Stock Markets | మార్కెట్లకు ఊరటనిచ్చిన గ్లోబల్ సంకేతాలు.. లాభాల్లో సూచీలు..

Stock Markets | అంతర్జాతీయ మార్కెట్లలో సానుకూల సంకేతాలు, ముడి చమురు ధరల్లో స్వల్ప తగ్గుదల ప్రభావంతో శుక్రవారం ఉదయం దేశీయ స్టాక్ మార్కెట్లు లాభాలతో ప్రారంభమయ్యాయి. అమెరికా-ఇరాన్ శాంతి చర్చల్లో పురోగతి సాధ్యమన్న అంచనాలు కూడా ఇన్వెస్టర్లలో ఆశావాదాన్ని పెంచాయి. ప్రారంభ ట్రేడింగ్‌లో బీఎస్‌ఈ సెన్సెక్స్ 332.39 పాయింట్లు ఎగబాకి 75,507.09 స్థాయికి చేరుకుంది. ఎన్‌ఎస్‌ఈ నిఫ్టీ కూడా 84.60 పాయింట్లు పెరిగి 23,747.40 వద్ద ట్రేడ్ అయింది. సెన్సెక్స్‌లోని 30 కంపెనీలలో ఐసీఐసీఐ బ్యాంక్, ఏషియన్ పెయింట్స్, హెచ్‌డీఎఫ్‌సీ బ్యాంక్, కోటక్ మహీంద్రా బ్యాంక్, యాక్సిస్ బ్యాంక్, అల్ట్రాటెక్ సిమెంట్ షేర్లు ప్రధాన లాభదారులుగా నిలిచాయి. ఇక పవర్ గ్రిడ్, టెక్ మహీంద్రా, టాటా కన్సల్టెన్సీ సర్వీసెస్, ఐటీసీ షేర్లు నష్టాల్లో ట్రేడ్ అయ్యాయి.

త‌గ్గిన చ‌మురు ధ‌ర‌లు..

అంతర్జాతీయ మార్కెట్లో బ్రెంట్ క్రూడ్ ధర బ్యారెల్‌కు సుమారు 104 డాలర్ల వద్ద కొనసాగుతోంది. బ్రెంట్ క్రూడ్ ధర 105 డాలర్ల కంటే దిగువకు రావడం, రూపాయి విలువ బలపడటం మార్కెట్లకు అనుకూల అంశాలని జియోజిత్ ఇన్వెస్ట్‌మెంట్స్ లిమిటెడ్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ తెలిపారు. ఆసియా మార్కెట్లలో దక్షిణ కొరియా కోస్పీ, జపాన్ నిక్కీ 225, షాంఘై ఎస్‌ఎస్‌ఈ కంపోజిట్, హాంకాంగ్ హ్యాంగ్ సెంగ్ సూచీలు లాభాల్లో ట్రేడ్ అయ్యాయి. అమెరికా మార్కెట్లు గురువారం పాజిటివ్‌గా ముగిశాయి. ఎఫ్‌ఐఐలు గురువారం రూ.1,891.21 కోట్ల విలువైన ఈక్విటీలను విక్రయించినట్లు ఎక్స్చేంజ్ గణాంకాలు వెల్లడించాయి. గురువారం బీఎస్‌ఈ సెన్సెక్స్ 135.03 పాయింట్లు తగ్గి 75,183.36 వద్ద ముగిసింది. నిఫ్టీ 4.30 పాయింట్లు పడిపోయి 23,654.70 వద్ద స్థిరపడింది.