించినట్లు వార్తలు వెలువడ్డాయి. అయితే దీనికి అమెరికా అధ్యక్షుడు డొనాల్డ్ ట్రంప్ ఆమోదం అవసరమని నివేదికలు పేర్కొన్నాయి. ఇరాన్ వద్ద ఉన్న అధిక శుద్ధి చేసిన యురేనియం నిల్వల అంశం ఈ 60 రోజుల చర్చల్లో ప్రధాన అంశంగా ఉండనుంది. ఇదే సమయంలో అమెరికా ఉపాధ్యక్షుడు జేడీ వాన్స్ మీడియాతో మాట్లాడుతూ అమెరికా-ఇరాన్ శాంతి ఒప్పందం కుదిరే దశకు చాలా దగ్గరలో ఉందని, ఇరు దేశాలు చర్చలను కొనసాగిస్తున్నాయని చెప్పారు. ఈ పరిణామాలు మ‌ధ్య ప్రాచ్యంలో దీర్ఘకాలంగా కొనసాగుతున్న ఉద్రిక్తతలకు ముగింపు దిశగా అడుగులు వేస్తున్నాయనే ఆశలను పెంచాయి. శాంతి ఒప్పందంపై ఆశలు పెరగడంతో అంతర్జాతీయ చమురు ధరలు తగ్గుముఖం పట్టాయి. బ్రెంట్ క్రూడ్ ఫ్యూచర్స్ 1 శాతానికి పైగా పడిపోయి బ్యారెల్‌కు 92 డాలర్ల వద్ద ట్రేడవుతుండగా, డబ్ల్యూటీఐ క్రూడ్ ఫ్యూచర్స్ 1.5 శాతం తగ్గి 88 డాలర్ల వద్దకు చేరాయి. రూపాయి కూడా బలపడింది. అమెరికన్ డాలర్‌తో పోలిస్తే రూపాయి 0.15 శాతం లాభపడి 95.55 వద్ద ప్రారంభమైంది.